ನವದೆಹಲಿ: ಕೃಷಿ ಮತ್ತು ಸಂಸ್ಕರಿಸಿದ ಆಹಾರ ಉತ್ಪನ್ನಗಳ ರಫ್ತು ಅಭಿವೃದ್ಧಿ ಪ್ರಾಧಿಕಾರ (APEDA) ನೆರವಿನಿಂದ ಕರ್ನಾಟಕದ ನೀಲಂ ಮತ್ತು ತೋತಾಪುರಿ ಮಾವಿನ ಹಣ್ಣುಗಳನ್ನು ಮೊದಲ ಬಾರಿಗೆ ವಿಮಾನದ ಮೂಲಕ ಮಾಲ್ಡೀವ್ಸ್‌ಗೆ ರಫ್ತು ಮಾಡಲಾಗಿದೆ. ರಾಜ್ಯದ ತಡವಾಗಿ ಕೊಯ್ಲಾಗುವ ಮಾವಿನ ತಳಿಗಳಿಗೆ ಜಾಗತಿಕ ಮಾರುಕಟ್ಟೆ ತೆರೆಯುವ ಮಹತ್ವದ ಹೆಜ್ಜೆಯಾಗಿ ಇದನ್ನು ಪರಿಗಣಿಸಲಾಗಿದೆ.
ಜುಲೈ 30ರಂದು ಒಂದು ಮೆಟ್ರಿಕ್ ಟನ್ ಮಾವಿನ ಹಣ್ಣುಗಳ ಮೊದಲ ಸಾಗಣೆ ನಡೆದಿದ್ದು, ಈ ಹಣ್ಣುಗಳನ್ನು ಕೋಲಾರ ಜಿಲ್ಲೆಯ ಕೆಜಿಎಫ್ ತಾಲ್ಲೂಕಿನ ಪ್ರಕೃತಿಮಯ ಫಾರ್ಮರ್ಸ್ ಪ್ರೊಡ್ಯೂಸರ್ ಕಂಪನಿ ಲಿಮಿಟೆಡ್ (FPC)ಗೆ ಸೇರಿದ ರೈತರಿಂದ ನೇರವಾಗಿ ಸಂಗ್ರಹಿಸಲಾಗಿದೆ. ಹೊಸದಾಗಿ ನೋಂದಾಯಿತ ಮಹಿಳಾ ಉದ್ಯಮಿಯಾದ ಅಹಲ್ಯಾ ದೇವಿ ವೆಂಚರ್ಸ್ ಸಂಸ್ಥೆಯ ನಿರ್ದೇಶಕಿ ಅಶ್ವಿನಿ ಎ. ಈ ಸಾಗಣೆಯ ರಫ್ತಿನ ನೇತೃತ್ವ ವಹಿಸಿದ್ದಾರೆ.
ಈ ಉಪಕ್ರಮವು ಭಾರತೀಯ ಮಾವಿನ ಹಣ್ಣುಗಳಿಗೆ ಜಾಗತಿಕ ಮಾರುಕಟ್ಟೆಯಲ್ಲಿ ಹೊಸ ಅವಕಾಶಗಳನ್ನು ಸೃಷ್ಟಿಸುವುದರ ಜೊತೆಗೆ, ತಡವಾಗಿ ಕೊಯ್ಲಾಗುವ ಮಾವಿನ ತಳಿಗಳ ರಫ್ತಿಗೆ ಉತ್ತೇಜನ ನೀಡಲಿದೆ ಎಂದು APEDA ಅಧ್ಯಕ್ಷ ಅಭಿಷೇಕ್ ದೇವ್ ತಿಳಿಸಿದ್ದಾರೆ. ಇದರಿಂದ ರೈತರಿಗೆ ಸುಸ್ಥಿರ ಆದಾಯದ ಮೂಲವೂ ಸಿಗಲಿದೆ ಎಂದು ಅವರು ಹೇಳಿದ್ದಾರೆ.
APEDA ಮಾಹಿತಿ ಪ್ರಕಾರ, ಈ ರೈತ ಉತ್ಪಾದಕ ಕಂಪನಿಗೆ ಸೇರಿದ ರೈತರು ದೇಶೀಯ ಮಾರುಕಟ್ಟೆಗೆ ಹೋಲಿಸಿದರೆ ರಫ್ತಿನ ಮೂಲಕ ಶೇ.50ಕ್ಕೂ ಹೆಚ್ಚು ಹೆಚ್ಚುವರಿ ಆದಾಯ ಗಳಿಸಿದ್ದಾರೆ. ನೇರ ಸಂಗ್ರಹಣೆ, ಸಂಘಟಿತ ಒಟ್ಟುಗೂಡಿಸುವಿಕೆ ಮತ್ತು ಅಂತರರಾಷ್ಟ್ರೀಯ ಮಾರುಕಟ್ಟೆ ಸಂಪರ್ಕದಿಂದ ರೈತರ ಆದಾಯ ಹೆಚ್ಚಿಸಲು ಸಾಧ್ಯವಾಗಿದೆ ಎಂಬುದನ್ನು ಈ ಸಾಧನೆ ತೋರಿಸಿದೆ.
ನೀಲಂ ಮಾವು ಸಿಹಿ, ರಸಭರಿತ ತಿರುಳು ಮತ್ತು ವಿಶಿಷ್ಟ ಸುವಾಸನೆಗೆ ಪ್ರಸಿದ್ಧವಾಗಿದ್ದರೆ, ತೋತಾಪುರಿ ತನ್ನ ವಿಶೇಷ ಆಕಾರ ಮತ್ತು ಸಿಹಿ-ಹುಳಿ ರುಚಿಯಿಂದ ತಾಜಾ ಬಳಕೆ ಹಾಗೂ ಸಂಸ್ಕರಣಾ ಉದ್ಯಮದಲ್ಲಿ ಹೆಚ್ಚಿನ ಬೇಡಿಕೆ ಹೊಂದಿದೆ. ಜೂನ್ ಅಂತ್ಯದಿಂದ ಜುಲೈ ಅಂತ್ಯದವರೆಗೆ ಕೊಯ್ಲಾಗುವ ಈ ತಳಿಗಳು ಭಾರತದ ಮಾವಿನ ರಫ್ತು ಋತುವನ್ನು ವಿಸ್ತರಿಸಲು ನೆರವಾಗಲಿವೆ.
ಈ ಯಶಸ್ವಿ ರಫ್ತು ರೈತ ಉತ್ಪಾದಕ ಸಂಸ್ಥೆಗಳು (FPO), ರೈತ ಉತ್ಪಾದಕ ಕಂಪನಿಗಳು (FPC), ರಫ್ತುದಾರರು ಮತ್ತು ಕೃಷಿ ಉದ್ಯಮಿಗಳ ಅಂತರರಾಷ್ಟ್ರೀಯ ವ್ಯಾಪಾರದಲ್ಲಿ ಭಾಗವಹಿಸುವಿಕೆಯನ್ನು ಮತ್ತಷ್ಟು ಹೆಚ್ಚಿಸಲಿದೆ ಎಂದು ವಾಣಿಜ್ಯ ಸಚಿವಾಲಯ ತಿಳಿಸಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಭಾರತೀಯ ಕೃಷಿ ಉತ್ಪನ್ನಗಳ ಸ್ಥಾನವನ್ನು ಬಲಪಡಿಸಲು ರಾಜ್ಯ ಸರ್ಕಾರಗಳು ಹಾಗೂ ಕೈಗಾರಿಕಾ ಪಾಲುದಾರರೊಂದಿಗೆ APEDA ಮುಂದುವರಿದು ಕಾರ್ಯನಿರ್ವಹಿಸುವುದಾಗಿ ತಿಳಿಸಿದೆ.
Maldives to relish Karnataka's finest mangoes! 🥭
Kudos to @APEDADOC for facilitating the first-ever air shipment of Neelam and Totapuri mangoes from Karnataka to the Maldives.
This milestone unlocks new opportunities for Karnataka's mango growers, encouraging greater… pic.twitter.com/CUBBHx7hHj
— Piyush Goyal (@PiyushGoyal) July 30, 2026
