ಧಾರ್: ಮಧ್ಯಪ್ರದೇಶದ ಧಾರ್ ಜಿಲ್ಲೆಯಲ್ಲಿ ಸೆಂಟ್ರಲ್ ಬ್ಯೂರೋ ಆಫ್ ನಾರ್ಕೋಟಿಕ್ಸ್ (ಸಿಬಿಎನ್) ಅಧಿಕಾರಿಗಳು 595.420 ಕೆ.ಜಿ. ಅಕ್ರಮ ಗಸಗಸೆ ಗಿಡದ ಪುಡಿಯನ್ನು ವಶಪಡಿಸಿಕೊಂಡು ಇಬ್ಬರನ್ನು ಬಂಧಿಸಿದ್ದಾರೆ.
ಖಚಿತ ಮಾಹಿತಿ ಆಧರಿಸಿ ಬದ್ನಾವರ್ ಬಳಿ ಪಂಜಾಬ್ ನೋಂದಣಿಯ ಟಾಟಾ ಟ್ರಕ್‌ನ್ನು ತಡೆದು ಪರಿಶೀಲಿಸಿದ ಅಧಿಕಾರಿಗಳು, ವಾಹನದ ನೆಲಭಾಗದಲ್ಲಿ ನಿರ್ಮಿಸಲಾಗಿದ್ದ ರಹಸ್ಯ ಕೊಠಡಿಯಲ್ಲಿ ಬಚ್ಚಿಟ್ಟಿದ್ದ 60 ಪ್ಲಾಸ್ಟಿಕ್ ಚೀಲಗಳನ್ನು ಪತ್ತೆಹಚ್ಚಿದ್ದಾರೆ.
ಮಾದಕ ವಸ್ತುಗಳ ಜೊತೆಗೆ ಟ್ರಕ್‌ನ್ನೂ ವಶಕ್ಕೆ ಪಡೆಯಲಾಗಿದೆ. ವಾಹನದಲ್ಲಿದ್ದ ಇಬ್ಬರನ್ನು ಎನ್‌ಡಿಪಿಎಸ್ ಕಾಯ್ದೆ-1985ರ ಸಂಬಂಧಿತ ಸೆಕ್ಷನ್‌ಗಳಡಿ ಬಂಧಿಸಲಾಗಿದೆ.
ವಶಪಡಿಸಿಕೊಂಡ ಮಾದಕ ವಸ್ತು ಎಲ್ಲಿಂದ ಬಂದಿತ್ತು ಮತ್ತು ಅದರ ಸಾಗಣೆ ಹಾಗೂ ವಿತರಣೆಯಲ್ಲಿ ಭಾಗಿಯಾಗಿರುವ ಜಾಲ ಯಾವುದು ಎಂಬ ಬಗ್ಗೆ ಸಿಬಿಎನ್‌ನ ಮಧ್ಯಪ್ರದೇಶ ಘಟಕ ತನಿಖೆ ಮುಂದುವರಿಸಿದೆ.
