ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ‘ಟಾಕ್ಸಿಕ್’ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಆರಂಭ ಕಂಡಿದೆ. ಬಿಡುಗಡೆಯ ಮೊದಲ ದಿನವೇ ಭಾರತದಲ್ಲಿ ₹117 ಕೋಟಿಗೂ ಅಧಿಕ ಗಳಿಕೆ ದಾಖಲಿಸಿದ್ದು, ದೇಶದಲ್ಲಿ ಮೊದಲ ದಿನ ಅತಿ ಹೆಚ್ಚು ಗಳಿಕೆ ಮಾಡಿದ ಸಿನಿಮಾಗಳ ಪಟ್ಟಿಯಲ್ಲಿ 6ನೇ ಸ್ಥಾನ ಪಡೆದಿದೆ.
ವಿಶ್ವದಾದ್ಯಂತ ಮೊದಲ ದಿನ ‘ಟಾಕ್ಸಿಕ್’ ₹140 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿದೆ ಎಂದು ವರದಿಗಳು ತಿಳಿಸಿವೆ. ಹಿಂದಿ ಮಾರುಕಟ್ಟೆಯಿಂದ ಬಂದ ಭರ್ಜರಿ ಗಳಿಕೆ ಚಿತ್ರದ ಒಟ್ಟಾರೆ ಕಲೆಕ್ಷನ್‌ಗೆ ಪ್ರಮುಖ ಕೊಡುಗೆ ನೀಡಿದೆ.
ಆದರೆ ಯಶ್ ಅವರ ಹಿಂದಿನ ಬ್ಲಾಕ್‌ಬಸ್ಟರ್ ‘ಕೆಜಿಎಫ್ ಚಾಪ್ಟರ್ 2’ ದಾಖಲೆಯನ್ನು ‘ಟಾಕ್ಸಿಕ್’ ಹಿಂದಿಕ್ಕಲು ಸಾಧ್ಯವಾಗಿಲ್ಲ. ‘ಕೆಜಿಎಫ್ 2’ ಮೊದಲ ದಿನ ಭಾರತದಲ್ಲಿ ₹127 ಕೋಟಿ ಗಳಿಸಿ ಪಟ್ಟಿಯಲ್ಲಿ 5ನೇ ಸ್ಥಾನದಲ್ಲಿದೆ.
ಮೊದಲ ದಿನ ಅತಿ ಹೆಚ್ಚು ಗಳಿಕೆ ಮಾಡಿದ ಚಿತ್ರಗಳ ಪಟ್ಟಿಯಲ್ಲಿ ‘ಪುಷ್ಪ 2’ ₹191 ಕೋಟಿಯೊಂದಿಗೆ ಅಗ್ರಸ್ಥಾನದಲ್ಲಿದೆ. ಬಳಿಕ ‘ಧುಂಧರ್ 2’ ₹138 ಕೋಟಿ, ‘ಬಾಹುಬಲಿ: ದಿ ಕನ್‌ಕ್ಲೂಷನ್’ ₹133 ಕೋಟಿ ಹಾಗೂ ‘ಆರ್‌ಆರ್‌ಆರ್’ ₹131 ಕೋಟಿಯೊಂದಿಗೆ ಕ್ರಮವಾಗಿ ಮುಂದಿನ ಸ್ಥಾನಗಳಲ್ಲಿವೆ.
‘ಟಾಕ್ಸಿಕ್’ ಬಳಿಕ ‘ಕಲ್ಕಿ 2898 ಎಡಿ’, ‘ಸಲಾರ್’, ‘ಜವಾನ್’ ಹಾಗೂ ‘OG’ ಸಿನಿಮಾಗಳು ಪಟ್ಟಿಯಲ್ಲಿ ಸ್ಥಾನ ಪಡೆದಿವೆ.
ಸೀಕ್ವೆಲ್ ಚಿತ್ರಗಳೇ ಮೊದಲ ಐದು ಸ್ಥಾನಗಳಲ್ಲಿ ಪ್ರಾಬಲ್ಯ ಸಾಧಿಸಿರುವ ಸಂದರ್ಭದಲ್ಲಿ, ಸೀಕ್ವೆಲ್ ಅಲ್ಲದ ‘ಟಾಕ್ಸಿಕ್’ ಮೊದಲ ದಿನವೇ ₹117 ಕೋಟಿ ಗಳಿಸಿರುವುದು ಗಮನಾರ್ಹ ಸಾಧನೆಯಾಗಿದೆ. ಯಶ್ ಅವರ ಜನಪ್ರಿಯತೆ ಹಾಗೂ ಚಿತ್ರದ ಮೇಲಿನ ಭಾರಿ ನಿರೀಕ್ಷೆ ಈ ಬೃಹತ್ ಓಪನಿಂಗ್‌ಗೆ ಪ್ರಮುಖ ಕಾರಣವಾಗಿದೆ.
