ನವದೆಹಲಿ: ಡಿಜಿಟಲ್ ಸಂವಹನದ ಭರಾಟೆಯಲ್ಲಿ ಕೈಬರಹದ ಪತ್ರಗಳ ಮಹತ್ವವನ್ನು ಮರುಪರಿಚಯಿಸುವ ಉದ್ದೇಶದಿಂದ ಇಂಡಿಯಾ ಪೋಸ್ಟ್ ಮತ್ತು ಇಂಡಿಗೋ ವಿಮಾನಯಾನ ಸಂಸ್ಥೆ ಜಂಟಿಯಾಗಿ ವಿಶಿಷ್ಟ ಡಿಜಿಟಲ್ ಡಿಟಾಕ್ಸ್ ಅಭಿಯಾನವನ್ನು ಹಮ್ಮಿಕೊಂಡಿವೆ. ವಿಮಾನ ಪ್ರಯಾಣದ ವೇಳೆ ಮೊಬೈಲ್ ಪರದೆಗಳಿಂದ ವಿರಾಮ ಪಡೆದು, ಆತ್ಮೀಯರಿಗೆ ಪತ್ರ ಬರೆಯುವ ಮೂಲಕ ವೈಯಕ್ತಿಕ ಸಂಪರ್ಕವನ್ನು ಬೆಳೆಸಿಕೊಳ್ಳುವಂತೆ ಪ್ರಯಾಣಿಕರನ್ನು ಪ್ರೋತ್ಸಾಹಿಸಲಾಯಿತು.
ರಾಷ್ಟ್ರೀಯ ಅಂಚೆ ಸಪ್ತಾಹದ (ಅಕ್ಟೋಬರ್ 9ರಿಂದ 15) ಅಂಗವಾಗಿ ಅಕ್ಟೋಬರ್ 12ರಂದು ಅಂಚೆಚೀಟಿ ಸಂಗ್ರಹಣಾ ದಿನದ ಸಂದರ್ಭದಲ್ಲಿ ಈ ಅಭಿಯಾನವನ್ನು ಸಂವಹನ ಸಚಿವಾಲಯದ ಅಂಚೆ ಇಲಾಖೆಯು ಇಂಡಿಗೋ ಸಹಯೋಗದಲ್ಲಿ ಆರಂಭಿಸಿತು.
ಅಭಿಯಾನದಡಿ ಆಯ್ದ ಇಂಡಿಗೋ ವಿಮಾನಗಳ ಪ್ರಯಾಣಿಕರಿಗೆ ವಿಶೇಷವಾಗಿ ವಿನ್ಯಾಸಗೊಳಿಸಿದ ಡಿಜಿಟಲ್ ಡಿಟಾಕ್ಸ್ ಕಿಟ್‌ಗಳನ್ನು ವಿತರಿಸಲಾಯಿತು. ಈ ಕಿಟ್‌ಗಳಲ್ಲಿ ಪೋಸ್ಟ್‌ಕಾರ್ಡ್‌ಗಳಿದ್ದು, ಪ್ರಯಾಣಿಕರು ತಮ್ಮ ಕುಟುಂಬದವರು, ಸ್ನೇಹಿತರು ಹಾಗೂ ಆತ್ಮೀಯರಿಗೆ ವೈಯಕ್ತಿಕ ಸಂದೇಶಗಳನ್ನು ಬರೆಯಲು ಅವಕಾಶ ಕಲ್ಪಿಸಲಾಯಿತು. ಬರೆದ ಪೋಸ್ಟ್‌ಕಾರ್ಡ್‌ಗಳನ್ನು ಗಮ್ಯಸ್ಥಾನದ ವಿಮಾನ ನಿಲ್ದಾಣಗಳಲ್ಲಿರುವ ನಿಗದಿತ ಇಂಡಿಯಾ ಪೋಸ್ಟ್ ಪತ್ರಪೆಟ್ಟಿಗೆಗಳಲ್ಲಿ ಹಾಕುವ ವ್ಯವಸ್ಥೆಯನ್ನೂ ಮಾಡಲಾಗಿತ್ತು.
ಬೆಂಗಳೂರು, ನವದೆಹಲಿ, ಹೈದರಾಬಾದ್, ಕೋಲ್ಕತ್ತಾ, ಮುಂಬೈ ಮತ್ತು ಚೆನ್ನೈ ನಗರಗಳ ಪ್ರಯಾಣಿಕರನ್ನು ಈ ಅಭಿಯಾನ ತಲುಪಿತು. ಈ ಆರು ನಗರಗಳ ಪ್ರಸಿದ್ಧ ಹೆಗ್ಗುರುತುಗಳನ್ನು ಒಳಗೊಂಡ ವಿಶೇಷ ಪೋಸ್ಟ್‌ಕಾರ್ಡ್‌ಗಳು ಅಭಿಯಾನಕ್ಕೆ ಸ್ಥಳೀಯ ಸ್ಪರ್ಶ ನೀಡಿದವು.
ಅಭಿಯಾನದಲ್ಲಿ ಪಾಲ್ಗೊಂಡ ಪ್ರಯಾಣಿಕರೊಬ್ಬರು, “ನೀಲಿ ಟಿಕ್‌ಗಳ ಕಾಲದಲ್ಲಿ, 30,000 ಅಡಿ ಎತ್ತರದಲ್ಲಿ ಕುಳಿತು ಪೋಸ್ಟ್‌ಕಾರ್ಡ್ ಬರೆದೆ!” ಎಂದು ತಮ್ಮ ಅನುಭವ ಹಂಚಿಕೊಂಡರು. ವಿಮಾನ ಪ್ರಯಾಣದ ವೇಳೆ ದೊರೆತ ನೆಮ್ಮದಿಯ ಕ್ಷಣಗಳನ್ನು ಆತ್ಮೀಯರಿಗಾಗಿ ವೈಯಕ್ತಿಕ ಸಂದೇಶಗಳನ್ನು ಬರೆಯಲು ಬಳಸಿಕೊಂಡಿದ್ದಾಗಿ ಅವರು ತಿಳಿಸಿದರು.
ಡಿಜಿಟಲ್ ಯುಗದಲ್ಲಿ ಮಾನವೀಯ ಸಂಪರ್ಕಕ್ಕೆ ಒತ್ತು
ಅತಿಯಾದ ಪರದೆ ಬಳಕೆಯನ್ನು ಕಡಿಮೆ ಮಾಡುವುದು, ಮನಸ್ಸಿನ ಏಕಾಗ್ರತೆ ಮತ್ತು ಜಾಗೃತಿಯನ್ನು ಉತ್ತೇಜಿಸುವುದು ಹಾಗೂ ಮಾನವೀಯ ಸಂಬಂಧಗಳನ್ನು ಗಟ್ಟಿಗೊಳಿಸುವುದು ಈ ಉಪಕ್ರಮದ ಪ್ರಮುಖ ಉದ್ದೇಶವಾಗಿದೆ.
ಕೈಬರಹದ ಪತ್ರಗಳ ಮೂಲಕ ವೈಯಕ್ತಿಕ ಸಂವಹನದ ಸಂಪ್ರದಾಯವನ್ನು ಪುನರುಜ್ಜೀವನಗೊಳಿಸುವ ಜತೆಗೆ, ಡಿಜಿಟಲ್ ಯುಗದಲ್ಲಿಯೂ ಸಾಂಪ್ರದಾಯಿಕ ಅಂಚೆ ಸೇವೆಗಳ ಪ್ರಸ್ತುತತೆಯನ್ನು ಸಾರಲು ಇಂಡಿಯಾ ಪೋಸ್ಟ್ ಪ್ರಯತ್ನಿಸಿದೆ. ವಿಮಾನ ಪ್ರಯಾಣದ ಅನುಭವಕ್ಕೆ ಹಳೆಯ ಅಂಚೆ ಸಂಪ್ರದಾಯವನ್ನು ಜೋಡಿಸುವ ಮೂಲಕ, ತ್ವರಿತ ಡಿಜಿಟಲ್ ಸಂದೇಶಗಳಾಚೆಗೆ ಆತ್ಮೀಯತೆ ಮತ್ತು ಭಾವನೆಗಳನ್ನು ಹಂಚಿಕೊಳ್ಳಲು ಈ ಅಭಿಯಾನ ವೇದಿಕೆ ಕಲ್ಪಿಸಿದೆ.
