ಬೀಜಿಂಗ್: ಚೀನಾ ಮತ್ತು ಅಮೆರಿಕ ಪರಸ್ಪರ ಪ್ರತಿಸ್ಪರ್ಧಿಗಳಾಗುವ ಬದಲು ಪಾಲುದಾರರಾಗಿ ಮುನ್ನಡೆಯಬೇಕು ಎಂದು ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಹೇಳಿದ್ದಾರೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರೊಂದಿಗೆ ಮಹತ್ವದ ದ್ವಿಪಕ್ಷೀಯ ಮಾತುಕತೆ ನಡೆಸಲು ವಾಷಿಂಗ್ಟನ್ ಡಿ.ಸಿ.ಗೆ ಆಗಮಿಸಿದ ಬೆನ್ನಲ್ಲೇ ಕ್ಸಿ ಅವರ ಈ ಹೇಳಿಕೆ ಹೊರಬಿದ್ದಿದೆ. ಚೀನಾದ ಸರ್ಕಾರಿ ಸುದ್ದಿ ಸಂಸ್ಥೆ ‘ಕ್ಸಿನ್ಹುವಾ’ ಕ್ಸಿ ಅವರ ಹೇಳಿಕೆಯನ್ನು ಪ್ರಕಟಿಸಿದೆ.
ಚೀನಾ ಮತ್ತು ಅಮೆರಿಕದ ಜನರ ನಡುವೆ ದೀರ್ಘಕಾಲದಿಂದ ಸ್ನೇಹಪರ ವಿನಿಮಯವಿದೆ. ಎರಡೂ ದೇಶಗಳ ಹಿತಾಸಕ್ತಿಗಳು ಪರಸ್ಪರ ಆಳವಾಗಿ ಬೆಸೆದುಕೊಂಡಿವೆ. ಹೀಗಾಗಿ ಎರಡೂ ರಾಷ್ಟ್ರಗಳು ಪ್ರತಿಸ್ಪರ್ಧಿಗಳಾಗುವ ಬದಲು ಪಾಲುದಾರರಾಗಿ ಮುನ್ನಡೆಯಬೇಕು ಎಂದು ಕ್ಸಿ ಹೇಳಿದ್ದಾರೆ.
ಟ್ರಂಪ್ ಅವರೊಂದಿಗೆ ದ್ವಿಪಕ್ಷೀಯ ಸಂಬಂಧಗಳು ಹಾಗೂ ಜಾಗತಿಕ ಪರಿಸ್ಥಿತಿಗೆ ಸಂಬಂಧಿಸಿದ ಪ್ರಮುಖ ವಿಚಾರಗಳ ಕುರಿತು ಆಳವಾದ ಚರ್ಚೆ ನಡೆಸಲು ಎದುರು ನೋಡುತ್ತಿರುವುದಾಗಿ ಅವರು ತಿಳಿಸಿದ್ದಾರೆ.
ಉಭಯ ರಾಷ್ಟ್ರಗಳು ಪರಸ್ಪರ ಹತ್ತಿರವಾಗಲು ಪ್ರಯತ್ನಿಸಬೇಕು. ಸಹಕಾರಕ್ಕೆ ಆದ್ಯತೆ ನೀಡಬೇಕು. ಮಿತಿಯೊಳಗಿನ ಸ್ಪರ್ಧೆ ಹೊಂದುವುದರ ಜೊತೆಗೆ ಭಿನ್ನಾಭಿಪ್ರಾಯಗಳನ್ನು ನಿಯಂತ್ರಣದಲ್ಲಿಟ್ಟುಕೊಂಡು ಸ್ಥಿರ ಸಂಬಂಧವನ್ನು ನಿರ್ಮಿಸಬೇಕು ಎಂದು ಕ್ಸಿ ಪ್ರತಿಪಾದಿಸಿದ್ದಾರೆ.
ಅಮೆರಿಕವನ್ನು ಮತ್ತೆ ಶ್ರೇಷ್ಠಗೊಳಿಸುವ ಟ್ರಂಪ್ ಅವರ ಗುರಿ ಹಾಗೂ ಚೀನಾದ ಮಹಾನ್ ಪುನರುತ್ಥಾನದ ಗುರಿ ಪರಸ್ಪರ ಕೈಜೋಡಿಸಿ ಸಾಗಬಹುದು ಎಂದು ಕ್ಸಿ ಹೇಳಿದ್ದಾರೆ. ಎರಡು ಪ್ರಮುಖ ಶಕ್ತಿಗಳು ಶಾಂತಿಯುತವಾಗಿ ಸಹಬಾಳ್ವೆ ನಡೆಸಲು ಸೂಕ್ತ ಮಾರ್ಗವನ್ನು ರೂಪಿಸಬೇಕಿದೆ ಎಂದು ಅವರು ತಿಳಿಸಿದ್ದಾರೆ.
“ನಾವು ಇದನ್ನು ಸಾಧಿಸಬಹುದು ಎಂಬ ವಿಶ್ವಾಸವಿದೆ. ಎರಡೂ ದೇಶಗಳ ಜಂಟಿ ಪ್ರಯತ್ನದಿಂದ ಈ ಭೇಟಿ ಫಲಪ್ರದ ಫಲಿತಾಂಶ ನೀಡಲಿದೆ. ಇದು ಎರಡೂ ದೇಶಗಳ ಜನರ ಕಲ್ಯಾಣ ಹೆಚ್ಚಿಸುವುದರ ಜತೆಗೆ ವಿಶ್ವ ಶಾಂತಿಗೆ ಹೊಸ ಭರವಸೆ ತರಲಿದೆ” ಎಂದು ಕ್ಸಿ ಹೇಳಿದ್ದಾರೆ.
ಟ್ರಂಪ್-ಕ್ಸಿ ನಡುವಿನ ಮಹತ್ವದ ಮಾತುಕತೆಗೆ ಮುನ್ನ ಈ ಹೇಳಿಕೆ ಹೊರಬಿದ್ದಿದೆ. ವಾಷಿಂಗ್ಟನ್ಗೆ ಆಗಮಿಸಿದ ಕ್ಸಿ ಅವರನ್ನು ಟ್ರಂಪ್ ಸ್ವಾಗತಿಸಿದ್ದು, ಇಬ್ಬರೂ ನಾಯಕರು ಪರಸ್ಪರ ಹಸ್ತಲಾಘವ ಮಾಡಿದರು.
ಮಾತುಕತೆಯಲ್ಲಿ ವ್ಯಾಪಾರ, ತಂತ್ರಜ್ಞಾನ ಕ್ಷೇತ್ರದ ಪೈಪೋಟಿ, ವಿಶೇಷವಾಗಿ ಕೃತಕ ಬುದ್ಧಿಮತ್ತೆ (AI), ಹಾಗೂ ಇರಾನ್ಗೆ ಚೀನಾ ನೀಡುತ್ತಿರುವ ರಾಜತಾಂತ್ರಿಕ ಮತ್ತು ಆರ್ಥಿಕ ಬೆಂಬಲ ಸೇರಿದಂತೆ ಹಲವು ಪ್ರಮುಖ ವಿಚಾರಗಳು ಚರ್ಚೆಯಾಗುವ ನಿರೀಕ್ಷೆಯಿದೆ.ಅಮೆರಿಕದೊಂದಿಗೆ ಸಹಕಾರಕ್ಕೆ ಚೀನಾ ಒತ್ತು; ಟ್ರಂಪ್ಗೆ ಕ್ಸಿ ಜಿನ್ಪಿಂಗ್ ಸಂದೇಶ
