ನವದೆಹಲಿ: ಅಖಿಲ ಭಾರತ ಆಯುರ್ವೇದ ಸಂಸ್ಥೆ (AIIA) 2026-27ನೇ ಶೈಕ್ಷಣಿಕ ಸಾಲಿಗೆ ‘ಗರ್ಭಿಣಿ ಮಿತ್ರ’ ಆರು ತಿಂಗಳ ಕೋರ್ಸ್ ಆರಂಭಿಸಿದೆ. ಗರ್ಭಾವಸ್ಥೆ ಮತ್ತು ಪ್ರಸವೋತ್ತರ ಅವಧಿಯಲ್ಲಿ ಮಹಿಳೆಯರಿಗೆ ಆರೋಗ್ಯ ಶಿಕ್ಷಣ, ಜೀವನಶೈಲಿ ಮಾರ್ಗದರ್ಶನ ಹಾಗೂ ಸಮುದಾಯ ಮಟ್ಟದ ಬೆಂಬಲ ಒದಗಿಸಲು ಸಿಬ್ಬಂದಿಯನ್ನು ತರಬೇತುಗೊಳಿಸುವುದು ಕೋರ್ಸ್ನ ಉದ್ದೇಶವಾಗಿದೆ.
ದೆಹಲಿಯ ಸರಿತಾ ವಿಹಾರ್ ಕ್ಯಾಂಪಸ್ನಲ್ಲಿ ನಡೆಯುವ ಈ ಆಫ್ಲೈನ್ ಕೋರ್ಸ್ನಲ್ಲಿ ಗರ್ಭಿಣಿ ಪರಿಚರ್ಯೆ, ಸೂತಿಕಾ ಪರಿಚರ್ಯೆ ಹಾಗೂ ಗರ್ಭಾಧಾನ ವಿಧಿ ಸೇರಿದಂತೆ ಆಯುರ್ವೇದದ ಪರಿಕಲ್ಪನೆಗಳ ಕುರಿತು ತರಬೇತಿ ನೀಡಲಾಗುತ್ತದೆ.
ಕೋರ್ಸ್ ಸೋಮವಾರದಿಂದ ಶುಕ್ರವಾರದವರೆಗೆ ಮಧ್ಯಾಹ್ನ 3ರಿಂದ ಸಂಜೆ 5ರವರೆಗೆ ನಡೆಯಲಿದೆ. ತ್ರೈಮಾಸಿಕಕ್ಕೆ ಅನುಗುಣವಾದ ಆಹಾರ ಪದ್ಧತಿ, ಜೀವನಶೈಲಿ, ಗರ್ಭಾವಸ್ಥೆಯಲ್ಲಿ ಸುರಕ್ಷಿತ ಯೋಗ, ಹೆರಿಗೆಯ ಸಂದರ್ಭದಲ್ಲಿ ಭಾವನಾತ್ಮಕ ಬೆಂಬಲ, ನವಜಾತ ಶಿಶು ಮಸಾಜ್ ಹಾಗೂ ಮೂಲಭೂತ ಜೀವ ರಕ್ಷಕ ಕ್ರಮಗಳ ಕುರಿತು ಪ್ರಾಯೋಗಿಕ ತರಬೇತಿ ನೀಡಲಾಗುತ್ತದೆ.
ಇದರ ಜೊತೆಗೆ ಸೋಂಕು ನಿಯಂತ್ರಣ, ನೈರ್ಮಲ್ಯ, ಬಯೋಮೆಡಿಕಲ್ ತ್ಯಾಜ್ಯ ನಿರ್ವಹಣೆ ಮತ್ತು ಕಾರ್ಯಸ್ಥಳದ ಸುರಕ್ಷತೆಯನ್ನೂ ಪಠ್ಯಕ್ರಮದಲ್ಲಿ ಸೇರಿಸಲಾಗಿದೆ. ಪ್ರತಿ ಬ್ಯಾಚ್ಗೆ 20 ಸೀಟುಗಳು ಇರಲಿವೆ.
ಮಾನ್ಯತೆ ಪಡೆದ ಮಂಡಳಿಯಿಂದ 12ನೇ ತರಗತಿ ಪೂರ್ಣಗೊಳಿಸಿರುವ ಹಾಗೂ ಕನಿಷ್ಠ 18 ವರ್ಷ ವಯಸ್ಸಿನವರು ಅರ್ಜಿ ಸಲ್ಲಿಸಬಹುದು. ಫಲಿತಾಂಶಕ್ಕಾಗಿ ಕಾಯುತ್ತಿರುವ ವಿದ್ಯಾರ್ಥಿಗಳಿಗೂ ತಾತ್ಕಾಲಿಕ ಅರ್ಜಿಗೆ ಅವಕಾಶವಿದೆ.
ಕೋರ್ಸ್ ಪೂರ್ಣಗೊಳಿಸಿದವರು ಆಯುಷ್ ಕೇಂದ್ರಗಳು, ಮಾತೃತ್ವ ಚಿಕಿತ್ಸಾಲಯಗಳು, ಎನ್ಜಿಒಗಳು ಹಾಗೂ ಸಮುದಾಯ ಆರೋಗ್ಯ ಯೋಜನೆಗಳಲ್ಲಿ ತಾಯಿಯ ಆರೋಗ್ಯ ಬೆಂಬಲ ಕಾರ್ಯಕರ್ತರಾಗಿ ಕೆಲಸ ಮಾಡಬಹುದು.
ಆದರೆ, ಈ ತರಬೇತಿ ವೈದ್ಯಕೀಯ ಪ್ರಸವಪೂರ್ವ ಆರೈಕೆಗೆ ಪರ್ಯಾಯವಲ್ಲ ಎಂದು AIIA ಸ್ಪಷ್ಟಪಡಿಸಿದೆ. ವೈದ್ಯಕೀಯ ತಪಾಸಣೆ, ಅಗತ್ಯ ಪರೀಕ್ಷೆಗಳು ಹಾಗೂ ರಕ್ತದೊತ್ತಡ ಮತ್ತು ಹಿಮೋಗ್ಲೋಬಿನ್ ಮೇಲ್ವಿಚಾರಣೆ ಮುಂದುವರಿಯಬೇಕು. ಅರ್ಜಿ ಸಲ್ಲಿಸಲು ಆಗಸ್ಟ್ 31, 2026 ಕೊನೆಯ ದಿನವಾಗಿದೆ.
