ಮುಂಬೈ: 2027ರಲ್ಲಿ ನಡೆಯಲಿರುವ ನಾಸಿಕ್–ತ್ರಯಂಬಕೇಶ್ವರ ಸಿಂಹಸ್ಥ ಕುಂಭಮೇಳದ ಅಧಿಕೃತ ಆರಂಭವನ್ನು ಸೂಚಿಸುವ ಧ್ವಜಾರೋಹಣ ಸಮಾರಂಭದಲ್ಲಿ ಪಾಲ್ಗೊಳ್ಳುವಂತೆ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರಿಗೆ ಮಹಾರಾಷ್ಟ್ರ ಸರ್ಕಾರ ಆಹ್ವಾನ ನೀಡಿದೆ. ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ನೇತೃತ್ವದ ನಿಯೋಗ ಬುಧವಾರ ರಾಷ್ಟ್ರಪತಿ ಅವರನ್ನು ಭೇಟಿಯಾಗಿ, ಅಕ್ಟೋಬರ್ 31ರಂದು ನಡೆಯಲಿರುವ ಸಮಾರಂಭಕ್ಕೆ ಆಹ್ವಾನಿಸಿತು.
ನಿಯೋಗದಲ್ಲಿ ಉಪಮುಖ್ಯಮಂತ್ರಿಗಳಾದ ಏಕನಾಥ್ ಶಿಂಧೆ ಮತ್ತು ಸುನೇತ್ರಾ ಅಜಿತ್ ಪವಾರ್ ಸೇರಿದಂತೆ ರಾಜ್ಯದ ಸಚಿವರು, ಅಧಿಕಾರಿಗಳು ಹಾಗೂ ಇತರ ಪ್ರತಿನಿಧಿಗಳು ಇದ್ದರು. ಕುಂಭಮೇಳದ ಅಂಗವಾಗಿ ನಡೆಯಲಿರುವ ಗೋದಾ ಆರತಿಯಲ್ಲಿ ಭಾಗವಹಿಸಲು, ಕುಂಭಮೇಳ ಪ್ರಾಧಿಕಾರದ ವೆಬ್‌ಸೈಟ್ ಮತ್ತು ಉತ್ಸವದ ಗೀತೆಯನ್ನು ಬಿಡುಗಡೆ ಮಾಡಲು, ಚಿತ್ರಸಹಿತ ಕಾಫಿ ಟೇಬಲ್ ಪುಸ್ತಕ ಹಾಗೂ ಸ್ಮರಣಾರ್ಥ ಅಂಚೆ ಚೀಟಿಯನ್ನು ಅನಾವರಣಗೊಳಿಸಲು ರಾಷ್ಟ್ರಪತಿಗೆ ಆಹ್ವಾನ ನೀಡಲಾಯಿತು.
ಆಹ್ವಾನ ಪತ್ರಿಕೆಯನ್ನು ನವೀನ ತ್ರಿಡಿ ಪಾಪ್-ಅಪ್ ವಿನ್ಯಾಸದಲ್ಲಿ ರೂಪಿಸಲಾಗಿದ್ದು, ಕುಂಭಮೇಳದ ಪೌರಾಣಿಕ ಹಿನ್ನೆಲೆ, ಆಧ್ಯಾತ್ಮಿಕ ವೈಭವ ಮತ್ತು ಭವ್ಯತೆಯನ್ನು ಬಿಂಬಿಸುತ್ತದೆ. ದೃಷ್ಟಿ, ಶ್ರವಣ, ಘ್ರಾಣ, ರುಚಿ ಮತ್ತು ಸ್ಪರ್ಶ ಎಂಬ ಪಂಚೇಂದ್ರಿಯಗಳ ಪರಿಕಲ್ಪನೆಯನ್ನು ಆಧರಿಸಿದ ವಿನ್ಯಾಸವು ನಾಸಿಕ್‌ನ ಸಾಂಸ್ಕೃತಿಕ ಪರಂಪರೆ ಹಾಗೂ ಗೋದಾವರಿ ನದಿಯ ಪಾವಿತ್ರ್ಯವನ್ನು ಎತ್ತಿಹಿಡಿಯುತ್ತದೆ.
ರಾಷ್ಟ್ರಪತಿಗೆ ನೀಡಲಾದ ವಿಶೇಷ ಉಡುಗೊರೆ ಸಂಗ್ರಹವು ಮಹಾರಾಷ್ಟ್ರದ ಸಾಂಸ್ಕೃತಿಕ ವೈವಿಧ್ಯ ಮತ್ತು ಸ್ಥಳೀಯ ಉದ್ಯಮಶೀಲತೆಯನ್ನು ಪರಿಚಯಿಸುತ್ತದೆ. ಬುಡಕಟ್ಟು ಅಭಿವೃದ್ಧಿ ಇಲಾಖೆಯ ‘ಶಬರಿ ನ್ಯಾಚುರಲ್ಸ್’ ಬ್ರ್ಯಾಂಡ್‌ನ ಅಗರಬತ್ತಿಗಳು, ಸಿರಿಧಾನ್ಯ ಆಧಾರಿತ ಆಹಾರ ಪದಾರ್ಥಗಳು, ಮಹುವಾ ಹೂವಿನಿಂದ ತಯಾರಿಸಿದ ಉತ್ಪನ್ನಗಳು, ಬಿದಿರಿನ ಕರಕುಶಲ ವಸ್ತುಗಳು ಹಾಗೂ ಅರಣ್ಯ ಉತ್ಪನ್ನಗಳು ಇದರಲ್ಲಿ ಸೇರಿವೆ. ಬುಡಕಟ್ಟು ಸಮುದಾಯಗಳ ಸಾಂಪ್ರದಾಯಿಕ ಜ್ಞಾನ ಮತ್ತು ನೈಸರ್ಗಿಕ ಸಂಪನ್ಮೂಲಗಳ ಸುಸ್ಥಿರ ಬಳಕೆಯ ಮಹತ್ವವನ್ನೂ ಈ ಸಂಗ್ರಹ ಸಾರುತ್ತದೆ.
ಇದರೊಂದಿಗೆ ಯೇವೋಲಾದ ಪ್ರಸಿದ್ಧ ಪೈಠಣಿ ಸೀರೆ, ನಾಸಿಕ್‌ನ ಒಣದ್ರಾಕ್ಷಿ ಮತ್ತು ಗೋಡಂಬಿ, ಸ್ಥಳೀಯ ಚಿವಡಾ, ಸಿಹಿತಿಂಡಿಗಳು ಹಾಗೂ ಒಣ ಹಣ್ಣುಗಳನ್ನು ಉಡುಗೊರೆಯಾಗಿ ನೀಡಲಾಗಿದೆ.
ಕಾರ್ಯಕ್ರಮದಲ್ಲಿ ರಾಜ್ಯ ಸಚಿವರಾದ ಗಿರೀಶ್ ಮಹಾಜನ್, ದಾದಾಜಿ ಭೂಸೆ, ನರಹರಿ ಜಿರ್ವಾಲ್ ಮತ್ತು ಛಗನ್ ಭುಜಬಲ್, ನಾಸಿಕ್ ಮೇಯರ್ ಹಿಮಗೌರಿ ಅಹೆರ್-ಅಡ್ಕೆ, ತ್ರಯಂಬಕ ಪುರಸಭೆ ಅಧ್ಯಕ್ಷೆ ತ್ರಿವೇಣಿ ತುಂಗಾರ್ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.
