ಮುಂಬೈ: ಹಿರಿಯ ನಟ ಅನುಪಮ್ ಖೇರ್ ತಮ್ಮ 556ನೇ ಚಿತ್ರ ‘ಔಟ್ ಆಫ್ ಫ್ಯಾಷನ್’ ಅನ್ನು ಘೋಷಿಸಿದ್ದಾರೆ. ಸ್ವೀಡನ್ ಮತ್ತು ಬೆಲ್ಜಿಯಂ ಸಹನಿರ್ಮಾಣದ ಈ ಚಿತ್ರವು ಭಾಷೆ ಹಾಗೂ ಸಾಂಸ್ಕೃತಿಕ ಗಡಿಗಳನ್ನು ಮೀರಿದ ಮಾನವ ಭಾವನೆಗಳನ್ನು ಅನಾವರಣಗೊಳಿಸಲಿದೆ ಎಂದು ಅವರು ಹೇಳಿದ್ದಾರೆ.
ಸಾಮಾಜಿಕ ಮಾಧ್ಯಮ ಎಕ್ಸ್‌ನಲ್ಲಿ ಮಾಹಿತಿ ಹಂಚಿಕೊಂಡ ಖೇರ್, ನೋಟ, ಮೌನ ಮತ್ತು ಮೃದುತ್ವದಂತಹ ಭಾವನೆಗಳಿಗೆ ಅನುವಾದದ ಅಗತ್ಯವಿಲ್ಲ ಎಂದು ತಿಳಿಸಿದ್ದಾರೆ. ಹೊಸ ಪಾತ್ರದ ಮೂಲಕ ವಿಭಿನ್ನ ಅನುಭವ ಪಡೆಯುವ ಅವಕಾಶಕ್ಕಾಗಿ ಕೃತಜ್ಞತೆ ವ್ಯಕ್ತಪಡಿಸಿರುವ ಅವರು, ಪ್ರತಿಯೊಂದು ಚಿತ್ರವೂ ಹೊಸ ಆರಂಭಕ್ಕೆ ದಾರಿ ಮಾಡಿಕೊಡುತ್ತದೆ ಎಂದಿದ್ದಾರೆ.
ಪ್ರಶಸ್ತಿ ವಿಜೇತ ಚಿತ್ರನಿರ್ಮಾಪಕಿ ಜೆನ್ಸ್ ಜಾನ್ಸನ್ ನಿರ್ದೇಶಿಸುತ್ತಿರುವ ಈ ಚಿತ್ರವನ್ನು ಜೂಲಿಯಾ ಗೆಬೌರ್ ಮತ್ತು ಸಿರಿ ಜೋರ್ಟನ್ ವ್ಯಾಗ್ನರ್ ನಿರ್ಮಿಸುತ್ತಿದ್ದಾರೆ. ಸುನಿಲ್ ಮುನ್ಶಿ ಕಥೆ ಬರೆದು ನಟಿಸಿದ್ದಾರೆ. ಹೆಲೆನಾ ಬರ್ಗ್‌ಸ್ಟ್ರೋಮ್, ಬಹಾರ್ ಪಾರ್ಸ್ ಮತ್ತು ಕ್ರಿಸ್ಟಾ ಕೊಸೊನೆನ್ ಕೂಡ ತಾರಾಗಣದಲ್ಲಿದ್ದಾರೆ.
‘ಔಟ್ ಆಫ್ ಫ್ಯಾಷನ್’ ಹೃದಯದಿಂದ ಮೂಡುವ ಕಥೆಗಳು ಭಾಷೆ ಮತ್ತು ಸಂಸ್ಕೃತಿಯ ಗಡಿಗಳನ್ನು ಮೀರಿ ಪ್ರೇಕ್ಷಕರನ್ನು ತಲುಪಬಲ್ಲವು ಎಂಬುದನ್ನು ಸಾರುವ ವಿಶೇಷ ಚಿತ್ರ ಎಂದು ಖೇರ್ ಬಣ್ಣಿಸಿದ್ದಾರೆ.
