ಮುಂಬೈ (ANU): ಅಂತರರಾಷ್ಟ್ರೀಯ ಮಾದಕ ದ್ರವ್ಯ ಜಾಲದ ವಿರುದ್ಧ ಜಾರಿ ನಿರ್ದೇಶನಾಲಯ (ಇಡಿ) ಭಾರಿ ಕಾರ್ಯಾಚರಣೆ ನಡೆಸಿದ್ದು, ಮುಂಬೈ ಹಾಗೂ ಗುಜರಾತ್ನ ಹಲವು ಸ್ಥಳಗಳಲ್ಲಿ ಏಕಕಾಲಕ್ಕೆ ಶೋಧ ನಡೆಸಿದೆ.
ಮೂಲಗಳ ಪ್ರಕಾರ, ಹಣ ವರ್ಗಾವಣೆ ತಡೆ ಕಾಯ್ದೆ (ಪಿಎಂಎಲ್ಎ) ಅಡಿಯಲ್ಲಿ ಈ ಕಾರ್ಯಾಚರಣೆ ಕೈಗೊಳ್ಳಲಾಗಿದ್ದು, ಸಲೀಂ ಇಸ್ಮಾಯಿಲ್ ಡೋಲಾ ಮತ್ತು ಆತನ ಸಹಚರರು ನಡೆಸುತ್ತಿದ್ದ ಮಾದಕ ದ್ರವ್ಯ ಜಾಲಕ್ಕೆ ಸಂಬಂಧಿಸಿದ ಹಣಕಾಸು ವ್ಯವಹಾರಗಳ ತನಿಖೆ ನಡೆಯುತ್ತಿದೆ.
ಮುಂಬೈ ಸೇರಿದಂತೆ ಸೂರತ್, ಅಂಕಲೇಶ್ವರ ಮತ್ತು ರಾಜ್ಕೋಟ್ನ 20ಕ್ಕೂ ಹೆಚ್ಚು ಸ್ಥಳಗಳಲ್ಲಿ ದಾಳಿ ನಡೆಸಲಾಗಿದ್ದು, ಮೆಫೆಡ್ರೋನ್ (ಎಂಡಿ) ಮಾದಕ ದ್ರವ್ಯ ತಯಾರಿಕೆ, ಪೂರ್ವಗಾಮಿ ರಾಸಾಯನಿಕಗಳ ಪೂರೈಕೆ, ಹವಾಲಾ ವ್ಯವಹಾರ ಹಾಗೂ ಬೇನಾಮಿ ಆಸ್ತಿ ಹೊಂದಿರುವವರ ನಿವಾಸ ಮತ್ತು ಕಚೇರಿಗಳನ್ನು ಪರಿಶೀಲಿಸಲಾಗಿದೆ.
ಇತ್ತೀಚೆಗೆ ಟರ್ಕಿಯಿಂದ ಭಾರತಕ್ಕೆ ಹಸ್ತಾಂತರಗೊಂಡ ಸಲೀಂ ಡೋಲಾ, ಭೂಗತ ಪಾತಕಿ ದಾವೂದ್ ಇಬ್ರಾಹಿಂನ ಆಪ್ತ ಸಹಚರ ಎಂದು ತನಿಖಾ ಸಂಸ್ಥೆಗಳು ಶಂಕಿಸಿವೆ. ಡೋಲಾ ನೇತೃತ್ವದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಜಾಲವು ಮಾದಕ ದ್ರವ್ಯ ಉತ್ಪಾದನೆ, ಸಾಗಣೆ ಮತ್ತು ಅಕ್ರಮ ಹಣ ವರ್ಗಾವಣೆಯಲ್ಲಿ ತೊಡಗಿತ್ತು ಎಂಬ ಆರೋಪ ಕೇಳಿಬಂದಿದೆ.
ತನಿಖೆಯಲ್ಲಿ ಹವಾಲಾ ಜಾಲಗಳ ಮೂಲಕ ಅಕ್ರಮ ಹಣವನ್ನು ದೇಶ-ವಿದೇಶಗಳಲ್ಲಿ ಹೂಡಿಕೆ ಮಾಡಿರುವ ಸುಳಿವುಗಳು ಪತ್ತೆಯಾಗಿವೆ. ಈ ಸಂಬಂಧ ರಾಸಾಯನಿಕ ಉತ್ಪಾದಕರು, ಮಧ್ಯವರ್ತಿಗಳು, ಹಣಕಾಸು ನಿರ್ವಾಹಕರು, ಲೆಕ್ಕಪರಿಶೋಧಕರು ಹಾಗೂ ಹವಾಲಾ ಆಪರೇಟರ್ಗಳ ಪಾತ್ರವನ್ನೂ ಇಡಿ ಪರಿಶೀಲಿಸುತ್ತಿದೆ.
