ನಗೋಯಾ: ಏಷ್ಯನ್ ಗೇಮ್ಸ್‌ನ ಪುರುಷರ ಸೆಪಾಕ್ ಟಕ್ರಾ ಕ್ವಾಡ್ರಾಂಟ್ ವಿಭಾಗದಲ್ಲಿ ಭಾರತ ತಂಡ ಐತಿಹಾಸಿಕ ಕಂಚಿನ ಪದಕ ಗೆದ್ದಿದೆ. ಈ ಮೂಲಕ ಈ ವಿಭಾಗದಲ್ಲಿ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತ ಮೊದಲ ಬಾರಿಗೆ ಪದಕ ಜಯಿಸಿದ ಸಾಧನೆ ಮಾಡಿದೆ.
ಗ್ರೂಪ್ ‘ಎ’ನಲ್ಲಿ ಅಜೇಯವಾಗಿ ಮುನ್ನಡೆದ ಭಾರತ, ಮ್ಯಾನ್ಮಾರ್ ವಿರುದ್ಧ 2-1 ಹಾಗೂ ವಿಯೆಟ್ನಾಂ ವಿರುದ್ಧ 2-0 ಅಂತರದ ಗೆಲುವು ದಾಖಲಿಸಿ ಸೆಮಿಫೈನಲ್ ಪ್ರವೇಶಿಸಿತ್ತು. ಅಂತಿಮ ನಾಲ್ಕರ ಘಟ್ಟಕ್ಕೆ ತಲುಪುವ ಮೂಲಕ ತಂಡ ಕಂಚಿನ ಪದಕವನ್ನು ಖಚಿತಪಡಿಸಿಕೊಂಡಿತ್ತು.
ಭಾರತೀಯ ಸೆಪಾಕ್ ಟಕ್ರಾ ಕ್ರೀಡಾ ಇತಿಹಾಸದಲ್ಲಿ ಈ ಸಾಧನೆ ಮಹತ್ವದ ಮೈಲಿಗಲ್ಲಾಗಿದೆ. ತಂಡದ ಸಂಘಟಿತ ಆಟ, ದೃಢನಿಶ್ಚಯ ಹಾಗೂ ಹೋರಾಟದ ಮನೋಭಾವ ಈ ಯಶಸ್ಸಿಗೆ ನೆರವಾಗಿದೆ.
ಐತಿಹಾಸಿಕ ಸಾಧನೆಗಾಗಿ ಪ್ರಧಾನಿ ನರೇಂದ್ರ ಮೋದಿ ಅವರು ಭಾರತ ತಂಡವನ್ನು ಅಭಿನಂದಿಸಿದ್ದಾರೆ. ಆಟಗಾರರ ದೃಢಸಂಕಲ್ಪ ಮತ್ತು ಹೋರಾಟದ ಗುಣವನ್ನು ಶ್ಲಾಘಿಸಿರುವ ಅವರು, ಈ ಪದಕವು ದೇಶದಲ್ಲಿ ಸೆಪಾಕ್ ಟಕ್ರಾ ಕ್ರೀಡೆಯ ಜನಪ್ರಿಯತೆಗೆ ಮತ್ತಷ್ಟು ಉತ್ತೇಜನ ನೀಡಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
‘ಎಕ್ಸ್‌’ನಲ್ಲಿನ ಸಂದೇಶದಲ್ಲಿ ಈ ಸಾಧನೆಯನ್ನು ಭಾರತೀಯ ಸೆಪಾಕ್ ಟಕ್ರಾ ಕ್ರೀಡೆಗೆ ಮಹತ್ವದ ಕ್ಷಣ ಎಂದು ಬಣ್ಣಿಸಿರುವ ಪ್ರಧಾನಿ, ಆಟಗಾರರಿಗೆ ಶುಭಾಶಯ ತಿಳಿಸಿದ್ದಾರೆ.
