ತಿರುವನಂತಪುರಂ: ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಜಂಟಿ ಸೇನಾ ಸಮರಾಭ್ಯಾಸ ‘ಆಸ್ಟ್ರಾಹಿಂದ್ 2026’ರ ಐದನೇ ಆವೃತ್ತಿ ಸೋಮವಾರ ಕೇರಳದ ತಿರುವನಂತಪುರಂನಲ್ಲಿರುವ ವಿದೇಶಿ ತರಬೇತಿ ಕೇಂದ್ರದಲ್ಲಿ ಆರಂಭವಾಗಿದೆ. ಅಕ್ಟೋಬರ್ 19ರಿಂದ ನವೆಂಬರ್ 1ರವರೆಗೆ ನಡೆಯಲಿರುವ ಈ ಸಮರಾಭ್ಯಾಸದಲ್ಲಿ ಎರಡೂ ದೇಶಗಳ ಸೇನೆಗಳಿಂದ ಸುಮಾರು 120 ಸಿಬ್ಬಂದಿ ಭಾಗವಹಿಸುತ್ತಿದ್ದಾರೆ.
ಭಾರತೀಯ ಸೇನಾ ತುಕಡಿಯಲ್ಲಿ ಗರ್ವಾಲ್ ರೈಫಲ್ಸ್‌ನ ಯೋಧರು ಹಾಗೂ ಇತರ ಶಸ್ತ್ರಾಸ್ತ್ರ ಮತ್ತು ಸೇವಾ ವಿಭಾಗಗಳ ಸಿಬ್ಬಂದಿ ಇದ್ದಾರೆ. ಆಸ್ಟ್ರೇಲಿಯಾ ಸೇನೆಯ 13ನೇ ಬ್ರಿಗೇಡ್‌ನ ಯೋಧರು ಆ ದೇಶದ ತುಕಡಿಯನ್ನು ಪ್ರತಿನಿಧಿಸುತ್ತಿದ್ದಾರೆ. ಸಮರಾಭ್ಯಾಸದ ಹಿಂದಿನ ಆವೃತ್ತಿ 2025ರ ಅಕ್ಟೋಬರ್ 13ರಿಂದ 26ರವರೆಗೆ ಆಸ್ಟ್ರೇಲಿಯಾದ ಪರ್ತ್‌ನ ಇರ್ವಿನ್ ಬ್ಯಾರಕ್ಸ್‌ನಲ್ಲಿ ನಡೆದಿತ್ತು.
ವಿಶ್ವಸಂಸ್ಥೆಯ ಆದೇಶದ ಏಳನೇ ಅಧ್ಯಾಯದ ಅಡಿಯಲ್ಲಿ ದ್ವೀಪ ಮತ್ತು ಕರಾವಳಿ ಪ್ರದೇಶಗಳಲ್ಲಿ ಜಂಟಿ ಉಪ-ಸಾಂಪ್ರದಾಯಿಕ ಕಾರ್ಯಾಚರಣೆ ನಡೆಸುವುದು ಈ ಬಾರಿಯ ಸಮರಾಭ್ಯಾಸದ ಮುಖ್ಯ ವಿಷಯವಾಗಿದೆ. ಎರಡೂ ಸೇನೆಗಳ ನಡುವೆ ಕಾರ್ಯಾಚರಣೆಯ ಸಮನ್ವಯ, ಪರಸ್ಪರ ಕಾರ್ಯಸಾಧ್ಯತೆ ಮತ್ತು ಜಂಟಿ ಕಾರ್ಯಾಚರಣೆಗಳ ಸಾಮರ್ಥ್ಯವನ್ನು ಹೆಚ್ಚಿಸುವುದು ಇದರ ಉದ್ದೇಶವಾಗಿದೆ.
ತರಬೇತಿಯ ಭಾಗವಾಗಿ ಜಂಟಿ ಕಾರ್ಯಯೋಜನೆ ರೂಪಿಸುವುದು, ಯುದ್ಧತಂತ್ರದ ಕವಾಯತುಗಳು ಹಾಗೂ ವಾಸ್ತವಿಕ ಕಾರ್ಯಾಚರಣೆಯ ಸನ್ನಿವೇಶಗಳಲ್ಲಿ ಅಭ್ಯಾಸ ನಡೆಸಲಾಗುತ್ತದೆ. ವೈಮಾನಿಕ ಮತ್ತು ಸಮುದ್ರ ಆಯಾಮಗಳನ್ನು ಒಳಗೊಂಡ ತರಬೇತಿಯಲ್ಲಿ ಕರಾವಳಿ ಹಾಗೂ ದ್ವೀಪ ಪ್ರದೇಶಗಳಲ್ಲಿ ಸಂಘಟಿತ ಕಾರ್ಯಾಚರಣೆ, ಕಣ್ಗಾವಲು, ವಿಚಕ್ಷಣ, ಪ್ರಮುಖ ನೆಲೆಗಳ ರಕ್ಷಣೆ ಮತ್ತು ಮಾನವೀಯ ನೆರವು ಹಾಗೂ ವಿಪತ್ತು ಪರಿಹಾರ ಕಾರ್ಯಗಳ ಅಭ್ಯಾಸಕ್ಕೂ ಆದ್ಯತೆ ನೀಡಲಾಗುತ್ತದೆ.
ಸಮರಾಭ್ಯಾಸವು ಎರಡೂ ದೇಶಗಳ ಸೇನಾ ಸಿಬ್ಬಂದಿಗೆ ವೃತ್ತಿಪರ ಅನುಭವ ಮತ್ತು ಉತ್ತಮ ಕಾರ್ಯವಿಧಾನಗಳನ್ನು ವಿನಿಮಯ ಮಾಡಿಕೊಳ್ಳಲು ಅವಕಾಶ ಕಲ್ಪಿಸಲಿದೆ. ಈ ಬಾರಿ ನ್ಯೂಜಿಲೆಂಡ್‌ನ ವೀಕ್ಷಕ ನಿಯೋಗವೂ ಭಾಗವಹಿಸಲಿದೆ.
‘ಆಸ್ಟ್ರಾಹಿಂದ್ 2026’ ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ರಕ್ಷಣಾ ಸಹಕಾರ, ಪರಸ್ಪರ ನಂಬಿಕೆ ಹಾಗೂ ಜಂಟಿ ಕಾರ್ಯಾಚರಣೆಯ ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸುವ ನಿರೀಕ್ಷೆಯಿದೆ. ಇಂಡೋ-ಪೆಸಿಫಿಕ್ ಪ್ರದೇಶದಲ್ಲಿ ಶಾಂತಿ, ಸ್ಥಿರತೆ ಮತ್ತು ಭದ್ರತೆಯನ್ನು ಉತ್ತೇಜಿಸುವ ಎರಡೂ ದೇಶಗಳ ಬದ್ಧತೆಯ ಭಾಗವಾಗಿ ಈ ಸಮರಾಭ್ಯಾಸ ನಡೆಯುತ್ತಿದೆ.
