ಪಣಜಿ: ಪೋಲಿಷ್ ಚಲನಚಿತ್ರ ನಿರ್ದೇಶಕ ಪಾವ್ಲಿಕೋವ್ಸ್ಕಿ ಅವರ ಐತಿಹಾಸಿಕ ನಾಟಕ ‘ಫಾದರ್‌ಲ್ಯಾಂಡ್’ (ಓಜ್ಜಿಜ್ನಾ) ಗೋವಾದಲ್ಲಿ ನಡೆಯಲಿರುವ 57ನೇ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ (ಐಎಫ್ಎಫ್‌ಐ) ಉದ್ಘಾಟನಾ ಚಿತ್ರವಾಗಿ ಆಯ್ಕೆಯಾಗಿದೆ.
1949ರ ಶೀತಲ ಸಮರದ ಹಿನ್ನೆಲೆಯಲ್ಲಿ ಮೂಡಿಬಂದಿರುವ 82 ನಿಮಿಷಗಳ ಈ ಕಪ್ಪು-ಬಿಳುಪು ಚಿತ್ರ, ನೊಬೆಲ್ ಪ್ರಶಸ್ತಿ ವಿಜೇತ ಜರ್ಮನ್ ಬರಹಗಾರ ಥಾಮಸ್ ಮಾನ್ ಮತ್ತು ಅವರ ಪುತ್ರಿ ಎರಿಕಾ ಅವರ ಪ್ರಯಾಣವನ್ನು ಆಧರಿಸಿದೆ. ಅಮೆರಿಕದಲ್ಲಿ 16 ವರ್ಷಗಳ ಗಡಿಪಾರು ಜೀವನದ ಬಳಿಕ ಜರ್ಮನಿಗೆ ಮರಳುವ ಮಾನ್, ಯುದ್ಧದಿಂದ ಹಾನಿಗೊಳಗಾಗಿದ್ದ ವಿಭಜಿತ ಜರ್ಮನಿಯಲ್ಲಿ ಅಮೆರಿಕದ ನಿಯಂತ್ರಣದಲ್ಲಿದ್ದ ಫ್ರಾಂಕ್‌ಫರ್ಟ್‌ನಿಂದ ಸೋವಿಯತ್ ನಿಯಂತ್ರಣದ ವೀಮರ್‌ಗೆ ಪುತ್ರಿಯೊಂದಿಗೆ ಪ್ರಯಾಣಿಸುತ್ತಾರೆ.
ಸಾಂಡ್ರಾ ಹಲ್ಲರ್ ಮತ್ತು ಹ್ಯಾನ್ಸ್ ಜಿಶ್ಲರ್ ಅಭಿನಯಿಸಿರುವ ಈ ಚಿತ್ರವು ಯುದ್ಧಾನಂತರದ ಜರ್ಮನಿಯ ಸನ್ನಿವೇಶದಲ್ಲಿ ತಂದೆ-ಮಗಳ ನಡುವಿನ ಸಂಕೀರ್ಣ ಸಂಬಂಧವನ್ನು ಚಿತ್ರಿಸುತ್ತದೆ. ಕುಟುಂಬ, ಗುರುತು, ಇತಿಹಾಸ ಮತ್ತು ಸೇರಿದವರ ಭಾವನೆಗಳಂತಹ ವಿಷಯಗಳನ್ನು ಚಿತ್ರದಲ್ಲಿ ಪರಿಶೋಧಿಸಲಾಗಿದೆ.
ಪೋಲೆಂಡ್, ಜರ್ಮನಿ, ಇಟಲಿ ಮತ್ತು ಫ್ರಾನ್ಸ್‌ನ ಜಂಟಿ ನಿರ್ಮಾಣದ ಈ ಚಿತ್ರ ಭಾರತದಲ್ಲಿ ನಡೆಯಲಿರುವ ಚಿತ್ರೋತ್ಸವದಲ್ಲಿ ಮೊದಲ ಬಾರಿಗೆ ಪ್ರದರ್ಶನಗೊಳ್ಳಲಿದೆ. 2026ರಲ್ಲಿ ಕೇನ್ಸ್, ಸ್ಯಾನ್ ಸೆಬಾಸ್ಟಿಯನ್ ಮತ್ತು ಟೆಲ್ಲುರೈಡ್ ಸೇರಿದಂತೆ ಪ್ರಮುಖ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿ ಈಗಾಗಲೇ ಪ್ರದರ್ಶನಗೊಂಡಿದೆ. ನಿರ್ದೇಶಕ ಪಾವ್ಲಿಕೋವ್ಸ್ಕಿ ಅವರು ಕೇನ್ಸ್‌ನಲ್ಲಿ ಅತ್ಯುತ್ತಮ ನಿರ್ದೇಶಕ ಪ್ರಶಸ್ತಿಯನ್ನೂ ಪಡೆದಿದ್ದಾರೆ.
‘ಸ್ಟೋರೀಸ್ ವಿದೌಟ್ ಬಾರ್ಡರ್ಸ್’ ಎಂಬ ಧ್ಯೇಯವಾಕ್ಯದಡಿ ಒಂಬತ್ತು ದಿನಗಳ ಕಾಲ ನಡೆಯಲಿರುವ 57ನೇ ಐಎಫ್ಎಫ್‌ಐಗೆ ‘ಫಾದರ್‌ಲ್ಯಾಂಡ್’ ಚಿತ್ರದ ಆಯ್ಕೆಯು ವಿಶೇಷ ಮೆರುಗು ನೀಡಿದೆ.
