ಅಟ್ಲಾಂಟಾ: ಜಾಗತಿಕ ಇಂಧನ ಬಿಕ್ಕಟ್ಟಿಗೆ ಉತ್ಪಾದನೆಯ ಕೊರತೆಗಿಂತ ಪೂರೈಕೆ ಸರಪಳಿಯಲ್ಲಿನ ಅಡಚಣೆಗಳೇ ಪ್ರಮುಖ ಕಾರಣ ಎಂದು ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಹೇಳಿದ್ದಾರೆ.
ಅಟ್ಲಾಂಟಾದಲ್ಲಿ ನಡೆದ ಜಿ20 ವಿದೇಶಾಂಗ ಸಚಿವರ ಸಭೆಯಲ್ಲಿ ಮಾತನಾಡಿದ ಅವರು, ಇಂಧನ ವ್ಯಾಪಾರ ಮತ್ತು ಮೂಲಸೌಕರ್ಯಗಳ ಮೇಲಿನ ದಾಳಿಗಳು ಬೆಲೆ ಏರಿಕೆಗೆ ಕಾರಣವಾಗುತ್ತಿವೆ. ನಿರ್ಬಂಧ ಹಾಗೂ ಅಡೆತಡೆಗಳಿಂದ ಜಾಗತಿಕ ಮಾರುಕಟ್ಟೆಯಲ್ಲಿ ಅಸ್ಥಿರತೆ ಉಂಟಾಗಿದ್ದು, ಬಡ ರಾಷ್ಟ್ರಗಳು ಹೆಚ್ಚಿನ ಸಂಕಷ್ಟ ಎದುರಿಸುತ್ತಿವೆ ಎಂದರು.
ಭಾರತಕ್ಕೆ ಎಲ್‌ಪಿಜಿ ನಿರಂತರ ಮತ್ತು ವಿಶ್ವಾಸಾರ್ಹ ಪೂರೈಕೆ ಅಗತ್ಯವಿದೆ ಎಂದು ಪ್ರತಿಪಾದಿಸಿದ ಅವರು, ನಿರ್ಣಾಯಕ ಖನಿಜಗಳ ಅನ್ವೇಷಣೆಯಿಂದ ಮರುಬಳಕೆಯವರೆಗೆ ರಾಷ್ಟ್ರೀಯ ಮಿಷನ್ ಕೈಗೊಂಡಿರುವುದನ್ನು ವಿವರಿಸಿದರು. ಜಿ20 ನಿರ್ಣಾಯಕ ಖನಿಜ ಮರುಬಳಕೆ ಉಪಕ್ರಮಕ್ಕೂ ಪ್ರಸ್ತಾಪಿಸಿದರು.
ಹಸಿರು ಹೈಡ್ರೋಜನ್, ಜೈವಿಕ ಇಂಧನ ಮತ್ತು ಸಣ್ಣ ಅಣು ರಿಯಾಕ್ಟರ್‌ಗಳಿಗೆ ಹೂಡಿಕೆ ಹೆಚ್ಚಿಸುವಂತೆ ಕರೆ ನೀಡಿದರು. ಜಾಗತಿಕ ಸಂಘರ್ಷಗಳಿಗೆ ಸೇನಾ ಪರಿಹಾರ ಸಾಧ್ಯವಿಲ್ಲ; ರಾಜತಾಂತ್ರಿಕತೆಗೆ ಅವಕಾಶ ನೀಡಬೇಕು. ನಾಗರಿಕ ಹಡಗುಗಳು ಮತ್ತು ನಾವಿಕರ ಮೇಲಿನ ದಾಳಿಗಳು ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಹೆಚ್ಚಿನ ಹೊಡೆತ ನೀಡುತ್ತವೆ ಎಂದರು.
