ಅರ್ನಾಬ್ ಪೀಡಿತ ಪ್ರದೇಶಗಳಲ್ಲಿ ಐಸಿಆರ್ ಸೌಲಭ್ಯ ಸಕ್ರಿಯ; ತುರ್ತು ಸಂಪರ್ಕಕ್ಕಾಗಿ 11 ಮೊಬೈಲ್ ಸೆಲ್ ಘಟಕಗಳ ನಿಯೋಜನೆ
ನವದೆಹಲಿ: ಅರ್ನಾಬ್ ಚಂಡಮಾರುತದಿಂದ ಹಾನಿಗೊಳಗಾಗಿದ್ದ ಆಂಧ್ರಪ್ರದೇಶ ಮತ್ತು ಒಡಿಶಾದಲ್ಲಿ ದೂರಸಂಪರ್ಕ ಸೇವೆಗಳು ಕ್ರಮೇಣ ಪುನಃಸ್ಥಾಪನೆಯಾಗುತ್ತಿವೆ. ಆಂಧ್ರಪ್ರದೇಶದಲ್ಲಿ ಟೆಲಿಕಾಂ ನೆಟ್‌ವರ್ಕ್ ಲಭ್ಯತೆ ಶೇ. 99.18ಕ್ಕೆ ತಲುಪಿದೆ ಎಂದು ದೂರಸಂಪರ್ಕ ಇಲಾಖೆ (ಡಿಒಟಿ) ತಿಳಿಸಿದೆ.
ಭಾರೀ ಮಳೆ, ಹಠಾತ್ ಪ್ರವಾಹ, ಮರಗಳು ಉರುಳಿರುವುದು ಹಾಗೂ ವಿದ್ಯುತ್ ಮೂಲಸೌಕರ್ಯಕ್ಕೆ ಹಾನಿಯಾದ ಹಿನ್ನೆಲೆಯಲ್ಲಿ ಟೆಲಿಕಾಂ ಸೇವೆಗಳಲ್ಲಿ ವ್ಯತ್ಯಯ ಉಂಟಾಗಿತ್ತು. ಸೇವಾ ಪೂರೈಕೆದಾರರೊಂದಿಗೆ ಸಮನ್ವಯ ಸಾಧಿಸಿ ಪುನಃಸ್ಥಾಪನಾ ಕಾರ್ಯ ಕೈಗೊಳ್ಳಲಾಗಿದೆ.
ಪಶ್ಚಿಮ ಗೋದಾವರಿ ಜಿಲ್ಲೆಯಲ್ಲಿ ನೆಟ್‌ವರ್ಕ್ ಲಭ್ಯತೆ ಶೇ. 98.5ರಷ್ಟಿದ್ದರೆ, ಡಾ. ಬಿ.ಆರ್. ಅಂಬೇಡ್ಕರ್ ಕೊನಸೀಮಾ ಜಿಲ್ಲೆಯಲ್ಲಿ ಶೇ. 91.96ರಷ್ಟಿದೆ. ವಿದ್ಯುತ್ ವ್ಯತ್ಯಯ ಮತ್ತು ಸ್ಥಳೀಯ ಆಪ್ಟಿಕಲ್ ಫೈಬರ್ ಕೇಬಲ್‌ಗಳ ಕಡಿತ ಪುನಃಸ್ಥಾಪನೆಗೆ ಪ್ರಮುಖ ಸವಾಲುಗಳಾಗಿವೆ.
ಪೀಡಿತ ಜಿಲ್ಲೆಗಳಲ್ಲಿ ಇಂಟ್ರಾ-ಸರ್ಕಲ್ ರೋಮಿಂಗ್ (ಐಸಿಆರ್) ಸೌಲಭ್ಯ ಸಕ್ರಿಯಗೊಳಿಸಲಾಗಿದೆ. ಇದರಿಂದ ಬಳಕೆದಾರರು ತಮ್ಮ ಮೊಬೈಲ್ ಸೇವಾ ಪೂರೈಕೆದಾರರ ನೆಟ್‌ವರ್ಕ್ ಲಭ್ಯವಿಲ್ಲದಿದ್ದರೆ ಮತ್ತೊಂದು ಕಂಪನಿಯ ನೆಟ್‌ವರ್ಕ್ ಬಳಸಬಹುದು. ತುರ್ತು ಸಂಪರ್ಕ ವ್ಯವಸ್ಥೆ ಬಲಪಡಿಸಲು 11 ‘ಸೆಲ್ ಆನ್ ವೀಲ್ಸ್’ ಘಟಕಗಳನ್ನು ನಿಯೋಜಿಸಲಾಗಿದೆ.
ಒಡಿಶಾದ ಗಂಜಾಂ, ಗಜಪತಿ ಮತ್ತು ಕಂಧಮಲ್ ಜಿಲ್ಲೆಗಳಲ್ಲಿ ಮಳೆ ಹಾಗೂ ಪ್ರವಾಹದ ಪ್ರಮಾಣ ಕಡಿಮೆಯಾಗುತ್ತಿದ್ದಂತೆ ಟೆಲಿಕಾಂ ಸೇವೆಗಳು ಸುಧಾರಿಸುತ್ತಿವೆ. ಉಳಿದ ನೆಟ್‌ವರ್ಕ್ ಕೇಂದ್ರಗಳ ಪುನಃಸ್ಥಾಪನೆ ಕಾರ್ಯ ಮುಂದುವರಿದಿದೆ ಎಂದು ಇಲಾಖೆ ತಿಳಿಸಿದೆ.
ಐಸಿಆರ್ ಸೌಲಭ್ಯ ಬಳಸುವುದು ಹೇಗೆ?
ಮೊಬೈಲ್ ಬಳಕೆದಾರರು ಫೋನ್ ಸೆಟ್ಟಿಂಗ್‌ಗಳಲ್ಲಿ ಸ್ವಯಂಚಾಲಿತ ನೆಟ್‌ವರ್ಕ್ ಆಯ್ಕೆಯನ್ನು ಸಕ್ರಿಯಗೊಳಿಸಬೇಕು. ಸಂಪರ್ಕ ದೊರೆಯದಿದ್ದರೆ ಮೊಬೈಲ್ ನೆಟ್‌ವರ್ಕ್ ಸೆಟ್ಟಿಂಗ್‌ಗಳಿಗೆ ತೆರಳಿ, ಲಭ್ಯವಿರುವ ಮತ್ತೊಂದು ನೆಟ್‌ವರ್ಕ್ ಅನ್ನು ಹಸ್ತಚಾಲಿತವಾಗಿ ಆಯ್ಕೆ ಮಾಡಬಹುದು. ಪರಿಹಾರ ಮತ್ತು ಪುನಃಸ್ಥಾಪನಾ ಕಾರ್ಯಾಚರಣೆಗಳಿಗೆ ಅಗತ್ಯವಾದ ತುರ್ತು ಸಂಪರ್ಕ ವ್ಯವಸ್ಥೆಗಳನ್ನು ನಿರ್ವಹಿಸಲಾಗುತ್ತಿದೆ ಎಂದು ದೂರಸಂಪರ್ಕ ಇಲಾಖೆ ತಿಳಿಸಿದೆ.
