ರತ್ನಗಿರಿ: ಅಸತ್ಯದ ವಿರುದ್ಧ ಸತ್ಯದ ಜಯ ಹಾಗೂ ದುಷ್ಟ ಶಕ್ತಿಗಳ ವಿರುದ್ಧ ಸಜ್ಜನ ಶಕ್ತಿಯ ವಿಜಯವೇ ವಿಜಯದಶಮಿ ಮತ್ತು ದುರ್ಗಾರಾಧನೆಯ ಮೂಲ ಸಂದೇಶವಾಗಿದೆ ಎಂದು ವಿಧಾನ ಪರಿಷತ್ ಸದಸ್ಯ ಡಾ. ರವಿ ಸಿ.ಟಿ. ಹೇಳಿದರು.
ರತ್ನಗಿರಿ ಶ್ರೀ ಕಾಳಿಕಾಂಬಾ ಸೇವಾ ಸಮಿತಿ ವತಿಯಿಂದ 34ನೇ ವರ್ಷದ ಶರನ್ನವರಾತ್ರಿ ಪೂಜಾ ಮಹೋತ್ಸವದ ಅಂಗವಾಗಿ ರತ್ನಗಿರಿ ಬೋರೆಯ ಕಾಳಿಕಾಂಬಾ ದೇವಾಲಯದಲ್ಲಿ ಆಯೋಜಿಸಿದ್ದ ದುರ್ಗಾಹೋಮ ಪೂರ್ಣಾಹುತಿ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಶ್ರೀರಾಮ ರಾವಣನ ವಿರುದ್ಧ ಸಾಧಿಸಿದ ಜಯ ಹಾಗೂ ಚಾಮುಂಡೇಶ್ವರಿ ಮಹಿಷಾಸುರನನ್ನು ಸಂಹರಿಸಿದ ಕಥೆಗಳು ಸಜ್ಜನ ಶಕ್ತಿಯ ವಿಜಯವನ್ನು ಸಾರುತ್ತವೆ ಎಂದರು.
ಜಾತಿಗಳು ವಿಭಿನ್ನವಾಗಿದ್ದರೂ ಭಾರತೀಯ ಸಂಸ್ಕೃತಿ ಒಂದೇ ಆಗಿದೆ. ಸನಾತನ ಪರಂಪರೆಯಲ್ಲಿ ನೀತಿ ಮತ್ತು ನಡವಳಿಕೆಗೆ ಮಹತ್ವದ ಸ್ಥಾನವಿದೆ. ರಾವಣ ಬ್ರಾಹ್ಮಣನಾಗಿದ್ದರೂ ದುರ್ಮಾರ್ಗದಲ್ಲಿ ನಡೆದ ಕಾರಣ ದುಷ್ಟನೆಂದು ಗುರುತಿಸಲ್ಪಟ್ಟನು. ಇದರಿಂದ ವ್ಯಕ್ತಿಯ ಜಾತಿಗಿಂತ ಆತನ ನೀತಿ ಮುಖ್ಯ ಎಂಬ ಸಂದೇಶ ಸಿಗುತ್ತದೆ ಎಂದು ಹೇಳಿದರು. ದೇಶದ ಸಂಸ್ಕೃತಿ, ಪರಂಪರೆ ಮತ್ತು ಧಾರ್ಮಿಕ ಮೌಲ್ಯಗಳನ್ನು ಮುಂದಿನ ಪೀಳಿಗೆಗೆ ತಲುಪಿಸುವ ಜವಾಬ್ದಾರಿ ಎಲ್ಲರ ಮೇಲಿದೆ. ಪೋಷಕರು ಮಕ್ಕಳನ್ನು ಧೈರ್ಯವಂತರು, ಸಾಹಸಿಗಳು ಹಾಗೂ ಸಂಸ್ಕಾರವಂತರನ್ನಾಗಿ ಬೆಳೆಸಬೇಕು. ಕೆಟ್ಟ ಕೆಲಸ ಮಾಡಬಾರದು ಎಂಬುದರ ಜೊತೆಗೆ, ಅನ್ಯಾಯವನ್ನು ಸಹಿಸಿಕೊಂಡು ಸುಮ್ಮನಿರಬಾರದು ಎಂಬುದನ್ನೂ ಕಲಿಸಬೇಕು ಎಂದು ಕರೆ ನೀಡಿದರು.
ಭೂಮಿಯ ಒಡೆತನ ಮತ್ತು ಸಾಂಪ್ರದಾಯಿಕ ಕಸುಬುಗಳನ್ನು ಉಳಿಸಿಕೊಳ್ಳುವ ಅಗತ್ಯವನ್ನು ಪ್ರಸ್ತಾಪಿಸಿದ ಅವರು, ತಂತ್ರಜ್ಞಾನಕ್ಕೆ ತಕ್ಕಂತೆ ಬದಲಾವಣೆ ಅಳವಡಿಸಿಕೊಂಡರೂ ಪಾರಂಪರಿಕ ವೃತ್ತಿಗಳನ್ನು ಕೈಬಿಡಬಾರದು. ಹಿಂದಿನ ತಲೆಮಾರುಗಳಿಂದ ಬಂದ ಕಸುಬುಗಳು ಮುಂದಿನ ಪೀಳಿಗೆಯ ಬದುಕಿಗೂ ಆಧಾರವಾಗಬೇಕು ಎಂದು ಅಭಿಪ್ರಾಯಪಟ್ಟರು.
ಆಯುಧ ಪೂಜೆಯ ಮಹತ್ವ ವಿವರಿಸಿದ ಡಾ. ರವಿ, ದೇವತೆಗಳ ಅಭಯಹಸ್ತ ಸಜ್ಜನರ ರಕ್ಷಣೆಯ ಸಂಕೇತವಾದರೆ, ತ್ರಿಶೂಲ ಮತ್ತು ಖಡ್ಗದಂತಹ ಆಯುಧಗಳು ದುಷ್ಟ ಶಕ್ತಿಗಳ ವಿರುದ್ಧದ ಹೋರಾಟವನ್ನು ಪ್ರತಿನಿಧಿಸುತ್ತವೆ ಎಂದರು. ಆಯುಧ ಪೂಜೆಯ ನಿಜವಾದ ಆಶಯವನ್ನು ಅರಿತು, ಅದರ ಪರಂಪರೆ ಮತ್ತು ಮಹತ್ವವನ್ನು ಮಕ್ಕಳಿಗೆ ತಿಳಿಸಬೇಕು. ಸನಾತನ ಪರಂಪರೆ, ಸಂಸ್ಕೃತಿ ಮತ್ತು ದೇಶದ ರಕ್ಷಣೆಗೆ ಸಮಾಜ ಒಗ್ಗಟ್ಟಿನಿಂದ ಕಾರ್ಯನಿರ್ವಹಿಸಬೇಕು ಎಂದು ಕರೆ ನೀಡಿದರು.
