ವಿಶಾಖಪಟ್ಟಣ: ನೇಪಾಳ ಮತ್ತು ಜಪಾನ್ ಜೊತೆ ವ್ಯಾಪಾರ, ಹೂಡಿಕೆ ಹಾಗೂ ಕೈಗಾರಿಕಾ ಸಹಕಾರವನ್ನು ಬಲಪಡಿಸಲು ಆಂಧ್ರಪ್ರದೇಶ ಸರ್ಕಾರ ಮುಂದಾಗಿದೆ ಎಂದು ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ತಿಳಿಸಿದ್ದಾರೆ.
31ನೇ ಸಿಐಐ ಪಾಲುದಾರಿಕೆ ಶೃಂಗಸಭೆ-2026ರ ಸಂದರ್ಭದಲ್ಲಿ ನೇಪಾಳದ ಕೈಗಾರಿಕೆ, ವಾಣಿಜ್ಯ ಮತ್ತು ಸರಬರಾಜು ಸಚಿವ ದೀಪಕ್ ಕುಮಾರ್ ಸಾಹ್ ಹಾಗೂ ಜಪಾನ್ ಸಂಶೋಧನಾ ಸಂಸ್ಥೆಯ ಅಧ್ಯಕ್ಷ ಕೆಂಜಿ ಹಿರಾಮಟ್ಸು ಅವರೊಂದಿಗೆ ನಾಯ್ಡು ಸಭೆ ನಡೆಸಿ ಹಲವು ಮಹತ್ವದ ವಿಷಯಗಳ ಕುರಿತು ಚರ್ಚಿಸಿದರು.
ನೇಪಾಳದ ಸಚಿವರೊಂದಿಗಿನ ಮಾತುಕತೆಯಲ್ಲಿ ವಿಶಾಖಪಟ್ಟಣ ಬಂದರಿನ ಮೂಲಕ ನೇಪಾಳದ ಕಡಲ ವ್ಯಾಪಾರಕ್ಕೆ ಅವಕಾಶ ಕಲ್ಪಿಸುವುದು, ವಿಶಾಖಪಟ್ಟಣದಲ್ಲಿ ನೇಪಾಳದ ಕಾನ್ಸುಲೇಟ್ ಸ್ಥಾಪನೆ ಹಾಗೂ ಲುಂಬಿನಿ, ಅಮರಾವತಿ ಮತ್ತು ನಾಗಾರ್ಜುನಕೊಂಡವನ್ನು ಸಂಪರ್ಕಿಸುವ ಬೌದ್ಧ ಪ್ರವಾಸೋದ್ಯಮ ಮಾರ್ಗ ಅಭಿವೃದ್ಧಿಪಡಿಸುವ ಕುರಿತು ಚರ್ಚಿಸಲಾಯಿತು.
ಜಪಾನ್ ಪ್ರತಿನಿಧಿಯೊಂದಿಗೆ ಆಂಧ್ರಪ್ರದೇಶದಲ್ಲಿ ಹೆಚ್ಚಿನ ಹೂಡಿಕೆ ಆಕರ್ಷಿಸುವುದು, ಪ್ರತ್ಯೇಕ ಕೈಗಾರಿಕಾ ನಗರಗಳ ಸ್ಥಾಪನೆ, ಹಡಗು ನಿರ್ಮಾಣ ಕ್ಲಸ್ಟರ್, ತಂತ್ರಜ್ಞಾನ ವಿನಿಮಯ ಮತ್ತು ಕೌಶಲಾಭಿವೃದ್ಧಿ ಕುರಿತು ಮಾತುಕತೆ ನಡೆಯಿತು.
ರಾಜ್ಯದಲ್ಲಿ ಹೂಡಿಕೆ ವಿಸ್ತರಿಸಲು ಆಸಕ್ತಿ ಹೊಂದಿರುವ ಜಪಾನಿನ ಕಂಪನಿಗಳಿಗೆ ಸೂಕ್ತ ಹೂಡಿಕೆ ನೀಲನಕ್ಷೆ ರೂಪಿಸುವ ಬಗ್ಗೆಯೂ ಚರ್ಚಿಸಲಾಯಿತು. ನೇಪಾಳ ಮತ್ತು ಜಪಾನ್ ಜೊತೆಗಿನ ಸಹಕಾರದ ಮೂಲಕ ಹೊಸ ವ್ಯಾಪಾರ ಹಾಗೂ ಕೈಗಾರಿಕಾ ಅವಕಾಶಗಳನ್ನು ಸೃಷ್ಟಿಸುವುದು ರಾಜ್ಯದ ಉದ್ದೇಶವಾಗಿದೆ ಎಂದು ನಾಯ್ಡು ಹೇಳಿದರು.
