ಅಟ್ಲಾಂಟಾ: ಜಾಗತಿಕ ಆರ್ಥಿಕತೆಯ ಸುಸ್ಥಿರತೆಗೆ ಪೂರೈಕೆ ಸರಪಳಿಗಳ ಭದ್ರತೆ ಮತ್ತು ಸ್ಥಿತಿಸ್ಥಾಪಕತೆ ಅತ್ಯಂತ ಮಹತ್ವದ್ದಾಗಿದೆ ಎಂದು ವಿದೇಶಾಂಗ ಸಚಿವ ಡಾ. ಎಸ್. ಜೈಶಂಕರ್ ಹೇಳಿದ್ದಾರೆ.
ಅಟ್ಲಾಂಟಾದಲ್ಲಿ ನಡೆದ ಜಿ20 ಸಭೆಯ ಮೂರನೇ ಪೂರ್ಣಾಧಿವೇಶನದಲ್ಲಿ ಪೂರೈಕೆ ಸರಪಳಿಗಳ ಕುರಿತು ಮಾತನಾಡಿದ ಅವರು, ಕೈಗಾರಿಕೀಕರಣದ ಹಕ್ಕನ್ನು ಉತ್ತೇಜಿಸಬೇಕು. ಸ್ಪರ್ಧೆಯನ್ನು ಗುರಿಯಾಗಿಸಿಕೊಂಡು ನಡೆಯುವ ಅನ್ಯಾಯಯುತ ವ್ಯಾಪಾರ ಪದ್ಧತಿಗಳನ್ನು ದೃಢವಾಗಿ ವಿರೋಧಿಸಬೇಕು ಎಂದು ಪ್ರತಿಪಾದಿಸಿದರು.
ಸಾಂಕ್ರಾಮಿಕ ರೋಗಗಳು, ಸಂಘರ್ಷಗಳು, ಹವಾಮಾನ ವೈಪರೀತ್ಯಗಳು ಹಾಗೂ ಅನಿರೀಕ್ಷಿತ ಘಟನೆಗಳಿಂದ ಜಾಗತಿಕ ಪೂರೈಕೆ ವ್ಯವಸ್ಥೆಗೆ ಅಪಾಯ ಎದುರಾಗುತ್ತಿದೆ. ಇದನ್ನು ಎದುರಿಸಲು ಉತ್ಪಾದನೆ ಮತ್ತು ಸಂಪರ್ಕ ವ್ಯವಸ್ಥೆಗಳಲ್ಲಿ ವೈವಿಧ್ಯೀಕರಣ ಹಾಗೂ ಅಪಾಯ ತಗ್ಗಿಸುವ ಕ್ರಮಗಳು ಅಗತ್ಯ ಎಂದು ಅವರು ತಿಳಿಸಿದರು.
ಜಾಗತಿಕ ಆರ್ಥಿಕತೆಯ ಉತ್ಪಾದನಾ ವ್ಯವಸ್ಥೆಯನ್ನು ವಿವಿಧ ಭೌಗೋಳಿಕ ಪ್ರದೇಶಗಳಿಗೆ ವಿಸ್ತರಿಸುವುದರಿಂದ ಹಣಕಾಸು, ಸಂಪನ್ಮೂಲ, ಉತ್ಪಾದನೆ ಮತ್ತು ಮಾರುಕಟ್ಟೆ ಪಾಲನ್ನು ಅಸ್ತ್ರವಾಗಿ ಬಳಸುವ ಪ್ರವೃತ್ತಿಯನ್ನು ತಡೆಯಬಹುದು ಎಂದು ಅಭಿಪ್ರಾಯಪಟ್ಟರು.
ಜಿ20 ರಾಷ್ಟ್ರಗಳು ಮಾರುಕಟ್ಟೆಗಳ ರಾಜಕೀಯೀಕರಣವನ್ನು ತಡೆಯಲು ಕಾರ್ಯನಿರ್ವಹಿಸಬೇಕು. ರಾಷ್ಟ್ರೀಯ ಹಿತಾಸಕ್ತಿಗಳ ಜತೆಗೆ ಸಾಮೂಹಿಕ ಜಾಗತಿಕ ಹಿತಾಸಕ್ತಿಗೂ ಆದ್ಯತೆ ನೀಡಬೇಕು. ಪಾರದರ್ಶಕ ಹಾಗೂ ಬಹುಮುಖ ಪೂರೈಕೆ ಸರಪಳಿಗಳನ್ನು ಉತ್ತೇಜಿಸುವ ಮೂಲಕ ಜಾಗತಿಕ ಆರ್ಥಿಕತೆಯನ್ನು ಬಹುಪಾಲುದಾರರ ವ್ಯವಸ್ಥೆಯನ್ನಾಗಿ ರೂಪಿಸಬೇಕು ಎಂದು ಜೈಶಂಕರ್ ಕರೆ ನೀಡಿದರು.
