ನವದೆಹಲಿ: ದೇಶಾದ್ಯಂತ ಗುಪ್ತಚರ ಆಧಾರಿತ ಕಾರ್ಯಾಚರಣೆ ನಡೆಸಿರುವ ಕಂದಾಯ ಗುಪ್ತಚರ ನಿರ್ದೇಶನಾಲಯ (ಡಿಆರ್‌ಐ), ₹65 ಕೋಟಿಗೂ ಹೆಚ್ಚು ಮೌಲ್ಯದ 42 ಕೆಜಿಗೂ ಅಧಿಕ ವಿದೇಶಿ ಮೂಲದ ಚಿನ್ನ ಹಾಗೂ ಸುಮಾರು 10 ಕೆಜಿ ಬೆಳ್ಳಿಯನ್ನು ವಶಪಡಿಸಿಕೊಂಡಿದೆ. ಕಾರ್ಯಾಚರಣೆಗೆ ಸಂಬಂಧಿಸಿದಂತೆ ಐವರು ವಿದೇಶಿ ಪ್ರಜೆಗಳು ಸೇರಿದಂತೆ ಒಟ್ಟು 25 ಮಂದಿಯನ್ನು ಬಂಧಿಸಲಾಗಿದೆ ಎಂದು ಡಿಆರ್‌ಐ ತಿಳಿಸಿದೆ.
ಕೋಲ್ಕತ್ತಾ, ಮುಂಬೈ, ಕೇರಳ, ತಮಿಳುನಾಡು, ಅಸ್ಸಾಂ ಸೇರಿದಂತೆ ವಿವಿಧ ರಾಜ್ಯಗಳಲ್ಲಿ ದಾಳಿ ನಡೆಸಲಾಗಿದೆ. ಕಳ್ಳಸಾಗಣೆದಾರರು ವಿಶೇಷವಾಗಿ ರೂಪಿಸಿದ ವಾಹನಗಳು ಹಾಗೂ ಸಾಮಾನುಗಳಲ್ಲಿನ ರಹಸ್ಯ ಕುಳಿಗಳು, ದೇಹದೊಳಗೆ ಮರೆಮಾಚುವಿಕೆ, ವಿಮಾನ ಪ್ರಯಾಣಿಕರು ಮತ್ತು ವಿಮಾನ ನಿಲ್ದಾಣ ಸಿಬ್ಬಂದಿಯ ನೆರವು ಸೇರಿದಂತೆ ಹಲವು ವಿಧಾನಗಳನ್ನು ಬಳಸುತ್ತಿದ್ದದ್ದು ತನಿಖೆಯಿಂದ ಬೆಳಕಿಗೆ ಬಂದಿದೆ.
ಮುಂಬೈ ವಿಮಾನ ನಿಲ್ದಾಣದಲ್ಲಿ 6.85 ಕೆಜಿ ಚಿನ್ನ ವಶ
ಆಗಸ್ಟ್ 28 ಮತ್ತು 29ರಂದು ಮುಂಬೈನ ಛತ್ರಪತಿ ಶಿವಾಜಿ ಮಹಾರಾಜ್ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ನಡೆದ ಕಾರ್ಯಾಚರಣೆಯಲ್ಲಿ ದುಬೈ, ಬ್ಯಾಂಕಾಕ್ ಮತ್ತು ಮಾಲೆ ಮಾರ್ಗಗಳಿಂದ ಆಗಮಿಸುತ್ತಿದ್ದವರನ್ನು ಒಳಗೊಂಡ ಕಳ್ಳಸಾಗಣೆ ಜಾಲವನ್ನು ಡಿಆರ್‌ಐ ಪತ್ತೆಹಚ್ಚಿದೆ. ಮೇಣದ ರೂಪದಲ್ಲಿ ಮರೆಮಾಡಲಾಗಿದ್ದ 24 ಕ್ಯಾರೆಟ್ ಚಿನ್ನದ ಧೂಳಿನ 16 ಕ್ಯಾಪ್ಸುಲ್‌ಗಳಿಂದ 6.85 ಕೆಜಿ ಚಿನ್ನ ವಶಪಡಿಸಿಕೊಳ್ಳಲಾಗಿದೆ. ಐವರು ವಿದೇಶಿ ಪ್ರಜೆಗಳು ಹಾಗೂ ವಿಮಾನ ನಿಲ್ದಾಣ ಸಿಬ್ಬಂದಿ ಸೇರಿದಂತೆ ಆರು ಮಂದಿಯನ್ನು ಬಂಧಿಸಲಾಗಿದೆ.
ಕೋಲ್ಕತ್ತಾ ಮತ್ತು ಪಶ್ಚಿಮ ಬಂಗಾಳದಲ್ಲೂ ಹಲವು ಕಾರ್ಯಾಚರಣೆಗಳು ನಡೆದಿವೆ. ದುಬೈನಿಂದ ಬಂದ ಇಬ್ಬರು ಪ್ರಯಾಣಿಕರಿಂದ 4.87 ಕೆಜಿ ಚಿನ್ನ, ಬ್ಯಾಂಕಾಕ್‌ನಿಂದ ಬಂದ ಪ್ರಯಾಣಿಕನಿಂದ 3.36 ಕೆಜಿ ಚಿನ್ನ ಹಾಗೂ ನಾಡಿಯಾ ಜಿಲ್ಲೆಯ ನಿವಾಸವೊಂದರಿಂದ 15.61 ಕೆಜಿ ಚಿನ್ನದ ಗಟ್ಟಿಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಕೇರಳದಲ್ಲಿ ಕೊಚ್ಚಿನ್ ವಿಮಾನ ನಿಲ್ದಾಣದಲ್ಲಿ 1.78 ಕೆಜಿ ಹಾಗೂ ಕ್ಯಾಲಿಕಟ್‌ನಲ್ಲಿ 549 ಗ್ರಾಂ ಚಿನ್ನ ಪತ್ತೆಯಾಗಿದೆ. ಕೋಲ್ಕತ್ತಾದಲ್ಲಿ ದೇಹದೊಳಗೆ ಕ್ಯಾಪ್ಸುಲ್‌ಗಳಲ್ಲಿ ಮರೆಮಾಡಿದ್ದ 1.48 ಕೆಜಿ ಚಿನ್ನವನ್ನು ವಶಪಡಿಸಿಕೊಂಡು ನಾಲ್ವರು ಹಾಗೂ ಅವರ ನಿರ್ವಾಹಕರನ್ನು ಬಂಧಿಸಲಾಗಿದೆ.
ಅಸ್ಸಾಂನ ಗುವಾಹಟಿಯಲ್ಲಿ ಇಂಡೋ-ಬಾಂಗ್ಲಾದೇಶ ಗಡಿಯ ಮೂಲಕ ಸಾಗಿಸಲಾಗುತ್ತಿದೆ ಎನ್ನಲಾದ 3.84 ಕೆಜಿ ಚಿನ್ನವನ್ನು ವಶಪಡಿಸಿಕೊಂಡು ಇಬ್ಬರನ್ನು ಬಂಧಿಸಲಾಗಿದೆ. ತಮಿಳುನಾಡಿನ ರಾಮನಾಥಪುರದಲ್ಲಿ ಶ್ರೀಲಂಕಾದಿಂದ ಕರಾವಳಿ ಮಾರ್ಗದ ಮೂಲಕ ಕಳ್ಳಸಾಗಣೆ ಮಾಡಲಾಗಿದೆ ಎನ್ನಲಾದ 1.36 ಕೆಜಿ ಚಿನ್ನ ಮತ್ತು 9.99 ಕೆಜಿ ಬೆಳ್ಳಿಯನ್ನು ವಶಪಡಿಸಿಕೊಳ್ಳಲಾಗಿದೆ.
ವಿವಿಧ ಮಾರ್ಗಗಳು ಹಾಗೂ ವಿಭಿನ್ನ ವಿಧಾನಗಳನ್ನು ಬಳಸಿಕೊಂಡು ನಡೆಯುತ್ತಿದ್ದ ಸಂಘಟಿತ ಕಳ್ಳಸಾಗಣೆ ಜಾಲದ ಪತ್ತೆ, ಅದರ ಪೂರೈಕೆ ಸರಪಳಿ ಮತ್ತು ಹಣಕಾಸು ವ್ಯವಸ್ಥೆಯನ್ನು ಭೇದಿಸುವಲ್ಲಿ ಡಿಆರ್‌ಐನ ಕಾರ್ಯಾಚರಣೆ ಮಹತ್ವದ ಬೆಳವಣಿಗೆಯಾಗಿದೆ.
