ಕೈವ್: ರಷ್ಯಾದ ದಾಳಿಗಳನ್ನು ಎದುರಿಸಲು ತುರ್ತು ಮಿಲಿಟರಿ ಮತ್ತು ಇಂಧನ ನೆರವು ನೀಡುವಂತೆ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಯುರೋಪಿಯನ್ ರಾಷ್ಟ್ರಗಳ ನಾಯಕರಿಗೆ ಮನವಿ ಮಾಡಿದ್ದಾರೆ.
9ನೇ ಯುರೋಪಿಯನ್ ಪೊಲಿಟಿಕಲ್ ಕಮ್ಯುನಿಟಿ ಶೃಂಗಸಭೆಯಲ್ಲಿ ಮಾತನಾಡಿದ ಅವರು, ಪೇಟ್ರಿಯಾಟ್ ಮತ್ತು NASAMS ವಾಯು ರಕ್ಷಣಾ ವ್ಯವಸ್ಥೆಗಳಿಗೆ ಅಗತ್ಯವಿರುವ ಪ್ರತಿಬಂಧಕ ಕ್ಷಿಪಣಿಗಳು ಹಾಗೂ F-16 ಯುದ್ಧ ವಿಮಾನಗಳಿಗೆ ಮದ್ದುಗುಂಡುಗಳನ್ನು ಒದಗಿಸುವಂತೆ ಕೋರಿದರು.
ರಷ್ಯಾ ಜೆಟ್ ಚಾಲಿತ ಶಾಹೆದ್ ಡ್ರೋನ್‌ಗಳ ಉತ್ಪಾದನೆ ಹೆಚ್ಚಿಸಿ ದಾಳಿಗಳನ್ನು ತೀವ್ರಗೊಳಿಸುವ ಸಾಧ್ಯತೆಯಿದೆ ಎಂದು ಎಚ್ಚರಿಸಿದ ಅವರು, ಉಕ್ರೇನ್‌ನ ವಾಯು ರಕ್ಷಣೆಯನ್ನು ಬಲಪಡಿಸುವ ಅಗತ್ಯವನ್ನು ಒತ್ತಿಹೇಳಿದರು.
ಚಳಿಗಾಲದಲ್ಲಿ ಇಂಧನ ಮೂಲಸೌಕರ್ಯವನ್ನು ರಕ್ಷಿಸಲು ಅಗತ್ಯ ಉಪಕರಣಗಳು ಮತ್ತು ಇಂಧನ ನೆರವು ಒದಗಿಸುವಂತೆ ಮೂರನೇ ಪ್ರಮುಖ ಆದ್ಯತೆಯಾಗಿ ಮನವಿ ಮಾಡಿದರು.
ಇದೇ ವೇಳೆ, ಉಕ್ರೇನ್‌ನ ಆಕ್ರಮಿತ ಪ್ರದೇಶಗಳನ್ನು ರಷ್ಯಾದ ಭಾಗವೆಂದು ಅಂತರರಾಷ್ಟ್ರೀಯ ಸಮುದಾಯ ಗುರುತಿಸಬಾರದು ಎಂದು ಝೆಲೆನ್ಸ್ಕಿ ಹೇಳಿದರು. ಆಕ್ರಮಿತ ಪ್ರದೇಶಗಳಲ್ಲಿ ಸ್ಟಾರ್‌ಲಿಂಕ್ ಸೇವೆಯ ವೇಗ ನಿರ್ಬಂಧದಿಂದ ರಷ್ಯಾದ ಡ್ರೋನ್‌ಗಳನ್ನು ತಡೆಯುವ ಉಕ್ರೇನ್‌ನ ಸಾಮರ್ಥ್ಯಕ್ಕೆ ತೊಂದರೆಯಾಗುತ್ತಿದೆ ಎಂದು ಕಳವಳ ವ್ಯಕ್ತಪಡಿಸಿದರು. ಈ ಕುರಿತು ಅಮೆರಿಕದಿಂದ ಸ್ಪಷ್ಟನೆ ಬಯಸಿರುವುದಾಗಿ ತಿಳಿಸಿದರು.
