ನವದೆಹಲಿ: ಪ್ರಧಾನ ಮಂತ್ರಿ ಉದ್ಯೋಗ ಸೃಷ್ಟಿ ಕಾರ್ಯಕ್ರಮದ (PMEGP) ಅಡಿಯಲ್ಲಿ 2014-15ರಿಂದ ಈವರೆಗೆ ದೇಶದ ಸುಮಾರು 8.12 ಲಕ್ಷ ಸೂಕ್ಷ್ಮ ಉದ್ಯಮಿಗಳಿಗೆ ₹24,398.61 ಕೋಟಿ ಮೊತ್ತದ ಮಾರ್ಜಿನ್ ಮನಿ ಸಬ್ಸಿಡಿ ಒದಗಿಸಲಾಗಿದೆ. ಈ ಯೋಜನೆಯಡಿ ಅಂದಾಜು 73.08 ಲಕ್ಷ ಉದ್ಯೋಗಾವಕಾಶಗಳು ಸೃಷ್ಟಿಯಾಗಿವೆ ಎಂದು ಕೇಂದ್ರ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳ ಸಚಿವಾಲಯ (MSME) ತಿಳಿಸಿದೆ.
ಖಾದಿ ಮತ್ತು ಗ್ರಾಮೋದ್ಯೋಗ ಆಯೋಗ (KVIC) ಅನುಷ್ಠಾನಗೊಳಿಸುತ್ತಿರುವ PMEGP ಯೋಜನೆಯು ಕೃಷಿಯೇತರ ವಲಯದಲ್ಲಿ, ವಿಶೇಷವಾಗಿ ಗ್ರಾಮೀಣ ಮತ್ತು ಅರೆನಗರ ಪ್ರದೇಶಗಳಲ್ಲಿ ಹೊಸ ಸೂಕ್ಷ್ಮ ಉದ್ಯಮಗಳ ಸ್ಥಾಪನೆಗೆ ನೆರವಾಗುತ್ತಿದೆ. ಬ್ಯಾಂಕ್‌ಗಳು ಮಂಜೂರು ಮಾಡುವ ಸಾಲಗಳಿಗೆ ಮಾರ್ಜಿನ್ ಮನಿ ಸಬ್ಸಿಡಿ ರೂಪದಲ್ಲಿ ಆರ್ಥಿಕ ನೆರವು ನೀಡುವ ಮೂಲಕ ಸ್ವಯಂ ಉದ್ಯೋಗ ಹಾಗೂ ಉದ್ಯಮಶೀಲತೆಯನ್ನು ಉತ್ತೇಜಿಸುವುದು ಯೋಜನೆಯ ಪ್ರಮುಖ ಉದ್ದೇಶವಾಗಿದೆ.
ಮೊದಲ ತಲೆಮಾರಿನ ಉದ್ಯಮಿಗಳಿಗೆ ಬೆಂಬಲ ನೀಡುವುದರ ಜತೆಗೆ, ಉದ್ಯೋಗಾಕಾಂಕ್ಷಿಗಳು ಉದ್ಯೋಗ ಸೃಷ್ಟಿಕರ್ತರಾಗಿ ಬೆಳೆಯಲು ಈ ಯೋಜನೆ ಅವಕಾಶ ಕಲ್ಪಿಸುತ್ತಿದೆ. ಹಿಮಾಚಲ ಪ್ರದೇಶ ಮತ್ತು ಪಂಜಾಬ್‌ನ ಫಲಾನುಭವಿ ಉದ್ಯಮಗಳ ಬೆಳವಣಿಗೆಯನ್ನು ಸಚಿವಾಲಯವು ಯೋಜನೆಯ ಪ್ರಭಾವಕ್ಕೆ ಉದಾಹರಣೆಯಾಗಿ ಉಲ್ಲೇಖಿಸಿದೆ.
ಹಿಮಾಚಲ ಪ್ರದೇಶದ ಪರ್ವನೂನಲ್ಲಿ ಪೂಜಾ ಶರ್ಮಾ ಸ್ಥಾಪಿಸಿದ ‘ಸ್ಕಿನ್‌ಕಾಂತಿ ಆಯುರ್ವೇದ’ ಸಂಸ್ಥೆಯು ₹25 ಲಕ್ಷ ಯೋಜನಾ ವೆಚ್ಚದೊಂದಿಗೆ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ಆರ್ಥಿಕ ನೆರವಿನ ಮೂಲಕ ಆರಂಭಗೊಂಡಿತ್ತು. ಕೈಯಿಂದ ತಯಾರಿಸಿದ ಸಾಬೂನುಗಳ ಉತ್ಪಾದನೆಯಲ್ಲಿ ತೊಡಗಿರುವ ಈ ಸಂಸ್ಥೆಯು ಇದೀಗ ವಾರ್ಷಿಕ ₹30 ಕೋಟಿ ವಹಿವಾಟು ನಡೆಸುವ ಉದ್ಯಮವಾಗಿ ಬೆಳೆದಿದೆ.
ಪ್ರಸ್ತುತ 300 ಮಂದಿಗೆ ಉದ್ಯೋಗ ನೀಡಿರುವ ಸಂಸ್ಥೆಯಲ್ಲಿ ಶೇ.95ರಷ್ಟು ಮಹಿಳೆಯರಿದ್ದಾರೆ. ಆಯುರ್ವೇದ ತತ್ವಗಳನ್ನು ಆಧುನಿಕ ಉತ್ಪಾದನಾ ತಂತ್ರಜ್ಞಾನದೊಂದಿಗೆ ಸಂಯೋಜಿಸಿರುವ ಕಂಪನಿಯು, ದೇಶಾದ್ಯಂತ ಚಿಲ್ಲರೆ ಮತ್ತು ಸಾಂಸ್ಥಿಕ ಮಾರಾಟ ಜಾಲಗಳ ಮೂಲಕ ಉತ್ಪನ್ನಗಳನ್ನು ಪೂರೈಸುತ್ತಿದೆ.
ಪಂಜಾಬ್‌ನ ಮೊಹಾಲಿಯಲ್ಲಿ ಸುರೇಂದರ್ ಪಾಲ್ ಸಿಂಗ್ ನಾಗಿ ಸ್ಥಾಪಿಸಿದ ‘ಎಂ/ಎಸ್ ಎಸ್ ಪೀ ಕ್ವಾಲಿಟಿ ಪ್ರಾಡಕ್ಟ್ಸ್’ ಸಂಸ್ಥೆಯು ಬ್ಯಾಂಕ್ ಆಫ್ ಬರೋಡಾದ ನೆರವಿನೊಂದಿಗೆ ₹21 ಲಕ್ಷ ಯೋಜನಾ ವೆಚ್ಚದಲ್ಲಿ ಕಾರ್ಯಾರಂಭ ಮಾಡಿತ್ತು.
ಜೇನುತುಪ್ಪ, ಕುಕೀಸ್ ಮತ್ತು ಹಣ್ಣಿನ ಜಾಮ್‌ಗಳನ್ನು ಉತ್ಪಾದಿಸುವ ಈ ಆಹಾರ ಸಂಸ್ಕರಣಾ ಘಟಕವು ವಾರ್ಷಿಕ ₹38 ಕೋಟಿ ವಹಿವಾಟು ನಡೆಸುವ ಉದ್ಯಮವಾಗಿ ವಿಸ್ತರಿಸಿದೆ. ಸುಮಾರು 130 ಮಂದಿಗೆ ಉದ್ಯೋಗ ಒದಗಿಸಿರುವ ಸಂಸ್ಥೆಯು ಅಮೆರಿಕ, ಆಸ್ಟ್ರೇಲಿಯಾ ಮತ್ತು ಫ್ರಾನ್ಸ್ ಸೇರಿದಂತೆ 26 ದೇಶಗಳಿಗೆ ತನ್ನ ಉತ್ಪನ್ನಗಳನ್ನು ರಫ್ತು ಮಾಡುತ್ತಿದೆ. ಅಂತರರಾಷ್ಟ್ರೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟದ ಮಾನದಂಡಗಳನ್ನು ಪಾಲಿಸುವುದನ್ನು ಸೂಚಿಸುವ ‘AA+ BRCGS’ ಪ್ರಮಾಣೀಕರಣವನ್ನೂ ಸಂಸ್ಥೆ ಪಡೆದುಕೊಂಡಿದೆ.
