ಕೈವ್: ರಷ್ಯಾ ವಿರುದ್ಧದ ಯುದ್ಧ ಮುಂದುವರಿದಿರುವ ಬೆನ್ನಲ್ಲೇ ಡೆನ್ಮಾರ್ಕ್ ಉಕ್ರೇನ್‌ಗೆ €645 ಮಿಲಿಯನ್ ಮೌಲ್ಯದ ರಕ್ಷಣಾ ನೆರವು ಪ್ಯಾಕೇಜ್ ಘೋಷಿಸಿದೆ ಎಂದು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ತಿಳಿಸಿದ್ದಾರೆ.
ಡೆನ್ಮಾರ್ಕ್ ಪ್ರಧಾನಿ ಮೆಟ್ಟೆ ಫ್ರೆಡೆರಿಕ್ಸೆನ್ ಅವರೊಂದಿಗಿನ ಭೇಟಿಯ ಬಳಿಕ ಈ ಕುರಿತು ಮಾಹಿತಿ ನೀಡಿದ ಅವರು, ಪ್ಯಾಕೇಜ್‌ನಲ್ಲಿ ದಾಳಿ ಡ್ರೋನ್‌ಗಳು, ಪ್ರತಿಬಂಧಕಗಳು, ಎಫ್-16 ಯುದ್ಧವಿಮಾನಗಳ ಮದ್ದುಗುಂಡು ಹಾಗೂ PURL ಉಪಕ್ರಮಕ್ಕೆ ಹಣಕಾಸು ನೆರವು ಸೇರಿವೆ ಎಂದರು.
ಉಕ್ರೇನ್‌ನ ಇಂಧನ ಮೂಲಸೌಕರ್ಯ, ನೀರು ಪೂರೈಕೆ ಮತ್ತು ತಾಪನ ವ್ಯವಸ್ಥೆಗಳ ಮೇಲೆ ರಷ್ಯಾ ನಿರಂತರ ದಾಳಿ ನಡೆಸುತ್ತಿರುವ ಸಂದರ್ಭದಲ್ಲಿ ಈ ನೆರವು ಘೋಷಿಸಲಾಗಿದೆ. ರಷ್ಯಾದ ಪಡೆಗಳಿಂದ ಖೆರ್ಸನ್ ಪ್ರದೇಶ ವಿಮೋಚನೆಗೊಂಡ ನಾಲ್ಕನೇ ವಾರ್ಷಿಕೋತ್ಸವದ ಹಿನ್ನೆಲೆಯಲ್ಲಿ ಆ ಪ್ರದೇಶಕ್ಕೆ ಪ್ರತ್ಯೇಕವಾಗಿ €20 ಮಿಲಿಯನ್ ಇಂಧನ ನೆರವು ನೀಡಲು ಡೆನ್ಮಾರ್ಕ್ ನಿರ್ಧರಿಸಿದೆ.
ಮಾನವೀಯ ನೆರವು, ಜಂಟಿ ಶಸ್ತ್ರಾಸ್ತ್ರ ಉತ್ಪಾದನೆ, ಡ್ರೋನ್ ಒಪ್ಪಂದ ಹಾಗೂ FREYJA ಬ್ಯಾಲಿಸ್ಟಿಕ್ ವಿರೋಧಿ ಕಾರ್ಯಕ್ರಮದ ಬಗ್ಗೆಯೂ ಉಭಯ ನಾಯಕರು ಚರ್ಚಿಸಿದ್ದಾರೆ.
ಇದೇ ವೇಳೆ, ಅಬುಧಾಬಿಯಲ್ಲಿ ಅಮೆರಿಕ ಮತ್ತು ರಷ್ಯಾ ಪ್ರತಿನಿಧಿಗಳೊಂದಿಗೆ ಉಕ್ರೇನ್ ನಿಯೋಗ ತ್ರಿಪಕ್ಷೀಯ ಮಾತುಕತೆ ನಡೆಸಿದೆ ಎಂದು ಝೆಲೆನ್ಸ್ಕಿ ತಿಳಿಸಿದ್ದಾರೆ. ಕೈದಿಗಳ ಬಿಡುಗಡೆ, ಮಾನವೀಯ ಕ್ರಮಗಳು, ದೀರ್ಘಕಾಲೀನ ಭದ್ರತಾ ಖಾತರಿ ಹಾಗೂ ಯುದ್ಧ ಮರುಕಳಿಸದಂತೆ ತಡೆಯುವ ಕ್ರಮಗಳು ಮಾತುಕತೆಯ ಪ್ರಮುಖ ವಿಷಯಗಳಾಗಿದ್ದವು. ಶಾಶ್ವತ ಶಾಂತಿ ಸ್ಥಾಪನೆಗಾಗಿ ಮುಂದಿನ ದಿನಗಳಲ್ಲೂ ಮಾತುಕತೆ ಮುಂದುವರಿಸುವುದಾಗಿ ಅವರು ಹೇಳಿದ್ದಾರೆ.
