ನವದೆಹಲಿ: ಸರ್ಕಾರದ ಮುಖ್ಯಸ್ಥರಾಗಿ ನಿರಂತರ 25 ವರ್ಷಗಳ ನಾಯಕತ್ವ ಪೂರ್ಣಗೊಳಿಸಿದ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಅಭಿನಂದಿಸಿ ಕೇಂದ್ರ ಸಚಿವ ಸಂಪುಟ ಮಂಗಳವಾರ ನಿರ್ಣಯ ಅಂಗೀಕರಿಸಿದೆ.
ಗುಜರಾತ್‌ನಿಂದ ರಾಷ್ಟ್ರೀಯ ರಾಜಕೀಯದವರೆಗೆ ಮೋದಿ ಅವರ ಪಯಣವನ್ನು ಸ್ಮರಿಸಿರುವ ನಿರ್ಣಯವು, ಅವರ ನಾಯಕತ್ವವು ‘ರಾಷ್ಟ್ರವೇ ಮೊದಲು’ ಮತ್ತು ‘ನಾಗರಿಕರೇ ಮೊದಲು’ ಎಂಬ ತತ್ವಗಳಿಂದ ಮಾರ್ಗದರ್ಶಿತವಾಗಿದೆ ಎಂದು ಬಣ್ಣಿಸಿದೆ. ಗುಜರಾತ್‌ನಲ್ಲಿ ಸತತ ಮೂರು ಅವಧಿಯ ಜನಾದೇಶ ಹಾಗೂ ಸತತ ಮೂರು ಲೋಕಸಭಾ ಚುನಾವಣೆಗಳಲ್ಲಿನ ಗೆಲುವುಗಳನ್ನು ಸಾರ್ವಜನಿಕ ಬೆಂಬಲದ ಪ್ರಮುಖ ಸೂಚಕಗಳಾಗಿ ಉಲ್ಲೇಖಿಸಲಾಗಿದೆ.
ಮೋದಿ ಅವರ 25 ವರ್ಷಗಳ ನಾಯಕತ್ವದ 10 ಪ್ರಮುಖ ಅಂಶಗಳನ್ನು ನಿರ್ಣಯದಲ್ಲಿ ಪ್ರಸ್ತಾಪಿಸಲಾಗಿದೆ. ಗುಜರಾತ್‌ನಲ್ಲಿ ಜಾರಿಗೆ ತಂದ ‘ಸ್ವಾಗತ್’ ಮತ್ತು ‘ಜ್ಯೋತಿಗ್ರಾಮ್’ ಯೋಜನೆಗಳು ನಂತರ ರಾಷ್ಟ್ರೀಯ ಮಟ್ಟದಲ್ಲೂ ಅಳವಡಿಕೆಯಾಗಿರುವುದನ್ನು ಉಲ್ಲೇಖಿಸಲಾಗಿದೆ.
ಕಲ್ಯಾಣ ಕ್ರಮಗಳಡಿ ಸುಮಾರು 60 ಕೋಟಿ ಜನಧನ್ ಖಾತೆಗಳು, ನಾಲ್ಕು ಕೋಟಿಗೂ ಅಧಿಕ ಮನೆಗಳ ನಿರ್ಮಾಣ, ಸುಮಾರು 3.5 ಕೋಟಿ ‘ಲಖ್ಪತಿ ದೀದಿ’ಗಳು ಹಾಗೂ ‘ನಾರಿ ಶಕ್ತಿ ವಂದನ್ ಅಧಿನಿಯಮ’ವನ್ನು ನಿರ್ಣಯ ಗುರುತಿಸಿದೆ. ಪಿಎಂ-ಕಿಸಾನ್ ಅಡಿ ₹4 ಲಕ್ಷ ಕೋಟಿಗೂ ಅಧಿಕ ವರ್ಗಾವಣೆ ಮತ್ತು ಪಿಎಂ-ಜನ್ಮನ್ ಯೋಜನೆಯನ್ನೂ ಉಲ್ಲೇಖಿಸಲಾಗಿದೆ.
ಆರ್ಥಿಕ ಸುಧಾರಣೆಗಳಲ್ಲಿ ಜಿಎಸ್‌ಟಿ, ಕಲ್ಯಾಣ ಯೋಜನೆಗಳ ವಿತರಣಾ ಸುಧಾರಣೆ, ಸಾರ್ವಜನಿಕ ಬಂಡವಾಳ ವೆಚ್ಚದ ಹೆಚ್ಚಳ, ಹೆದ್ದಾರಿ ವಿಸ್ತರಣೆ, ರೈಲ್ವೆ ವಿದ್ಯುದ್ದೀಕರಣ, ಎಲೆಕ್ಟ್ರಾನಿಕ್ಸ್, ರಕ್ಷಣಾ ಹಾಗೂ ಸೆಮಿಕಂಡಕ್ಟರ್ ಉತ್ಪಾದನೆಗೆ ಒತ್ತು ನೀಡಿರುವುದನ್ನು ನಿರ್ಣಯ ದಾಖಲಿಸಿದೆ.
ಯುಪಿಐ, ಕೋವಿಡ್ ಲಸಿಕೆ ಅಭಿವೃದ್ಧಿ ಮತ್ತು ಚಂದ್ರಯಾನ-3ರ ಯಶಸ್ಸನ್ನು ತಂತ್ರಜ್ಞಾನ ಹಾಗೂ ವೈಜ್ಞಾನಿಕ ಪ್ರಗತಿಯ ಉದಾಹರಣೆಗಳಾಗಿ ಉಲ್ಲೇಖಿಸಲಾಗಿದೆ.
ರಾಷ್ಟ್ರೀಯ ಭದ್ರತೆ, ವಿಧಿ 370ರ ರದ್ದು, ವಿದೇಶಾಂಗ ನೀತಿಯಲ್ಲಿ ಜಿ20, ಬ್ರಿಕ್ಸ್ ಹಾಗೂ ‘ಗ್ಲೋಬಲ್ ಸೌತ್’ಗೆ ಭಾರತದ ಕೊಡುಗೆಯನ್ನೂ ನಿರ್ಣಯದಲ್ಲಿ ಪ್ರಸ್ತಾಪಿಸಲಾಗಿದೆ. 2047ರ ವೇಳೆಗೆ ಸಮೃದ್ಧ, ಸ್ವಾವಲಂಬಿ ಹಾಗೂ ಅಭಿವೃದ್ಧಿ ಹೊಂದಿದ ಭಾರತದ ಗುರಿಯನ್ನು ಪುನರುಚ್ಚರಿಸುವ ಮೂಲಕ ನಿರ್ಣಯ ಮುಕ್ತಾಯಗೊಂಡಿದೆ.
