ವಾಷಿಂಗ್ಟನ್: ರಷ್ಯಾದಿಂದ ಅಮೆರಿಕಕ್ಕೆ ಡೀಸೆಲ್ ಆಮದು ನಿರ್ಬಂಧಿಸುವ 2022ರ ಕಾನೂನನ್ನು ಮರುಪರಿಶೀಲಿಸುವುದಾಗಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ. ರಷ್ಯಾದ ಡೀಸೆಲ್ ಹೊತ್ತ ಹಡಗು ಅಮೆರಿಕದತ್ತ ಸಾಗುತ್ತಿರುವ ಕುರಿತು ಪತ್ರಕರ್ತರು ಕೇಳಿದ ಪ್ರಶ್ನೆಗೆ, ಕಾನೂನು ಸೂಕ್ತವಾಗಿಲ್ಲದಿರಬಹುದು, ಪರಿಶೀಲಿಸುವುದಾಗಿ ಪ್ರತಿಕ್ರಿಯಿಸಿದ್ದಾರೆ. ಆದರೆ ನಿಷೇಧ ತೆರವು ಕುರಿತು ಯಾವುದೇ ಅಧಿಕೃತ ಘೋಷಣೆ ಮಾಡಿಲ್ಲ.
ಅಕ್ಟೋಬರ್ 9ರಂದು ಅಮೆರಿಕದ ಖಜಾನೆ ಇಲಾಖೆ ರಷ್ಯಾ ಮೂಲದ ಡೀಸೆಲ್ ಮಾರಾಟ, ಸಾಗಣೆ, ಇಳಿಸುವಿಕೆ ಮತ್ತು ಆಮದಿಗೆ 2027ರ ಏಪ್ರಿಲ್ 7ರವರೆಗೆ ವಿಶೇಷ ಅನುಮತಿ ನೀಡಿತ್ತು. ಈ ವಿನಾಯಿತಿ ಎಲ್ಲ ರಷ್ಯಾದ ಪೆಟ್ರೋಲಿಯಂ ಉತ್ಪನ್ನಗಳಿಗೆ ಅನ್ವಯಿಸುವುದಿಲ್ಲ.
2022ರ ಏಪ್ರಿಲ್ 8ರಂದು ಜಾರಿಗೆ ಬಂದ ಕಾನೂನು ರಷ್ಯಾದ ಪೆಟ್ರೋಲಿಯಂ ಉತ್ಪನ್ನಗಳ ಆಮದನ್ನು ನಿಷೇಧಿಸಿತ್ತು. ನಿಷೇಧ ತೆರವಿಗೆ ಉಕ್ರೇನ್ ಯುದ್ಧ ಅಂತ್ಯ, ರಷ್ಯಾ ಸೇನೆಯ ಹಿಂತೆಗೆತ ಸೇರಿದಂತೆ ಹಲವು ಷರತ್ತುಗಳಿವೆ.
ಇದಕ್ಕೆ ಖಜಾನೆ ಇಲಾಖೆಯ ವಿಶೇಷ ಅನುಮತಿ ಸಾಕಾಗುವುದಿಲ್ಲ ಎಂಬ ಚರ್ಚೆ ನಡೆದಿದೆ. ನ್ಯೂಜೆರ್ಸಿ ಗವರ್ನರ್ ಮಿಕಿ ಶೆರಿಲ್ ಕೂಡ ಈ ಅನುಮತಿ ಫೆಡರಲ್ ಕಾನೂನಿಗೆ ವಿರುದ್ಧವಾಗಿದೆ ಎಂದು ಆಕ್ಷೇಪಿಸಿದ್ದಾರೆ.
