ಕೈವ್: ರಷ್ಯಾದ ಇತ್ತೀಚಿನ ದಾಳಿಗಳಲ್ಲಿ ಉಕ್ರೇನ್‌ನ 28 ವಿದ್ಯುತ್ ಉಪಕೇಂದ್ರಗಳು ಸೇರಿದಂತೆ ಪ್ರಮುಖ ಇಂಧನ ಮೂಲಸೌಕರ್ಯಗಳು ಹಾನಿಗೊಳಗಾಗಿವೆ ಎಂದು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ತಿಳಿಸಿದ್ದಾರೆ. ದಾಳಿಯಿಂದ ಬಾಧಿತ ಪ್ರದೇಶಗಳಲ್ಲಿ ವಿದ್ಯುತ್ ಪೂರೈಕೆಯನ್ನು ಪುನಃಸ್ಥಾಪಿಸಲು ದುರಸ್ತಿ ಸಿಬ್ಬಂದಿ ಹಾಗೂ ಇಂಧನ ವಲಯದ ಕಾರ್ಮಿಕರು ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಅವರು ಹೇಳಿದ್ದಾರೆ.
ದೇಶದ ವಿವಿಧ ಪ್ರದೇಶಗಳ ಪರಿಸ್ಥಿತಿಯ ಕುರಿತು ನಡೆದ ಸಮನ್ವಯ ಸಭೆಯ ಬಳಿಕ ಮಾತನಾಡಿದ ಝೆಲೆನ್ಸ್ಕಿ, ವಿದ್ಯುತ್ ಪೂರೈಕೆಯನ್ನು ಹಂತಹಂತವಾಗಿ ಮರುಸ್ಥಾಪಿಸಲಾಗುತ್ತಿದೆ ಎಂದರು. ಮುಂಬರುವ ಚಳಿಗಾಲದ ತಾಪನ ವ್ಯವಸ್ಥೆಗೆ ಅಗತ್ಯ ಸಿದ್ಧತೆಗಳನ್ನು ಕೈಗೊಳ್ಳುವಂತೆ ಸರ್ಕಾರಿ ಸಂಸ್ಥೆಗಳು, ಇಂಧನ ಕಂಪನಿಗಳು ಹಾಗೂ ಸ್ಥಳೀಯ ಆಡಳಿತಗಳಿಗೆ ಸೂಚಿಸಲಾಗಿದೆ ಎಂದು ತಿಳಿಸಿದರು.
ಉಕ್ರೇನ್‌ನ ವಾಯು ರಕ್ಷಣಾ ಸಾಮರ್ಥ್ಯವನ್ನು ಬಲಪಡಿಸಲು ಅಂತರರಾಷ್ಟ್ರೀಯ ಪಾಲುದಾರರೊಂದಿಗೆ ತುರ್ತು ಮಾತುಕತೆ ನಡೆಸುವಂತೆ ರಕ್ಷಣಾ ಮತ್ತು ವಿದೇಶಾಂಗ ಸಚಿವರಿಗೆ ಸೂಚಿಸಲಾಗಿದೆ ಎಂದು ಝೆಲೆನ್ಸ್ಕಿ ಹೇಳಿದರು. ಕೆಲವು ರಾಜಕೀಯ ಒಪ್ಪಂದಗಳ ಅನುಷ್ಠಾನ ಹಾಗೂ ಅಮೆರಿಕದ ರಕ್ಷಣಾ ಇಲಾಖೆಯ ಮಟ್ಟದಲ್ಲಿ ನಿರ್ಣಾಯಕ ಸರಬರಾಜುಗಳ ವಿತರಣೆಯಲ್ಲಿ ವಿಳಂಬವಾಗಿರುವುದನ್ನೂ ಅವರು ಪ್ರಸ್ತಾಪಿಸಿದರು.
ಇರಾನ್ ವಿನ್ಯಾಸದ ಶಾಹೆದ್ ಡ್ರೋನ್‌ಗಳನ್ನು ಎದುರಿಸಲು ಪರಿಣಾಮಕಾರಿ ಎಂದು ತಾವು ಹೇಳಿರುವ ಗೋಪುರಗಳ ಉತ್ಪಾದನಾ ಸಾಮರ್ಥ್ಯವನ್ನು ಉಕ್ರೇನ್ ಹೆಚ್ಚಿಸುತ್ತಿದೆ. ಹೆಚ್ಚುವರಿ ಆದೇಶಗಳನ್ನು ನೀಡಲಾಗುತ್ತಿದ್ದು, ಉತ್ಪಾದನೆ ಮತ್ತು ಹಣಕಾಸು ಪ್ರಕ್ರಿಯೆಗಳನ್ನು ವೇಗಗೊಳಿಸಲು ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದರು. ಲಾಜಿಸ್ಟಿಕ್ಸ್ ನೆರವಿಗಾಗಿ ಬಾಲ್ಟಿಕ್ ರಾಷ್ಟ್ರಗಳೊಂದಿಗೂ ಸಂಪರ್ಕ ಸಾಧಿಸುವಂತೆ ಸೂಚಿಸಲಾಗಿದೆ ಎಂದು ತಿಳಿಸಿದರು.
ಪ್ರತ್ಯೇಕ ಬೆಳವಣಿಗೆಯಲ್ಲಿ, ಸ್ಟಾರ್‌ಲಿಂಕ್ ಮತ್ತು ಸ್ಟಾರ್‌ಶೀಲ್ಡ್ ಸೇವೆಗಳನ್ನು ಬಳಸುವ ಕೆಲವು ಉಪಕರಣಗಳ ಕಾರ್ಯಾಚರಣೆಯಲ್ಲಿ ಅಡಚಣೆ ಉಂಟಾಗಿರುವ ಬಗ್ಗೆ ಸಶಸ್ತ್ರ ಪಡೆಗಳ ಕಮಾಂಡರ್-ಇನ್-ಚೀಫ್ ಮಾಹಿತಿ ನೀಡಿದ್ದಾರೆ ಎಂದು ಝೆಲೆನ್ಸ್ಕಿ ಹೇಳಿದರು.
ಮುಂಚೂಣಿ ಪ್ರದೇಶಗಳಿಂದ ಬಂದ ವರದಿಗಳ ಪ್ರಕಾರ, ಕೆಲವು ಉಪಕರಣಗಳು ಗಂಟೆಗೆ 130ರಿಂದ 161 ಕಿ.ಮೀ. ವೇಗದ ಮಿತಿಗೆ ಸಂಬಂಧಿಸಿದ ಪರಿಸ್ಥಿತಿಯಲ್ಲಿ ಕಾರ್ಯನಿರ್ವಹಿಸುವುದನ್ನು ನಿಲ್ಲಿಸುತ್ತಿವೆ ಎಂದು ಅವರು ವಿವರಿಸಿದರು. ಈ ಅಡಚಣೆಗಳಿಂದ ಮುಂಚೂಣಿ ಪ್ರದೇಶಗಳಿಗೆ ಸರಕು ಸಾಗಣೆ ವಿಳಂಬವಾಗುವುದರ ಜೊತೆಗೆ, ಮಧ್ಯಮ ದೂರದ ದಾಳಿ ಡ್ರೋನ್‌ಗಳು ಹಾಗೂ ಶಾಹೆದ್ ಡ್ರೋನ್‌ಗಳನ್ನು ತಡೆಯುವ ಇಂಟರ್‌ಸೆಪ್ಟರ್‌ಗಳ ಬಳಕೆಯ ಮೇಲೂ ಪರಿಣಾಮ ಉಂಟಾಗಬಹುದು ಎಂದು ಎಚ್ಚರಿಸಿದರು.
