ನವದೆಹಲಿ: 2027-28ರ ಮಾರುಕಟ್ಟೆ ಅವಧಿಗೆ ನಿಗದಿಪಡಿಸಿರುವ ಎಲ್ಲಾ ರಬಿ ಬೆಳೆಗಳ ಕನಿಷ್ಠ ಬೆಂಬಲ ಬೆಲೆ (MSP) ಹೆಚ್ಚಿಸಲು ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯ ಆರ್ಥಿಕ ವ್ಯವಹಾರಗಳ ಸಂಪುಟ ಸಮಿತಿ (CCEA) ಅನುಮೋದನೆ ನೀಡಿದೆ.
ಸರ್ಕಾರದ ಪರಿಷ್ಕೃತ ದರಗಳ ಪ್ರಕಾರ, ಕುಸುಬೆ (ಸಾಫ್ಲವರ್) MSPಯಲ್ಲಿ ಗರಿಷ್ಠ ಏರಿಕೆ ಕಂಡುಬಂದಿದೆ. ಕ್ವಿಂಟಾಲ್‌ಗೆ ₹675 ಹೆಚ್ಚಳದೊಂದಿಗೆ ಹೊಸ MSP ₹7,215 ಆಗಿದೆ.
ರೇಪ್‌ಸೀಡ್ ಮತ್ತು ಸಾಸಿವೆ MSP ಕ್ವಿಂಟಾಲ್‌ಗೆ ₹413 ಹೆಚ್ಚಳಗೊಂಡು ₹6,613ಕ್ಕೆ ತಲುಪಿದೆ. ಮಸೂರ ಬೇಳೆಯ MSP ₹390 ಏರಿಕೆಯಾಗಿ ₹7,390 ಆಗಿದೆ.
ಬಾರ್ಲೆ MSP ₹136 ಹೆಚ್ಚಳದೊಂದಿಗೆ ₹2,286, ಕಡಲೆಕಾಳಿನ MSP ₹83 ಏರಿಕೆಯೊಂದಿಗೆ ₹5,958 ಹಾಗೂ ಗೋಧಿಯ MSP ₹25 ಹೆಚ್ಚಳದೊಂದಿಗೆ ಕ್ವಿಂಟಾಲ್‌ಗೆ ₹2,610ಕ್ಕೆ ನಿಗದಿಯಾಗಿದೆ.
ಪರಿಷ್ಕೃತ MSP ದರಗಳು ಅಖಿಲ ಭಾರತ ಸರಾಸರಿ ಉತ್ಪಾದನಾ ವೆಚ್ಚಕ್ಕಿಂತ ಹೆಚ್ಚಿನ ಲಾಭಾಂಶವನ್ನು ಒದಗಿಸಲಿವೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
ಕುಸುಬೆಗೆ ಉತ್ಪಾದನಾ ವೆಚ್ಚದ ಮೇಲೆ ಶೇ.50, ಗೋಧಿಗೆ ಶೇ.106, ರೇಪ್‌ಸೀಡ್ ಮತ್ತು ಸಾಸಿವೆಗೆ ಶೇ.96, ಮಸೂರಕ್ಕೆ ಶೇ.92, ಕಡಲೆಗೆ ಶೇ.59 ಹಾಗೂ ಬಾರ್ಲೆಗೆ ಶೇ.58ರಷ್ಟು ಲಾಭಾಂಶ ದೊರೆಯಲಿದೆ ಎಂದು ಸರ್ಕಾರ ಹೇಳಿದೆ.
2018-19ರ ಕೇಂದ್ರ ಬಜೆಟ್‌ನಲ್ಲಿ ಘೋಷಿಸಿದಂತೆ, ಅಖಿಲ ಭಾರತ ಸರಾಸರಿ ಉತ್ಪಾದನಾ ವೆಚ್ಚದ ಕನಿಷ್ಠ 1.5 ಪಟ್ಟು MSP ನಿಗದಿಪಡಿಸುವ ನೀತಿಗೆ ಅನುಗುಣವಾಗಿ ಈ ಪರಿಷ್ಕರಣೆ ಮಾಡಲಾಗಿದೆ ಎಂದು ಕೇಂದ್ರ ತಿಳಿಸಿದೆ.
ದ್ವಿದಳ ಧಾನ್ಯಗಳು ಹಾಗೂ ಎಣ್ಣೆಕಾಳುಗಳಿಗೆ ಹೆಚ್ಚಿನ MSP ನೀಡುವ ಮೂಲಕ ರೈತರು ಏಕಮಾತ್ರವಾಗಿ ಧಾನ್ಯ ಬೆಳೆಗಳ ಮೇಲೆ ಅವಲಂಬಿತರಾಗದೆ ಬೆಳೆ ವೈವಿಧ್ಯೀಕರಣಕ್ಕೆ ಮುಂದಾಗುವಂತೆ ಉತ್ತೇಜಿಸುವುದು ಸರ್ಕಾರದ ಉದ್ದೇಶವಾಗಿದೆ.
ಸರ್ಕಾರದ ಅಂಕಿ-ಅಂಶಗಳ ಪ್ರಕಾರ, 2004-05ರಿಂದ 2013-14ರವರೆಗೆ 2,254 ಲಕ್ಷ ಟನ್ ಇದ್ದ ಗೋಧಿ ಸಂಗ್ರಹಣೆ, 2014-15ರಿಂದ 2025-26ರ ಅವಧಿಯಲ್ಲಿ 3,715 ಲಕ್ಷ ಟನ್ಗೆ ಏರಿಕೆಯಾಗಿದೆ.
ಇದೇ ಅವಧಿಯಲ್ಲಿ ಆರು ರಬಿ ಬೆಳೆಗಳ ಒಟ್ಟು ಸಂಗ್ರಹಣೆ 2,302 ಲಕ್ಷ ಟನ್‌ನಿಂದ 3,921 ಲಕ್ಷ ಟನ್ಗೆ ಹೆಚ್ಚಾಗಿದೆ.
2004-05ರಿಂದ 2013-14ರವರೆಗೆ ಗೋಧಿ ರೈತರಿಗೆ MSP ರೂಪದಲ್ಲಿ ಪಾವತಿಸಲಾದ ಮೊತ್ತ ₹2.56 ಲಕ್ಷ ಕೋಟಿ ಇದ್ದರೆ, 2014-15ರಿಂದ 2025-26ರ ಅವಧಿಯಲ್ಲಿ ಅದು ₹7.31 ಲಕ್ಷ ಕೋಟಿಗೆ ಏರಿಕೆಯಾಗಿದೆ.
ಆರು ರಬಿ ಬೆಳೆಗಳಿಗೆ ಸಂಬಂಧಿಸಿದಂತೆ ಇದೇ ಅವಧಿಯಲ್ಲಿ MSP ಪಾವತಿ ₹2.65 ಲಕ್ಷ ಕೋಟಿಯಿಂದ ₹8.36 ಲಕ್ಷ ಕೋಟಿಗೆ ಹೆಚ್ಚಾಗಿದೆ.
