ನವದೆಹಲಿ: ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ಮೇಲೆ ಸೈಬರ್ ದಾಳಿ ನಡೆದಿರುವ ಕುರಿತು ಪ್ರಕಟವಾದ ಮಾಧ್ಯಮ ವರದಿಗಳನ್ನು ಕೇಂದ್ರ ರಕ್ಷಣಾ ಸಚಿವಾಲಯ ತಳ್ಳಿಹಾಕಿದೆ. ಈ ಸಂಬಂಧ ನಡೆದ ತನಿಖೆಯಲ್ಲಿ ಯಾವುದೇ ಸಕ್ರಿಯ ಸೈಬರ್ ದಾಳಿ, ಅನಧಿಕೃತ ನೆಟ್‌ವರ್ಕ್ ಒಳನುಗ್ಗುವಿಕೆ ಅಥವಾ ಹೊಸ ಡೇಟಾ ಸೋರಿಕೆಯ ಪುರಾವೆಗಳು ಪತ್ತೆಯಾಗಿಲ್ಲ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.
ಸಚಿವಾಲಯದ ಪ್ರಕಾರ, ಸೋರಿಕೆಯಾಗಿದೆ ಎಂದು ಹೇಳಲಾಗುತ್ತಿರುವ ಹೆಚ್ಚಿನ ಮಾಹಿತಿಯು ಗೌಪ್ಯ ಅಥವಾ ವರ್ಗೀಕೃತ ದಾಖಲೆಗಳಲ್ಲ. ಕೆಲವು ದಾಖಲೆಗಳು 2020ರಿಂದ 2022ರ ಅವಧಿಯ ಹಳೆಯ ಉಲ್ಲಂಘನೆಗೆ ಸಂಬಂಧಿಸಿದ್ದು, ಅವುಗಳನ್ನು ಇತ್ತೀಚಿನ ಮತ್ತು ಸೂಕ್ಷ್ಮ ದಾಖಲೆಗಳಂತೆ ಬಿಂಬಿಸುವ ಪ್ರಯತ್ನ ನಡೆದಿದೆ ಎಂದು ತಿಳಿಸಿದೆ.
ತನಿಖೆಯಲ್ಲಿ ಒಂದೇ ಹಳೆಯ ಮಾಹಿತಿಯನ್ನು ಹಲವು ಸೈಬರ್ ಬೆದರಿಕೆ ಕಾರ್ಯಕರ್ತರು ಮಾರಾಟಕ್ಕೆ ಇಟ್ಟಿರುವುದು ಬೆಳಕಿಗೆ ಬಂದಿದ್ದು, ಅದಕ್ಕೆ ಪ್ರಸ್ತುತ ಡಿಆರ್‌ಡಿಒ ಅಥವಾ ರಕ್ಷಣಾ ಸಚಿವಾಲಯದ ಕಾರ್ಯಾಚರಣೆಗಳೊಂದಿಗೆ ಯಾವುದೇ ಸಂಬಂಧ ಇಲ್ಲ ಎಂದು ಹೇಳಲಾಗಿದೆ. ಹಣಕಾಸಿನ ಲಾಭಕ್ಕಾಗಿ ಭಯದ ವಾತಾವರಣ ಸೃಷ್ಟಿಸಿ, ಹಳೆಯ ದಾಖಲೆಗಳನ್ನು ಹೊಸದಾಗಿ ಬಿಂಬಿಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಡಿಆರ್‌ಡಿಒ ವ್ಯವಸ್ಥೆಗಳು ಸುರಕ್ಷಿತವಾಗಿದ್ದು, ಯಾವುದೇ ಸೂಕ್ಷ್ಮ ಅಥವಾ ವರ್ಗೀಕೃತ ಮಾಹಿತಿಗೆ ಧಕ್ಕೆಯಾಗಿಲ್ಲ ಎಂದು ಸಚಿವಾಲಯ ಪುನರುಚ್ಚರಿಸಿದೆ. ಜೊತೆಗೆ, ಇಂತಹ ಸೂಕ್ಷ್ಮ ವಿಷಯಗಳಲ್ಲಿ ವರದಿ ಪ್ರಕಟಿಸುವ ಮೊದಲು ಮಾಹಿತಿಯನ್ನು ಸಮಗ್ರವಾಗಿ ಪರಿಶೀಲಿಸುವಂತೆ ಮಾಧ್ಯಮಗಳಿಗೆ ಮನವಿ ಮಾಡಿದೆ.
ರಾಷ್ಟ್ರೀಯ ಭದ್ರತೆ ಹಾಗೂ ಸೈಬರ್ ರಕ್ಷಣೆಯನ್ನು ಬಲಪಡಿಸುವ ಬದ್ಧತೆ ಮುಂದುವರಿಯಲಿದ್ದು, ದೇಶದ ರಕ್ಷಣಾ ಮೂಲಸೌಕರ್ಯ ಸುರಕ್ಷಿತವಾಗಿದೆ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.
