ಬರ್ನ್ಪುರ (ಪಶ್ಚಿಮ ಬಂಗಾಳ): ಕೇಂದ್ರ ಉಕ್ಕು ಮತ್ತು ಭಾರೀ ಕೈಗಾರಿಕೆಗಳ ಸಚಿವ ಎಚ್.ಡಿ. ಕುಮಾರಸ್ವಾಮಿ ಅವರು ಬರ್ನ್ಪುರದ IISCO ಉಕ್ಕು ಸ್ಥಾವರದಲ್ಲಿ (ISP) 84,000 ಘನ ಮೀಟರ್ ಸಾಮರ್ಥ್ಯದ ಹೊಸ ಆರ್ಸಿಸಿ (RCC) ನೀರಿನ ಜಲಾಶಯವನ್ನು ಉದ್ಘಾಟಿಸಿದರು.
COB-10 ಯೋಜನೆಯ ನೀರಿನ ಅಗತ್ಯ ಪೂರೈಸುವುದರ ಜೊತೆಗೆ, 4.08 ಮಿಲಿಯನ್ ಟನ್ ಉತ್ಪಾದನಾ ಸಾಮರ್ಥ್ಯ (MTPA) ವಿಸ್ತರಣೆಗೆ ಬೆಂಬಲ ನೀಡುವ ಉದ್ದೇಶದಿಂದ ಈ ಜಲಾಶಯ ನಿರ್ಮಿಸಲಾಗಿದೆ. ಕ್ಲೋಸ್ಡ್-ಲೂಪ್ ವ್ಯವಸ್ಥೆಯ ಮೂಲಕ ನೀರಿನ ಸಂರಕ್ಷಣೆಯನ್ನೂ ಇದು ಉತ್ತೇಜಿಸಲಿದೆ.
ಭೇಟಿಯ ವೇಳೆ ಕುಮಾರಸ್ವಾಮಿ COB-12 ಕೋಕ್ ಓವನ್ ಬ್ಯಾಟರಿ, ಬ್ಲಾಸ್ಟ್ ಫರ್ನೇಸ್, ಸುಸ್ಥಿರತಾ ಯೋಜನೆಗಳು ಹಾಗೂ ಸ್ಥಾವರದ ವಿಸ್ತರಣಾ ಕಾಮಗಾರಿಗಳನ್ನು ಪರಿಶೀಲಿಸಿದರು. ಆತ್ಮನಿರ್ಭರ ಭಾರತ ಗುರಿ ಸಾಧನೆಗೆ ಆಧುನಿಕ ಹಾಗೂ ಪರಿಸರ ಸ್ನೇಹಿ ಉಕ್ಕು ಸ್ಥಾವರಗಳಲ್ಲಿ ಹೂಡಿಕೆ ಅಗತ್ಯವೆಂದು ಅವರು ಹೇಳಿದರು.
2025-26ನೇ ಹಣಕಾಸು ವರ್ಷದಲ್ಲಿ IISCO 2.9 ಮಿಲಿಯನ್ ಟನ್ ಹಾಟ್ ಮೆಟಲ್ ಉತ್ಪಾದಿಸಿದ್ದು, ಹಾಟ್ ಮೆಟಲ್ ಮತ್ತು ಕಚ್ಚಾ ಉಕ್ಕಿನ ಉತ್ಪಾದನಾ ಸಾಮರ್ಥ್ಯದ 108% ಹಾಗೂ ಮಾರಾಟಯೋಗ್ಯ ಉಕ್ಕಿನ ಸಾಮರ್ಥ್ಯದ 109% ಸಾಧಿಸಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು.
ಸ್ಥಾವರದ ಬಂಡವಾಳ ಹೂಡಿಕೆ ₹689 ಕೋಟಿಯಿಂದ ₹1,860 ಕೋಟಿಗೆ ಏರಿರುವುದನ್ನು ಹಾಗೂ ಎಂಎಸ್ಎಂಇ, ಎಸ್ಸಿ/ಎಸ್ಟಿ ಮತ್ತು ಮಹಿಳಾ ಉದ್ಯಮಿಗಳ ಪಾಲ್ಗೊಳ್ಳುವಿಕೆ ಹೆಚ್ಚಿರುವುದನ್ನು ಸಚಿವರು ಶ್ಲಾಘಿಸಿದರು. ಕಾರ್ಮಿಕರ ಸುರಕ್ಷತೆ, ಎಐ ಆಧಾರಿತ ತಂತ್ರಜ್ಞಾನ ಹಾಗೂ ಡಿಜಿಟಲ್ ವ್ಯವಸ್ಥೆಗಳ ಅಳವಡಿಕೆಯನ್ನೂ ಮೆಚ್ಚಿದರು.
ಪಶ್ಚಿಮ ಬಂಗಾಳದಲ್ಲಿ ಕೈಗಾರಿಕಾ ಅಭಿವೃದ್ಧಿ, ಹೂಡಿಕೆ ಮತ್ತು ಉದ್ಯೋಗಾವಕಾಶಗಳ ವೃದ್ಧಿಗೆ ಕೇಂದ್ರ-ರಾಜ್ಯ ಸಮನ್ವಯ ಅಗತ್ಯ ಎಂದು ಅವರು ಅಭಿಪ್ರಾಯಪಟ್ಟರು. IISCO ಸ್ಥಾವರವು ಭವಿಷ್ಯದಲ್ಲಿ ಭಾರತದ ಪ್ರಮುಖ ಉಕ್ಕು ಉತ್ಪಾದನಾ ಕೇಂದ್ರಗಳಲ್ಲಿ ಒಂದಾಗಿ ಹೊರಹೊಮ್ಮಲಿದೆ ಎಂಬ ವಿಶ್ವಾಸವನ್ನೂ ವ್ಯಕ್ತಪಡಿಸಿದರು.
