ಮುಂಬೈ: ಬಾಲಿವುಡ್ ನಟಿ ಕತ್ರಿನಾ ಕೈಫ್ ಅವರ ದೇಹದ ತೂಕದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ನಡೆಯುತ್ತಿರುವ ಟ್ರೋಲ್ ವಿರುದ್ಧ ನಟಿ ಹಾಗೂ ಮಾಜಿ ಸಂಸದೆ ರಮ್ಯಾ ಧ್ವನಿ ಎತ್ತಿದ್ದಾರೆ.
ತಾಯಿಯಾದ ಬಳಿಕ ಕತ್ರಿನಾ ಅವರ ದೇಹದಲ್ಲಿ ಸಹಜ ಬದಲಾವಣೆಗಳು ಕಂಡುಬಂದಿವೆ. ಇತ್ತೀಚೆಗೆ ಪತಿ ವಿಕ್ಕಿ ಕೌಶಲ್ ಜೊತೆ ಅಂಬಾನಿ ನಿವಾಸದಲ್ಲಿ ನಡೆದ ಗಣೇಶೋತ್ಸವದಲ್ಲಿ ಅವರು ಕಾಣಿಸಿಕೊಂಡಿದ್ದರು. ಈ ವೇಳೆ ತೆಗೆದ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದು, ಅವರ ದೇಹದ ಬದಲಾವಣೆಯನ್ನು ಮುಂದಿಟ್ಟುಕೊಂಡು ಕೆಲವರು ಬಾಡಿ ಶೇಮಿಂಗ್ ಮಾಡಿದ್ದರು.ಈ ಬೆಳವಣಿಗೆಗೆ ಪ್ರತಿಕ್ರಿಯಿಸಿರುವ ರಮ್ಯಾ, ಮಹಿಳೆಯ ದೇಹದ ಆಕಾರವನ್ನು ಆಧರಿಸಿ ಅವಮಾನಿಸುವುದನ್ನು ತೀವ್ರವಾಗಿ ಖಂಡಿಸಿದ್ದಾರೆ.
‘ಬಾಡಿ ಶೇಮಿಂಗ್ ತಪ್ಪು’
ತಮ್ಮ ಎಕ್ಸ್ ಖಾತೆಯಲ್ಲಿ ರಮ್ಯಾ, ಮಹಿಳೆಯನ್ನು ದೇಹದ ಕಾರಣಕ್ಕೆ ಅವಮಾನಿಸಬಾರದು ಎನ್ನಲು ಆಕೆಯ ಬ್ಯಾಂಕ್ ಬ್ಯಾಲೆನ್ಸ್ ನೋಡುವ ಅಗತ್ಯವಿಲ್ಲ ಅಥವಾ ಅದಕ್ಕೊಂದು ನಿರ್ದಿಷ್ಟ ಕಾರಣ ಬೇಕಿಲ್ಲ ಎಂದು ಹೇಳಿದ್ದಾರೆ. ಮಹಿಳೆಯ ದೇಹದ ಆಕಾರವನ್ನು ನೋಡಿ ಅವಮಾನಿಸುವುದು ತಪ್ಪು. ಇದಕ್ಕೆ ಯಾವುದೇ ಷರತ್ತು ಅಥವಾ ವಿನಾಯಿತಿ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
‘ಪ್ರೈಮ್ ಹಂತ’ ಎಂದರೆ ಏನು?
ಮಹಿಳೆಯ ಜೀವನವನ್ನು ‘ಪ್ರೈಮ್ ಹಂತ’ ಮತ್ತು ‘ಮುಕ್ತಾಯದ ಹಂತ’ ಎಂದು ವಿಂಗಡಿಸುವ ಪ್ರವೃತ್ತಿಯನ್ನೂ ರಮ್ಯಾ ಪ್ರಶ್ನಿಸಿದ್ದಾರೆ. ಮಹಿಳೆಯ ಅತ್ಯುತ್ತಮ ಹಂತವೆಂದರೆ ಮ್ಯಾಗಜೀನ್ ಮುಖಪುಟದ ಮಾಡೆಲ್ನಂತೆ ಕಾಣುವ ಕೆಲವೇ ವರ್ಷಗಳು ಎಂದು ನಿರ್ಧರಿಸಿದವರು ಯಾರು ಎಂದು ಪ್ರಶ್ನಿಸಿದ್ದಾರೆ.
ಗರ್ಭಧಾರಣೆ, ಋತುಬಂಧದ ಪೂರ್ವದ ಹಂತ ಸೇರಿದಂತೆ ಜೀವನದ ವಿವಿಧ ಹಂತಗಳಲ್ಲಿ ಮಹಿಳೆಯ ದೇಹದಲ್ಲಿ ಬದಲಾವಣೆಗಳು ಸಹಜವಾಗಿ ಸಂಭವಿಸುತ್ತವೆ. ಅದು ಅವನತಿಯಲ್ಲ, ಬದುಕಿನ ಸಹಜ ಭಾಗ ಎಂದು ರಮ್ಯಾ ಹೇಳಿದ್ದಾರೆ.
‘ಕತ್ರಿನಾ ಈಗಲೂ ಪ್ರೈಮ್ನಲ್ಲಿದ್ದಾರೆ’
ಮಹಿಳೆಯ ಅತ್ಯುತ್ತಮ ಹಂತವನ್ನು ಕೇವಲ ಸಣ್ಣ ಸೊಂಟದ ಅಳತೆಯಿಂದ ನಿರ್ಧರಿಸಬಾರದು. ಶಕ್ತಿ, ವಿವೇಕ, ಕೆಲಸ, ಸಂತೋಷ ಹಾಗೂ ಆಕೆ ಜೀವನದಲ್ಲಿ ಕಟ್ಟಿಕೊಂಡಿರುವ ಎಲ್ಲವೂ ಆಕೆಯ ‘ಪ್ರೈಮ್’ನ ಭಾಗ ಎಂದು ರಮ್ಯಾ ಹೇಳಿದ್ದಾರೆ.
“In her prime,” as if women come with an expiry date. Who decided a woman’s prime is the handful of years she looks like a magazine cover? Our bodies change through pregnancy, perimenopause and life itself. That isn’t decline. That’s living.
Prime isn’t a waistline. It’s… pic.twitter.com/GSgqUWWwr8— Ramya/Divya Spandana (@divyaspandana) September 17, 2026
‘ಕತ್ರಿನಾ ಸದ್ಯ ತಮ್ಮ ಅತ್ಯುತ್ತಮ ಹಂತದಲ್ಲಿದ್ದಾರೆ. ಪ್ರತಿಯೊಬ್ಬ ಮಹಿಳೆಯೂ ಹುಟ್ಟಿದ ದಿನದಿಂದ ಜೀವನದ ಕೊನೆಯ ದಿನದವರೆಗೂ ಅತ್ಯುತ್ತಮ ಹಂತದಲ್ಲಿಯೇ ಇರುತ್ತಾಳೆ’ ಎಂದು ಅವರು ಹೇಳಿದ್ದಾರೆ.
‘ಹಾಗಾದರೆ ಕಡಿಮೆ ಹಣವಿದ್ದರೆ ಅವಮಾನಿಸಬಹುದೇ?’
ಮಹಿಳೆಯ ಬ್ಯಾಂಕ್ ಬ್ಯಾಲೆನ್ಸ್ ಅಥವಾ ಆಕೆ ತಾಯಿಯಾಗಿದ್ದಾಳೆಯೇ ಎಂಬುದನ್ನು ಆಧರಿಸಿ ದೇಹದ ಬದಲಾವಣೆಗಳನ್ನು ಸಮರ್ಥಿಸುವವರನ್ನೂ ರಮ್ಯಾ ತರಾಟೆಗೆ ತೆಗೆದುಕೊಂಡಿದ್ದಾರೆ.
ಕಡಿಮೆ ಹಣವಿರುವ ಮಹಿಳೆಯನ್ನು ಆಕೆಯ ದೇಹದ ಆಕಾರದ ಕಾರಣಕ್ಕೆ ಅವಮಾನಿಸಬಹುದೇ? ಮಗುವಾದ ಬಳಿಕ ತೂಕ ಹೆಚ್ಚಾಗುವುದು ಸಹಜ ಎನ್ನುವುದಾದರೆ, ಮಗುವಾಗದ ಮಹಿಳೆಯ ತೂಕವನ್ನು ಏಕೆ ಪ್ರಶ್ನಿಸಬೇಕು? ಇಂತಹ ಸಮರ್ಥನೆಗಳ ಅರ್ಥವೇನು ಎಂದು ರಮ್ಯಾ ಪ್ರಶ್ನಿಸಿದ್ದಾರೆ.
ಕತ್ರಿನಾ ಕೈಫ್ ಅವರನ್ನು ಗುರಿಯಾಗಿಸಿಕೊಂಡು ನಡೆಯುತ್ತಿರುವ ಬಾಡಿ ಶೇಮಿಂಗ್ ಚರ್ಚೆಯ ನಡುವೆ ರಮ್ಯಾ ಅವರ ಈ ಹೇಳಿಕೆಗಳು ಸಾಮಾಜಿಕ ಜಾಲತಾಣದಲ್ಲಿ ಗಮನ ಸೆಳೆದಿವೆ.
