ಸಾಮಾನ್ಯ ಸ್ವಯಂಸೇವಕ, ಹಿರಿಯ ಸೇನಾನಿ, ಸಂಘ ಕಾರ್ಯಕರ್ತರ ಪ್ರೀತಿಯ ಶೆಣೈ ಮಾಮ್ ಇನ್ನಿಲ್ಲ, ಸಹಕಾರ್ಯವಾಹ ಮುಕುಂದ್ ಜೀ ಭಾವುಕ ನುಡಿ
ಉಡುಪಿ: ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಹಿರಿಯ ಸ್ವಯಂಸೇವಕ ಗುರುದಾಸ್ ಶೆಣೈ ಅವರ ನಿಧನಕ್ಕೆ ಸಂಘದ ಸಹಕಾರ್ಯವಾಹ ಮುಕುಂದಜೀ ಭಾವಪೂರ್ಣ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ. ಹಲವು ದಶಕಗಳಿಂದ ಸಂಘದ ಕಾರ್ಯಗಳಲ್ಲಿ ನಿಷ್ಠೆಯಿಂದ ತೊಡಗಿಸಿಕೊಂಡಿದ್ದ ಶೆಣೈ ಮಾಮ್ ಅವರ ಅಗಲಿಕೆ ಕರಾವಳಿಯ ಸಂಘ ಪರಿವಾರದ ವಲಯದಲ್ಲಿ ಶೂನ್ಯವನ್ನು ಸೃಷ್ಟಿಸಿದೆ ಎಂದು ಅವರು ಸ್ಮರಿಸಿದ್ದಾರೆ.
ಕೋಟದ ಪರಿಸರದಲ್ಲಿ ಸಂಘದ ಹಿರಿಯ ಕಾರ್ಯಕರ್ತರಾಗಿದ್ದ ಗುರುದಾಸ್ ಶೆಣೈ ಅವರು ಹುದ್ದೆ ಅಥವಾ ಅಧಿಕಾರದ ನಿರೀಕ್ಷೆಯಿಲ್ಲದೆ ಸ್ವಯಂಸೇವಕರಾಗಿ ಸೇವೆ ಸಲ್ಲಿಸುತ್ತಿದ್ದರು. ಪ್ರತಿದಿನ ಶಾಖೆಯಲ್ಲಿ ಭಾಗವಹಿಸುವ ಶಿಸ್ತು, ಸರಳ ಜೀವನ ಮತ್ತು ಧಾರ್ಮಿಕ-ಸಾಮಾಜಿಕ ಚಟುವಟಿಕೆಗಳಲ್ಲಿನ ಅವರ ಬದ್ಧತೆ ಎಲ್ಲರಿಗೂ ಮಾದರಿಯಾಗಿತ್ತು ಎಂದು ಮುಕುಂದಜೀ ನೆನಪಿಸಿಕೊಂಡಿದ್ದಾರೆ.
ಕಾಪೋರೇಷನ್ ಬ್ಯಾಂಕ್‌ನಲ್ಲಿ ಉದ್ಯೋಗಿಯಾಗಿದ್ದ ಶೆಣೈ ಅವರು ವೈಯಕ್ತಿಕ ಬದುಕಿನಲ್ಲಿಯೂ ಶಿಸ್ತು ಮತ್ತು ಪ್ರಾಮಾಣಿಕತೆಗೆ ಆದ್ಯತೆ ನೀಡಿದ್ದರು. ತಮ್ಮ ಮಕ್ಕಳಾದ ಸಂದೇಶ್ ಮತ್ತು ಗೌರೀಶ್ ಅವರಿಗೆ ಶಿಕ್ಷಣ ಕೊಡಿಸಿ ಸ್ವಾವಲಂಬಿಗಳನ್ನಾಗಿ ರೂಪಿಸುವಲ್ಲಿ ಅವರು ವಿಶೇಷ ಕಾಳಜಿ ವಹಿಸಿದ್ದರು. ಸಂದೇಶ್ ಬೆಂಗಳೂರಿನಲ್ಲಿ ಸಾಫ್ಟ್‌ವೇರ್ ಎಂಜಿನಿಯರ್ ಆಗಿದ್ದರೆ, ಗೌರೀಶ್ ಎಂಐಟಿಯಲ್ಲಿ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.
ಶೆಣೈ ಮಾಮ್ ಅವರ ದಿನಚರಿಯೂ ವಿಶಿಷ್ಟವಾಗಿತ್ತು. ಬೆಳಗ್ಗೆ ಶಾಖೆಯಲ್ಲಿ ಪಾಲ್ಗೊಂಡ ಬಳಿಕ ಸೈಕಲ್‌ನಲ್ಲಿ ಹೂವು ಮತ್ತು ತುಳಸಿ ಸಂಗ್ರಹಿಸಿ, ಅವುಗಳನ್ನು ಮನೆಯವರಿಂದ ಮಾಲೆಯಾಗಿ ಕಟ್ಟಿಸಿ ಕೋಟದ ಕಾಶಿ ಮಠದ ಶ್ರೀಕೃಷ್ಣನಿಗೆ ಸಮರ್ಪಿಸುತ್ತಿದ್ದರು. ಹಲವು ವರ್ಷಗಳಿಂದ ಅವರು ಈ ಧಾರ್ಮಿಕ ಸೇವೆಯನ್ನು ನಿರಂತರವಾಗಿ ನಡೆಸಿಕೊಂಡು ಬಂದಿದ್ದರು.
ಇತ್ತೀಚೆಗೆ ವಿಜಯದಶಮಿಯ ಪಥಸಂಚಲನದಲ್ಲಿಯೂ ಉತ್ಸಾಹದಿಂದ ಪಾಲ್ಗೊಂಡಿದ್ದ ಶೆಣೈ ಅವರು ಅಪಘಾತದಲ್ಲಿ ಮೃತಪಟ್ಟಿರುವುದು ದುಃಖಕರ.
“ಕೋಟದ ಹಿರೇ ಮಹಾಲಿಂಗೇಶ್ವರ ದೇವಸ್ಥಾನದ ಅಂಗಳದಲ್ಲಿ ‘ಸಂಘ ದಕ್ಷ!’ ಎಂದು ಘೋಷಿಸುತ್ತಿದ್ದ ಅವರ ಧ್ವನಿ ಇನ್ನು ಕೇಳಿಸುವುದಿಲ್ಲ. ಸೈಕಲ್ ಬೆಲ್‌ನ ಸದ್ದಿನೊಂದಿಗೆ ರಸ್ತೆಯಲ್ಲಿ ಎದುರಾಗುತ್ತಿದ್ದ ಶೆಣೈ ಮಾಮ್ ಅವರ ನೆನಪು ಸದಾ ಉಳಿಯಲಿದೆ”.
ಸಂಘದ ಶತಾಬ್ದಿ ಸಂಭ್ರಮದ ಸಂದರ್ಭದಲ್ಲಿ ಹಲವು ದಶಕಗಳ ಕಾಲ ನಿಸ್ವಾರ್ಥವಾಗಿ ದುಡಿದ ಹಿರಿಯ ಸ್ವಯಂಸೇವಕರು ಒಬ್ಬೊಬ್ಬರಾಗಿ ಅಗಲುತ್ತಿರುವುದು ಸಂಘದ ಕಾರ್ಯಕರ್ತರಿಗೆ ನೋವುಂಟುಮಾಡಿದೆ ಎಂದು ಮುಕುಂದಜೀ ತಮ್ಮ ಸಂತಾಪದಲ್ಲಿ ತಿಳಿಸಿದ್ದಾರೆ.
