ನವದೆಹಲಿ: ಅರುಣಾಚಲ ಪ್ರದೇಶ ಸರ್ಕಾರದೊಂದಿಗೆ ಸಮಾಲೋಚನೆ ನಡೆಸಿದ ಬಳಿಕ ಕೇಂದ್ರ ಸರ್ಕಾರ ರಾಜ್ಯದ 27 ಸ್ಥಳಗಳು ಹಾಗೂ ಭೌಗೋಳಿಕ ವೈಶಿಷ್ಟ್ಯಗಳನ್ನು ಸರ್ವೇ ಆಫ್ ಇಂಡಿಯಾದ ಅಧಿಕೃತ ನಕ್ಷೆಗಳಲ್ಲಿ ಪ್ರಮಾಣಿತ ಹೆಸರುಗಳೊಂದಿಗೆ ಗುರುತಿಸಿದೆ.
ಸ್ಥಳಗಳ ನಿಖರ ಗುರುತಿಸುವಿಕೆ, ಅಧಿಕೃತ ನಕ್ಷೆಗಳಲ್ಲಿ ಏಕರೂಪದ ಪ್ರಾತಿನಿಧ್ಯ ಹಾಗೂ ಸಾರ್ವಜನಿಕರಲ್ಲಿ ಅವುಗಳ ಬಗ್ಗೆ ಅರಿವು ಹೆಚ್ಚಿಸುವುದು ಈ ಕ್ರಮದ ಉದ್ದೇಶವಾಗಿದೆ ಎಂದು ಸರ್ಕಾರ ತಿಳಿಸಿದೆ.
ಅಧಿಕೃತವಾಗಿ ಗುರುತಿಸಲಾದ 27 ಸ್ಥಳಗಳ ಪಟ್ಟಿಯಲ್ಲಿ ಲಾಂಗ್ಜು, ಮಜಾ, ಬಿಸಾ, ಬಾರಾ ಕುಂಡುನ್, ಛೋಟಾ ಕುಂಡುನ್, ಧನ್ ಬಾರಿ, ಪ್ರಿತ್ನಗರ, ಬುದ್ಧಮಂದಿರ್, ಜೈರಾಂಪುರ್, ರಾಮನಗರ, ಜಸ್ವಂತ್ ಘರ್, ಸಾಗರ್, ಪದ್ಮಾ, ಜ್ಯೋತಿನಗರ, ಬೈಸಾಖಿ, ಶಿವಾಜಿ ನಗರ, ಸನ್ಪುರ ಹಾಗೂ ಕಮ್ಲಾಂಗ್ ನಗರ ಸೇರಿವೆ.
ಇದರ ಜೊತೆಗೆ ಡ್ಜೋ ಲಾ, ರಿಜಾ ಲಾ, ಪುಕುರ್ ಲಾ ಮತ್ತು ಥಾಗ್ ಲಾ ಸೇರಿದಂತೆ ಹಲವು ಪರ್ವತ ಮಾರ್ಗಗಳನ್ನೂ ಪಟ್ಟಿಗೆ ಸೇರಿಸಲಾಗಿದೆ. ಸಂಭೋ ಸರೋವರ ಹಾಗೂ ಸ್ಮಾರಕವಾಗಿ ವರ್ಗೀಕರಿಸಲಾದ ಶೇರ್-ಎ-ಥಾಪ ಸ್ಮಾರಕವೂ ಅಧಿಕೃತ ನಕ್ಷೆಯಲ್ಲಿ ಸ್ಥಾನ ಪಡೆದಿವೆ.
ಈ 27 ಸ್ಥಳಗಳು ಮತ್ತು ಭೌಗೋಳಿಕ ವೈಶಿಷ್ಟ್ಯಗಳನ್ನು ಅವುಗಳ ಪ್ರಮಾಣಿತ ಹೆಸರು ಹಾಗೂ ಸಂಬಂಧಿತ ವರ್ಗೀಕರಣದೊಂದಿಗೆ ಅರುಣಾಚಲ ಪ್ರದೇಶದ ಸರ್ವೇ ಆಫ್ ಇಂಡಿಯಾ ನಕ್ಷೆಗಳಲ್ಲಿ ಸೇರಿಸಲಾಗಿದೆ.
ಈ ಔಪಚಾರಿಕ ಗುರುತಿಸುವಿಕೆಯಿಂದ ಅಧಿಕೃತ ದಾಖಲೆಗಳು ಹಾಗೂ ನಕ್ಷೆಗಳಲ್ಲಿ ಸ್ಥಳಗಳ ಹೆಸರುಗಳ ಏಕರೂಪತೆ ಕಾಪಾಡಿಕೊಳ್ಳಲು ಸಾಧ್ಯವಾಗಲಿದೆ. ಜತೆಗೆ, ಸ್ಥಳಗಳ ನಿಖರ ಗುರುತಿಸುವಿಕೆ ಮತ್ತು ಸಾರ್ವಜನಿಕರಲ್ಲಿ ಅವುಗಳ ಕುರಿತು ಜಾಗೃತಿ ಹೆಚ್ಚಿಸಲು ಸಹಕಾರಿಯಾಗಲಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
