ಬೆಂಗಳೂರು: ದೇಶದ ಡಿಜಿಟಲ್ ಮೂಲಸೌಕರ್ಯವನ್ನು ಮತ್ತಷ್ಟು ಸುರಕ್ಷಿತಗೊಳಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರದ ‘ಒಂದು ರಾಷ್ಟ್ರ, ಒಂದು ಕಾಲ’ ಉಪಕ್ರಮದಡಿ ‘ವೈಟ್ ರ್ಯಾಬಿಟ್ ತಂತ್ರಜ್ಞಾನ’ ಆಧಾರಿತ ಭಾರತೀಯ ಪ್ರಮಾಣಿತ ಸಮಯ (IST) ವಿತರಣಾ ಪ್ರದರ್ಶನ ಜಾಲಕ್ಕೆ ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಜಕ್ಕೂರಿನ ಪ್ರಾದೇಶಿಕ ಉಲ್ಲೇಖ ಮಾನದಂಡಗಳ ಪ್ರಯೋಗಾಲಯದಲ್ಲಿ ಚಾಲನೆ ನೀಡಿದರು.
ಈ ಯೋಜನೆಯು ಜಿಪಿಎಸ್ ಸೇರಿದಂತೆ ವಿದೇಶಿ ಸಮಯ ಮೂಲಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಿ, ದೇಶಾದ್ಯಂತ ಏಕರೂಪದ, ನಿಖರ ಮತ್ತು ಸುರಕ್ಷಿತ ಸಮಯ ಸಿಂಕ್ರೊನೈಸೇಶನ್ ವ್ಯವಸ್ಥೆ ರೂಪಿಸುವ ಗುರಿ ಹೊಂದಿದೆ.
ಈ ವ್ಯವಸ್ಥೆಯಿಂದ ಬ್ಯಾಂಕಿಂಗ್, ಷೇರುಪೇಟೆ, ಡಿಜಿಟಲ್ ಪಾವತಿ, ದೂರಸಂಪರ್ಕ, ರಕ್ಷಣಾ ವಲಯ ಹಾಗೂ ರಾಷ್ಟ್ರೀಯ ವಿದ್ಯುತ್ ಜಾಲಕ್ಕೆ ವಿಶ್ವಾಸಾರ್ಹ ಸಮಯ ಉಲ್ಲೇಖ ದೊರೆಯಲಿದ್ದು, ಸೈಬರ್ ದಾಳಿ ಹಾಗೂ ಡೇಟಾ ತಿರುಚುವಿಕೆ ಸೇರಿದಂತೆ ಭದ್ರತಾ ಅಪಾಯಗಳನ್ನು ತಡೆಯಲು ನೆರವಾಗಲಿದೆ ಎಂದು ಪ್ರಲ್ಹಾದ್ ಜೋಶಿ ಹೇಳಿದರು.
ಗ್ರಾಹಕ ವ್ಯವಹಾರಗಳ ಸಚಿವಾಲಯದ ಕಾನೂನು ಮಾಪನಶಾಸ್ತ್ರ ವಿಭಾಗವು ಈ ಯೋಜನೆಯ ನೋಡಲ್ ಸಂಸ್ಥೆಯಾಗಿದ್ದು, ರಾಷ್ಟ್ರೀಯ ಭೌತಿಕ ಪ್ರಯೋಗಾಲಯ (NPL), ಇಸ್ರೋ, ಬಿಎಸ್ಎನ್ಎಲ್ ಹಾಗೂ ಸೆಬಿ ಸಹಯೋಗದಲ್ಲಿ ಯೋಜನೆ ಅಭಿವೃದ್ಧಿಪಡಿಸಲಾಗಿದೆ.
ಜಾಗತಿಕ UTC ಮಾನದಂಡಗಳಿಗೆ ಅನುಗುಣವಾಗಿ ಕಾರ್ಯನಿರ್ವಹಿಸುವ ಈ ವ್ಯವಸ್ಥೆ, ಭಾರತದ ಪ್ರಮುಖ ಡಿಜಿಟಲ್ ಸೇವೆಗಳಿಗೆ ಸ್ವದೇಶಿ ಹಾಗೂ ಸುರಕ್ಷಿತ ಸಮಯ ವ್ಯವಸ್ಥೆ ಒದಗಿಸುವ ಮೂಲಕ ತಂತ್ರಜ್ಞಾನಾಧಾರಿತ ಆಡಳಿತಕ್ಕೆ ಮತ್ತಷ್ಟು ಬಲ ನೀಡಲಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
