ನವದೆಹಲಿ: ದಂತ ಇಂಪ್ಲಾಂಟ್ ಚಿಕಿತ್ಸೆಯಲ್ಲಿ ಶಸ್ತ್ರಚಿಕಿತ್ಸಾ ವಿಧಾನಗಳ ಸಂಖ್ಯೆಯನ್ನು ಕಡಿಮೆ ಮಾಡುವ ಉದ್ದೇಶದಿಂದ ಭಾರತೀಯ ಸಂಶೋಧಕರು ಹೊಸ ದ್ವಿ-ಪದರದ ಸಿಂಗಲ್‌-ಪೀಸ್‌ ಡೆಂಟಲ್‌ ಇಂಪ್ಲಾಂಟ್ ಅಭಿವೃದ್ಧಿಪಡಿಸಿದ್ದಾರೆ. ಟೈಟಾನಿಯಂ ಮಿಶ್ರಲೋಹ ಮತ್ತು ಜಿರ್ಕೋನಿಯಾವನ್ನು ಒಂದೇ ರಚನೆಯಲ್ಲಿ ಸಂಯೋಜಿಸಿರುವ ಈ ಇಂಪ್ಲಾಂಟ್ ಬಾಳಿಕೆ, ಬಲ ಹಾಗೂ ಜೈವಿಕ ಹೊಂದಾಣಿಕೆಯನ್ನು ಸುಧಾರಿಸುವ ಸಾಧ್ಯತೆ ಹೊಂದಿದೆ.
ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯ (DST) ಅಧೀನದ ಸ್ವಾಯತ್ತ ಸಂಸ್ಥೆ ಇಂಟರ್‌ನ್ಯಾಷನಲ್ ಅಡ್ವಾನ್ಸ್‌ಡ್ ರಿಸರ್ಚ್ ಸೆಂಟರ್ ಫಾರ್ ಪೌಡರ್ ಮೆಟಲರ್ಜಿ ಅಂಡ್ ನ್ಯೂ ಮೆಟೀರಿಯಲ್ಸ್ (ARCI) ವಿಜ್ಞಾನಿಗಳು ಈ ತಂತ್ರಜ್ಞಾನ ಅಭಿವೃದ್ಧಿಪಡಿಸಿದ್ದಾರೆ.
ಎರಡು ವಸ್ತುಗಳ ಒಂದೇ ರಚನೆ
ಸಾಂಪ್ರದಾಯಿಕ ದಂತ ಇಂಪ್ಲಾಂಟ್‌ಗಳಲ್ಲಿ ದವಡೆಯ ಮೂಳೆಯಲ್ಲಿ ಅಳವಡಿಸುವ ಫಿಕ್ಸ್ಚರ್‌, ಅಬ್ಯುಟ್‌ಮೆಂಟ್‌ ಮತ್ತು ಕಿರೀಟ ಸೇರಿದಂತೆ ಹಲವು ಘಟಕಗಳಿರುತ್ತವೆ. ಅವುಗಳ ಜಂಕ್ಷನ್‌ನಲ್ಲಿ ಉಂಟಾಗುವ ಚಲನೆ ಮೂಳೆಯೊಂದಿಗೆ ಇಂಪ್ಲಾಂಟ್ ಬೆಸೆಯುವ ಪ್ರಕ್ರಿಯೆಗೆ ಅಡ್ಡಿಯಾಗಬಹುದು ಹಾಗೂ ಕೆಲವೊಮ್ಮೆ ಇಂಪ್ಲಾಂಟ್ ಸಡಿಲಗೊಳ್ಳುವ ಸಾಧ್ಯತೆಯೂ ಇರುತ್ತದೆ.
ಹೊಸ ವಿನ್ಯಾಸದಲ್ಲಿ Ti6Al4V ಟೈಟಾನಿಯಂ ಮಿಶ್ರಲೋಹವನ್ನು ದವಡೆಯ ಮೂಳೆಯೊಂದಿಗೆ ಉತ್ತಮ ಏಕೀಕರಣ ಹಾಗೂ ಭಾರ ಹೊರುವ ಆಧಾರಕ್ಕಾಗಿ ಬಳಸಲಾಗಿದೆ. ಯಟ್ರಿಯಾ-ಸ್ಥಿರಗೊಳಿಸಿದ ಜಿರ್ಕೋನಿಯಾ (YSZ) ಕಿರೀಟ ಭಾಗವನ್ನು ರೂಪಿಸಲಿದ್ದು, ಉಡುಗೆ ನಿರೋಧಕತೆ ಮತ್ತು ಉತ್ತಮ ಸೌಂದರ್ಯ ನೀಡುತ್ತದೆ.
99.5% ಸಾಂದ್ರತೆ
ಸ್ಪಾರ್ಕ್ ಪ್ಲಾಸ್ಮಾ ಸಿಂಟರಿಂಗ್ (SPS) ತಂತ್ರಜ್ಞಾನ ಬಳಸಿ ಎರಡೂ ವಸ್ತುಗಳನ್ನು ಒಂದೇ ಹಂತದಲ್ಲಿ ಸಂಸ್ಕರಿಸಲಾಗಿದೆ. ವಿಶೇಷ ಟೇಪರ್ಡ್ ಗ್ರ್ಯಾಫೈಟ್ ಡೈ ಮೂಲಕ ವಿಭಿನ್ನ ಸಿಂಟರಿಂಗ್ ತಾಪಮಾನ ಹೊಂದಿರುವ ವಸ್ತುಗಳನ್ನು ಒಟ್ಟಿಗೆ ಸಾಂದ್ರೀಕರಿಸಲಾಗಿದೆ.
ಇಂಪ್ಲಾಂಟ್ 99.5% ಸಾಂದ್ರತೆ ಸಾಧಿಸಿದ್ದು, ಬಿರುಕು ಅಥವಾ ಪದರ ಬೇರ್ಪಡುವಿಕೆ ಇಲ್ಲದ ಬಲಿಷ್ಠ ಇಂಟರ್‌ಫೇಸ್‌ ಹೊಂದಿದೆ. ಪರೀಕ್ಷೆಗಳಲ್ಲಿ 1,350 HV ಗರಿಷ್ಠ ಗಡಸುತನ, ಸುಮಾರು 1,550 MPa ಸಂಕೋಚನ ಶಕ್ತಿ ಮತ್ತು 310 MPa ಬಾಗುವ ಶಕ್ತಿ ದಾಖಲಾಗಿದೆ.
ಪ್ರಯೋಗಾಲಯ ಪರೀಕ್ಷೆಗಳಲ್ಲಿ ವಸ್ತು ವಿಷಕಾರಿ ಪರಿಣಾಮವಿಲ್ಲದೆ ಉತ್ತಮ ಜೈವಿಕ ಹೊಂದಾಣಿಕೆ ಹೊಂದಿರುವುದು ಕಂಡುಬಂದಿದೆ. ಮುಂದಿನ ಹಂತದಲ್ಲಿ 5-ಅಕ್ಷದ CNC ಯಂತ್ರ ಬಳಸಿ ಇಂಪ್ಲಾಂಟ್‌ನ ಥ್ರೆಡ್‌ ವಿನ್ಯಾಸವನ್ನು ಸುಧಾರಿಸುವ ಕಾರ್ಯ ನಡೆಯುತ್ತಿದೆ.
Materials Lettersನಲ್ಲಿ ಪ್ರಕಟವಾದ ಸಂಶೋಧನೆಯು ಕೈಗೆಟುಕುವ ಹಾಗೂ ಹೆಚ್ಚಿನ ಕಾರ್ಯಕ್ಷಮತೆಯ ದೇಶೀಯ ದಂತ ಇಂಪ್ಲಾಂಟ್‌ಗಳ ಅಭಿವೃದ್ಧಿಗೆ ನೆರವಾಗುವ ನಿರೀಕ್ಷೆಯಿದೆ.
