ನವದೆಹಲಿ: ಭಾರತ ಅಂಚೆ ಇಲಾಖೆಯು 2026-27ನೇ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ₹8,212.7 ಕೋಟಿ ಆದಾಯ ದಾಖಲಿಸಿದೆ. ಕಳೆದ ವರ್ಷದ ಇದೇ ಅವಧಿಯ ₹6,636 ಕೋಟಿ ಆದಾಯಕ್ಕೆ ಹೋಲಿಸಿದರೆ ಶೇ.24ರಷ್ಟು ಏರಿಕೆಯಾಗಿದೆ. ಇದೇ ಮೊದಲ ಬಾರಿಗೆ ಸತತ ಎರಡು ತ್ರೈಮಾಸಿಕಗಳಲ್ಲಿ ₹4,000 ಕೋಟಿಗೂ ಅಧಿಕ ಆದಾಯ ಗಳಿಸಿದೆ.
ಜುಲೈ–ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಇಲಾಖೆ ₹4,201.5 ಕೋಟಿ ಆದಾಯ ಗಳಿಸಿದ್ದು, ವಾರ್ಷಿಕವಾಗಿ ಶೇ.25ರಷ್ಟು ಬೆಳವಣಿಗೆ ದಾಖಲಿಸಿದೆ. ಕೇಂದ್ರ ಸಂವಹನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಅವರು ನವದೆಹಲಿಯಲ್ಲಿ ನಡೆದ ಎರಡನೇ ತ್ರೈಮಾಸಿಕ ಪರಿಶೀಲನಾ ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ಕೇಂದ್ರ ಸಚಿವ ಚಂದ್ರಶೇಖರ್ ಪೆಮ್ಮಸಾನಿ ಹಾಗೂ ಹಿರಿಯ ಅಧಿಕಾರಿಗಳು ಭಾಗವಹಿಸಿದ್ದರು.
ಎಲ್ಲ ಆರು ಪ್ರಮುಖ ವ್ಯವಹಾರ ವಿಭಾಗಗಳಲ್ಲೂ ಬೆಳವಣಿಗೆ ಕಂಡುಬಂದಿದೆ. ಪಾರ್ಸೆಲ್ ವಿಭಾಗ ಶೇ.71, ಅಂಚೆ ಜೀವ ವಿಮೆ (PLI/RPLI) ಶೇ.44, ಅಂತರರಾಷ್ಟ್ರೀಯ ವ್ಯವಹಾರ ಶೇ.38, ಮೇಲ್ ಸೇವೆಗಳು ಶೇ.36 ಮತ್ತು ಅಂಚೆ ಕಚೇರಿ ಉಳಿತಾಯ ಬ್ಯಾಂಕ್ (POSB) ಶೇ.18ರಷ್ಟು ಬೆಳವಣಿಗೆ ದಾಖಲಿಸಿವೆ. ಪಾರ್ಸೆಲ್ ವಿಭಾಗವು ಎರಡನೇ ತ್ರೈಮಾಸಿಕದಲ್ಲಿ ₹318.9 ಕೋಟಿ ಆದಾಯ ಗಳಿಸಿದರೆ, POSB ₹1,987 ಕೋಟಿ ಕೊಡುಗೆ ನೀಡಿದೆ.
ಸೇವೆಗಳ ಗುಣಮಟ್ಟ ಸುಧಾರಣೆ, ಡಿಜಿಟಲೀಕರಣ, ಪಾರ್ಸೆಲ್ ವಿತರಣೆಯ ವಿಳಂಬ ಕಡಿತ ಮತ್ತು ಗ್ರಾಹಕಕೇಂದ್ರಿತ ಕಾರ್ಯವೈಖರಿಗೆ ಸಚಿವರು ಒತ್ತು ನೀಡಿದ್ದಾರೆ. ಕೃಷಿ ಸಾಗಣೆ, ಸಣ್ಣ ಉದ್ಯಮಗಳು, ಪ್ರವಾಸೋದ್ಯಮ, ವಿಮೆ ಹಾಗೂ ಗ್ರಾಮೀಣ ಲಾಜಿಸ್ಟಿಕ್ಸ್ ಕ್ಷೇತ್ರಗಳಲ್ಲಿ ಸೇವೆ ವಿಸ್ತರಿಸುವ ಮೂಲಕ ಆದಾಯದ ಬೆಳವಣಿಗೆ ಮುಂದುವರಿಸಲು ಇಲಾಖೆ ಯೋಜಿಸಿದೆ.
