139 ವರ್ಷಗಳ ಸುಶಾಂತಿ ನಿಲಯದ ನವೀಕೃತ ಸಮುದಾಯ ಭವನ ಲೋಕಾರ್ಪಣೆ; ಜೋನಾಸ್ ಕುಟುಂಬದಿಂದ ಪರಂಪರೆಯ ಮರುಸೃಷ್ಟಿ: ಡಾ. ಡೆಕ್ಸ್ಟರ್ ಎಸ್. ಮಾಬೆನ್
ಮಂಗಳೂರು: ನಗರದ ಮರ್ಕೇರಾ ಹಿಲ್ನಲ್ಲಿರುವ 139 ವರ್ಷಗಳ ಇತಿಹಾಸ ಹೊಂದಿರುವ ಸುಶಾಂತಿ ನಿಲಯದ ಐತಿಹಾಸಿಕ ಸಭಾಂಗಣವನ್ನು ನವೀಕರಿಸಿ ಸುಸಜ್ಜಿತ ಸಮುದಾಯ ಭವನವನ್ನಾಗಿ ಪರಿವರ್ತಿಸಿರುವುದು, ಜೋನಾಸ್ ಕುಟುಂಬದ ಪೋಷಕರ ಸ್ಮರಣೆಗೆ ಸಲ್ಲಿಸಿದ ಗೌರವದ ಜತೆಗೆ ಸಮುದಾಯದ ಪರಂಪರೆಯ ಮರುಸೃಷ್ಟಿಯಾಗಿದೆ ಎಂದು ಬೆಂಗಳೂರಿನ ಸಿ.ಎಸ್.ಐ. ಡೇವಿಡ್ ಮೆಮೋರಿಯಲ್ ಚರ್ಚ್ನ ಮುಖ್ಯಸ್ಥ ಡಾ. ಡೆಕ್ಸ್ಟರ್ ಎಸ್. ಮಾಬೆನ್ ಹೇಳಿದರು.
ಜೋನಾಸ್ ಪೆಟ್ರೋ ಪ್ರಾಡಕ್ಟ್ಸ್ ಪ್ರೈವೇಟ್ ಲಿಮಿಟೆಡ್ನ ಸುನಿಲ್ ಜೋನಾಸ್ ಅವರ ಕುಟುಂಬವು ತಮ್ಮ ಪೋಷಕರಾದ ದಿವಂಗತ ಸೆಬಾಸ್ಟಿಯನ್ ಎಲಿಯಾ ಜೋನಸ್ ಹಾಗೂ ವಿ. ಸುಲೋಚನಿ ಜೋನಸ್ ಅವರ ಸ್ಮರಣಾರ್ಥ ನವೀಕರಿಸಿದ ಸುಶಾಂತಿ ನಿಲಯದ ಸಮುದಾಯ ಭವನದ ಲೋಕಾರ್ಪಣೆ ಸಮಾರಂಭದಲ್ಲಿ ಅವರು ಮುಖ್ಯ ಅತಿಥಿಯಾಗಿ ಮಾತನಾಡಿದರು.
1834ರಲ್ಲಿ ನಿರ್ಮಾಣಗೊಂಡಿದ್ದ ಈ ಐತಿಹಾಸಿಕ ಕಟ್ಟಡವು ಹಲವು ದಶಕಗಳ ಕಾಲ ಶಾಲೆ, ಪ್ರಾರ್ಥನಾ ಮಂದಿರ ಹಾಗೂ ಧರ್ಮಗುರುಗಳ ನಿವಾಸವಾಗಿ ಸೇವೆ ಸಲ್ಲಿಸಿತ್ತು. ಕಾಲಕ್ರಮೇಣ ಬಳಕೆಯಿಲ್ಲದೆ ಶಿಥಿಲಾವಸ್ಥೆಗೆ ತಲುಪಿದ್ದ ಕಟ್ಟಡವನ್ನು ಜೋನಾಸ್ ಪೆಟ್ರೋ ಪ್ರಾಡಕ್ಟ್ಸ್ ಪ್ರೈವೇಟ್ ಲಿಮಿಟೆಡ್ ಆಧುನಿಕ ಸೌಲಭ್ಯಗಳೊಂದಿಗೆ ನವೀಕರಿಸಿರುವುದು ಸಂತಸದ ಸಂಗತಿ ಎಂದು ಡಾ. ಮಾಬೆನ್ ಹೇಳಿದರು.
ಧರ್ಮಪ್ರಾಂತ್ಯ ಅಥವಾ ಸ್ಥಳೀಯ ಚರ್ಚ್ನಲ್ಲಿ ಯಾವುದೇ ಅಧಿಕೃತ ಹುದ್ದೆ ಹೊಂದಿರದಿದ್ದರೂ, ಸುನಿಲ್ ಜೋನಾಸ್ ಅವರು ಯಾವುದೇ ಪ್ರತಿಫಲದ ನಿರೀಕ್ಷೆಯಿಲ್ಲದೆ ಉದಾರವಾಗಿ ದೇಣಿಗೆ ನೀಡಿ ಐತಿಹಾಸಿಕ ಕಟ್ಟಡದ ಪುನರ್ನಿರ್ಮಾಣಕ್ಕೆ ನೆರವಾಗಿರುವುದು ವಿಶೇಷ. ಅವರ ನಿಸ್ವಾರ್ಥ ಸೇವೆ ಶ್ಲಾಘನೀಯ ಎಂದು ಅವರು ಹೇಳಿದರು.
ಹಲವು ತಲೆಮಾರುಗಳ ನಂಬಿಕೆಯ ಸಂಕೇತ
ಉಡುಪಿ ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಗಳ ಬಿಷಪ್, ಧರ್ಮಗುರುಗಳು ಮತ್ತು ಸಾರ್ವಜನಿಕರ ಸಮ್ಮುಖದಲ್ಲಿ ವಿಶೇಷ ಪ್ರಾರ್ಥನೆಯೊಂದಿಗೆ ನವೀಕೃತ ಸಮುದಾಯ ಭವನವನ್ನು ಲೋಕಾರ್ಪಣೆ ಮಾಡಲಾಯಿತು.
ದಕ್ಷಿಣ ಭಾರತ ಚರ್ಚ್ನ (CSI KSD) ಕರ್ನಾಟಕ ದಕ್ಷಿಣ ಧರ್ಮಪ್ರಾಂತ್ಯದ ಬಿಷಪ್ ರೆ. ಹೇಮಚಂದ್ರ ಕುಮಾರ್ ಪ್ರಾರ್ಥನಾ ವಿಧಿ ನೆರವೇರಿಸಿದರು. ಮಾತನಾಡಿದ ಅವರು, ಸುಶಾಂತಿ ನಿಲಯ ಕೇವಲ ಇಟ್ಟಿಗೆಗಳಿಂದ ನಿರ್ಮಿಸಲಾದ ಕಟ್ಟಡವಲ್ಲ. ಹಲವು ತಲೆಮಾರುಗಳ ಅಚಲ ನಂಬಿಕೆ, ಸೇವೆ ಮತ್ತು ಪರಂಪರೆಗೆ ಸಾಕ್ಷಿಯಾಗಿರುವ ಐತಿಹಾಸಿಕ ತಾಣವಾಗಿದೆ ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಸುಶಾಂತಿ ನಿಲಯದ ಸಭಾಪಾಲಕ ರೆ. ಸಂತೋಷ್ ಕುಮಾರ್ ಸಿಂಗ್, ಸುನಿಲ್ ಜೋನಾಸ್, ಸಂಧ್ಯಾ ಜೋನಾಸ್ ಹಾಗೂ ಕುಟುಂಬಸ್ಥರು ಸೇರಿದಂತೆ ಹಲವು ಗಣ್ಯರು ಮತ್ತು ಸಾರ್ವಜನಿಕರು ಉಪಸ್ಥಿತರಿದ್ದರು.
