ನವದೆಹಲಿ: ದೇಶದ ಡಿಜಿಟಲ್ ಆರೋಗ್ಯ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಕೇಂದ್ರ ಆರೋಗ್ಯ ಸಚಿವ ಜೆ.ಪಿ. ನಡ್ಡಾ ಅವರು ಜೂನ್ 29ರಂದು ಆರೋಗ್ಯ ಸೇತು 2.0 ಸೇರಿದಂತೆ ಹಲವು ಪ್ರಮುಖ ಡಿಜಿಟಲ್ ಆರೋಗ್ಯ ಉಪಕ್ರಮಗಳಿಗೆ ಚಾಲನೆ ನೀಡಲಿದ್ದಾರೆ.
ಆರೋಗ್ಯ ಸೇತು 2.0 ಸಮಗ್ರ ವೈಯಕ್ತಿಕ ಆರೋಗ್ಯ ದಾಖಲೆ (PHR) ವೇದಿಕೆಯಾಗಿ ಕಾರ್ಯನಿರ್ವಹಿಸಲಿದ್ದು, ಬಳಕೆದಾರರು ABHA ಖಾತೆಗಳನ್ನು ರಚಿಸುವುದು, ಆರೋಗ್ಯ ದಾಖಲೆಗಳನ್ನು ಸಂಗ್ರಹಿಸುವುದು ಹಾಗೂ ಹಂಚಿಕೊಳ್ಳುವುದು, ಎಐ ಆಧಾರಿತ ಆರೋಗ್ಯ ಸಲಹೆಗಳನ್ನು ಪಡೆಯುವುದು ಸೇರಿದಂತೆ ಹಲವು ಸೌಲಭ್ಯಗಳನ್ನು ಪಡೆಯಲಿದ್ದಾರೆ. ಜೊತೆಗೆ OPD ನೋಂದಣಿ, ಆಸ್ಪತ್ರೆ ಪಾವತಿ, ಕುಟುಂಬದ ಆರೋಗ್ಯ ದಾಖಲೆಗಳ ನಿರ್ವಹಣೆ ಹಾಗೂ ಸಮೀಪದ ಆಸ್ಪತ್ರೆಗಳು, ವೈದ್ಯರು, ರಕ್ತ ಬ್ಯಾಂಕ್‌ಗಳು, ಆಂಬ್ಯುಲೆನ್ಸ್ ಸೇವೆಗಳು ಮತ್ತು ಜನಔಷಧಿ ಕೇಂದ್ರಗಳ ಮಾಹಿತಿಯನ್ನೂ ಪಡೆಯಬಹುದು.
ನವೀಕರಿಸಲಾದ ಆಯುಷ್ಮಾನ್ ಅಪ್ಲಿಕೇಶನ್ ಮೂಲಕ PM-JAY ಫಲಾನುಭವಿಗಳು ಅರ್ಹತೆ ಪರಿಶೀಲನೆ, ಆಯುಷ್ಮಾನ್ ಕಾರ್ಡ್ ನಿರ್ವಹಣೆ, ಚಿಕಿತ್ಸಾ ಇತಿಹಾಸ ವೀಕ್ಷಣೆ, ಆಸ್ಪತ್ರೆ ಹುಡುಕಾಟ ಹಾಗೂ ದೂರು ನಿವಾರಣೆಯಂತಹ ಸೇವೆಗಳನ್ನು ಪಡೆಯಲಿದ್ದಾರೆ. ‘ಆಯುಷ್ಮಾನ್ ಸಾರಥಿ’ ವಾಟ್ಸಾಪ್ ಚಾಟ್‌ಬಾಟ್ ಕೂಡ ಇದೇ ಸೇವೆಗಳನ್ನು ಸುಲಭವಾಗಿ ಒದಗಿಸಲಿದೆ.
ಇದರೊಂದಿಗೆ ರಾಷ್ಟ್ರೀಯ ಆರೋಗ್ಯ ಹಕ್ಕುಗಳ ವಿನಿಮಯ (NHCX), ಏಕೀಕೃತ ಆರೋಗ್ಯ ಇಂಟರ್ಫೇಸ್ (UHI) ಹಾಗೂ ಇ-ಸುಶ್ರುತ್ ಕ್ಲಿನಿಕ್‌ಗಳಿಗೂ ಚಾಲನೆ ನೀಡಲಾಗುತ್ತಿದೆ. ಇವು ಆರೋಗ್ಯ ವಿಮೆ ಕ್ಲೈಮ್ ಪ್ರಕ್ರಿಯೆ, ಆರೋಗ್ಯ ಸೇವೆಗಳ ಪರಸ್ಪರ ಸಂಪರ್ಕ ಹಾಗೂ ಕ್ಲಿನಿಕಲ್ ಕಾರ್ಯವಿಧಾನಗಳ ಡಿಜಿಟಲೀಕರಣಕ್ಕೆ ನೆರವಾಗಲಿವೆ.
ಆರೋಗ್ಯ ಡೇಟಾ ಪ್ರಮಾಣೀಕರಣ ಮತ್ತು ಪರಸ್ಪರ ಕಾರ್ಯಸಾಧ್ಯತೆಯನ್ನು ಹೆಚ್ಚಿಸಲು ಡ್ರಗ್ ರಿಜಿಸ್ಟ್ರಿ, ಕಾಮನ್ LOINC ಕೋಡ್ಸ್ ಫಾರ್ ಇಂಡಿಯಾ (CLCI) ಮತ್ತು ಭಾರತ್ ಆರೋಗ್ಯ ಪರಿಭಾಷಾ ಸೇವೆ (BHTS)ಗಳನ್ನೂ ಸರ್ಕಾರ ಪರಿಚಯಿಸಲಿದೆ.
ಈ ಉಪಕ್ರಮಗಳು ದೇಶಾದ್ಯಂತ ಆರೋಗ್ಯ ಸೇವೆಗಳನ್ನು ಹೆಚ್ಚು ಸುಲಭ, ವೇಗ ಹಾಗೂ ಸಂಪರ್ಕಿತವಾಗಿಸಲು ನೆರವಾಗಲಿವೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ.
