ರಾಷ್ಟ್ರ ರಾಜಧಾನಿಯಲ್ಲಿ ಉಸಿರಾಡುವುದೇ ಕಷ್ಟ: ಅಪಾಯಕಾರಿ ಮಟ್ಟಕ್ಕೆ ತಲುಪಿದ ವಾಯುಮಾಲಿನ್ಯ

ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ವಾಯುಮಾಲಿನ್ಯ ತೀವ್ರ ಸ್ವರೂಪ ಪಡೆದುಕೊಂಡಿದ್ದು, ಶುಕ್ರವಾರ ಬೆಳಿಗ್ಗೆ ವಾಯು ಗುಣಮಟ್ಟ ಸೂಚ್ಯಂಕ (AQI) 494ಕ್ಕೆ ಏರಿಕೆಯಾಗಿದೆ. ದಟ್ಟ ಮಂಜು ಹಾಗೂ ವಿಷಕಾರಿ ಹೊಗೆಯಿಂದ ನಗರ ಆವರಿಸಿಕೊಂಡಿದ್ದು, ಜನರು ಉಸಿರಾಟದ ಸಮಸ್ಯೆ ಮತ್ತು ಕಳಪೆ ಗೋಚರತೆಯಿಂದ ತೊಂದರೆ ಅನುಭವಿಸುವಂತಾಗಿದೆ.

ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಮಾಹಿತಿ ಪ್ರಕಾರ, ಬೆಳಿಗ್ಗೆ 7.31ರ ವೇಳೆಗೆ ದೆಹಲಿಯ ಸರಾಸರಿ AQI 494 ದಾಖಲಾಗಿದೆ. ಇದು ಅತ್ಯಂತ ಗಂಭೀರ ಮಾಲಿನ್ಯದ ಮಟ್ಟವಾಗಿದೆ. ಹಲವು ಪ್ರದೇಶಗಳಲ್ಲಿ ಗೋಚರತೆ ಕುಸಿದಿದ್ದು, ವಾಹನ ಸಂಚಾರಕ್ಕೂ ಅಡ್ಡಿಯಾಗಿದೆ.

ಐಐಟಿ ದೆಹಲಿ ಪ್ರದೇಶದಲ್ಲಿ 488, ಐಟಿಒನಲ್ಲಿ 455, ಆನಂದ್ ವಿಹಾರ್‌ನಲ್ಲಿ 419, ರೋಹಿಣಿಯಲ್ಲಿ 413 ಹಾಗೂ ರಜೋಕ್ರಿ ಗಡಿಯಲ್ಲಿ 402 AQI ದಾಖಲಾಗಿದೆ. ಆರ್.ಕೆ. ಪುರಂನಲ್ಲಿ 391, ಮಂದಿರ್ ಮಾರ್ಗ್‌ನಲ್ಲಿ 378, ದ್ವಾರಕಾ ಎಕ್ಸ್‌ಪ್ರೆಸ್‌ವೇಯಲ್ಲಿ 369, ಉತ್ತಮ್ ನಗರದಲ್ಲಿ 363 ಮತ್ತು ಲೋಧಿ ರಸ್ತೆಯಲ್ಲಿ 341ರಷ್ಟು ಮಾಲಿನ್ಯ ದಾಖಲಾಗಿದೆ. ಧೌಲಾ ಕುವಾನ್ ಪ್ರದೇಶದಲ್ಲಿ ಮಾತ್ರ 161 AQI ದಾಖಲಾಗಿದೆ.

ಮಾಲಿನ್ಯ ನಿಯಂತ್ರಣಕ್ಕಾಗಿ ದೆಹಲಿ ಸರ್ಕಾರ ಹಲವು ಕ್ರಮಗಳನ್ನು ಕೈಗೊಂಡಿದೆ. ನಗರದ ವಿವಿಧ ಭಾಗಗಳಲ್ಲಿ ನೀರು ಸಿಂಪಡಿಸುವ ವಾಹನಗಳನ್ನು ನಿಯೋಜಿಸಿ, ಗಾಳಿಯಲ್ಲಿರುವ ಧೂಳಿನ ಕಣಗಳನ್ನು ನಿಯಂತ್ರಿಸಲು ಪ್ರಯತ್ನಿಸಲಾಗುತ್ತಿದೆ.

ಇದರ ನಡುವೆ, ದೆಹಲಿಯ ವಾಯುಮಾಲಿನ್ಯದ ನೈಜ ಪ್ರಮಾಣವನ್ನು ಬಿಜೆಪಿ ಸರ್ಕಾರ ಮರೆಮಾಚುತ್ತಿದೆ ಎಂದು ಆಮ್ ಆದ್ಮಿ ಪಕ್ಷದ ನಾಯಕ ಸೌರಭ್ ಭಾರದ್ವಾಜ್ ಆರೋಪಿಸಿದ್ದಾರೆ. ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ ಪ್ರಕಟಿಸುವ AQI ಅಂಕಿಅಂಶಗಳ ವಿಶ್ವಾಸಾರ್ಹತೆಯ ಬಗ್ಗೆಯೂ ಅವರು ಅನುಮಾನ ವ್ಯಕ್ತಪಡಿಸಿದ್ದಾರೆ.

ಶುದ್ಧ ಇಂಧನ ಮತ್ತು ಶುದ್ಧ ಗಾಳಿ ಸಂಶೋಧನಾ ಕೇಂದ್ರ (CREA) ವರದಿಯನ್ನು ಉಲ್ಲೇಖಿಸಿದ ಅವರು, ಸರ್ಕಾರಿ ವೆಬ್‌ಸೈಟ್‌ಗಳಲ್ಲಿ ತೋರಿಸಲಾಗುತ್ತಿರುವ ಅಂಕಿಅಂಶಗಳಿಗಿಂತ ವಾಸ್ತವಿಕ ಮಾಲಿನ್ಯದ ಪ್ರಮಾಣ ಶೇ.49ರಷ್ಟು ಹೆಚ್ಚಿದೆ ಎಂದು ಹೇಳಿದ್ದಾರೆ. 370 AQI ದಾಖಲಾಗಿರುವ ಸಂದರ್ಭದಲ್ಲಿ ನೈಜ ಮಾಲಿನ್ಯದ ಮಟ್ಟ 560 ಅಥವಾ ಅದಕ್ಕಿಂತ ಹೆಚ್ಚಿರಬಹುದು ಎಂದು ಪ್ರತಿಪಾದಿಸಿದ್ದಾರೆ.

AQI ಪ್ರಮಾಣ 999 ಮೀರಿದರೆ ಅದನ್ನು ದಾಖಲಿಸಲು ಅಥವಾ ಪ್ರದರ್ಶಿಸಲು ಸಾಧ್ಯವಾಗುವುದಿಲ್ಲ ಎಂಬ CPCB ವಿವರಣೆಯನ್ನೂ ಅವರು ಪ್ರಶ್ನಿಸಿದ್ದಾರೆ. ಮಾಲಿನ್ಯ 999ಕ್ಕಿಂತ ಹೆಚ್ಚಾದಾಗಲೂ ನೈಜ ಪ್ರಮಾಣವನ್ನು ತೋರಿಸದೆ ಶೂನ್ಯ ಎಂದು ಪ್ರದರ್ಶಿಸಲಾಗುತ್ತದೆ ಎಂಬುದು ಅವರ ಆರೋಪವಾಗಿದೆ.

ಇದು ದೆಹಲಿಯ ಎರಡು ಕೋಟಿ ಜನರಿಗೆ ಮಾಡುತ್ತಿರುವ ವಂಚನೆಯಾಗಿದ್ದು, ಮಕ್ಕಳು ಮತ್ತು ವೃದ್ಧರ ಆರೋಗ್ಯಕ್ಕೆ ಗಂಭೀರ ಅಪಾಯ ತಂದೊಡ್ಡುತ್ತಿದೆ ಎಂದು ಭಾರದ್ವಾಜ್ ದೂರಿದ್ದಾರೆ.

CREA ವರದಿಯು ದೆಹಲಿಯ 59 ಮಾಲಿನ್ಯ ಮಾಪನ ಕೇಂದ್ರಗಳಿಂದ ಸಂಗ್ರಹಿಸಿದ ಗಂಟೆವಾರು PM2.5 ದತ್ತಾಂಶವನ್ನು ಆಧರಿಸಿದೆ. ನವೆಂಬರ್ 8ರ ಸಂಜೆ 4ರಿಂದ ನವೆಂಬರ್ 9ರ ಸಂಜೆ 4ರವರೆಗಿನ ಅವಧಿಯಲ್ಲಿ 255 ಗಂಟೆವಾರು ಮಾಪನ ದಾಖಲೆಗಳು ಲಭ್ಯವಿರಲಿಲ್ಲ ಎಂದು ವರದಿ ತಿಳಿಸಿದೆ.

ಇದೇ ಅವಧಿಯಲ್ಲಿ 24 ಗಂಟೆಗಳ ಸರಾಸರಿ PM2.5 ಸಾಂದ್ರತೆಯು ಪ್ರತಿ ಘನ ಮೀಟರ್‌ಗೆ 269 ಮೈಕ್ರೋಗ್ರಾಂನಿಂದ 400 ಮೈಕ್ರೋಗ್ರಾಂಗೆ ಏರಿಕೆಯಾಗಿದ್ದು, ಶೇ.49ರಷ್ಟು ಹೆಚ್ಚಳವಾಗಿದೆ ಎಂದು ವರದಿ ಹೇಳಿದೆ.