ಮುಂಬೈ: ಗಾಯಗೊಂಡ ಸೀಮ್-ಬೌಲಿಂಗ್ ಆಲ್ರೌಂಡರ್ಗಳಾದ ಅಮನ್ಜೋತ್ ಕೌರ್ (Amanjot Kaur) ಮತ್ತು ಕಾಶ್ವಿ ಗೌತಮ್ (Kashvee Gautam) ಅವರನ್ನು ಬದಲಾಯಿಸುವುದು ಕಷ್ಟದ ಕೆಲಸ ಎಂದು ಮುಖ್ಯ ಆಯ್ಕೆದಾರ ಅಮಿತಾ ಶರ್ಮಾ (Amita Sharma) ಹೇಳಿದ್ದಾರೆ. ಆದಾಗ್ಯೂ, ಜೂನ್ 12ರಿಂದ ಇಂಗ್ಲೆಂಡ್ನಲ್ಲಿ ಆರಂಭವಾಗಲಿರುವ ಮಹಿಳಾ ಟಿ20 ವಿಶ್ವಕಪ್ಗೆ ಭಾರತೀಯ ತಂಡ ಉತ್ತಮ ಪ್ರದರ್ಶನ ನೀಡಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿಯಲ್ಲಿ ಪವರ್ಪ್ಲೇನಲ್ಲಿ ಭಾರತ ಆರಂಭಿಕ ವಿಕೆಟ್ ಪಡೆಯಲು ವಿಫಲವಾದ ಹಿನ್ನೆಲೆ ಬೌಲಿಂಗ್ ವಿಭಾಗದಲ್ಲಿ ಕೊರತೆ ಕಂಡುಬಂದಿತ್ತು. ಗಾಯದ ಕಾರಣದಿಂದ ಅಮನ್ಜೋತ್ ಹಾಗೂ ಕಾಶ್ವಿ ತಂಡದಿಂದ ಹೊರಗುಳಿದಿರುವುದರಿಂದ, ಸ್ವಲ್ಪ ಅನನುಭವಿ ಬೌಲಿಂಗ್ ದಾಳಿ ಹೊಂದಿರುವ ತಂಡಕ್ಕೆ ನಂದಿನಿ ಶರ್ಮಾ (Nandini Sharma) ಅವರನ್ನು ಸೇರಿಸಲಾಗಿದೆ.
“ಆರಂಭಿಕ ವಿಕೆಟ್ ಪಡೆಯುವುದು ನಮ್ಮ ಪ್ರಮುಖ ಗುರಿಯಾಗಿದೆ. ಅಮನ್ಜೋತ್ ಅವರನ್ನು ಬದಲಾಯಿಸುವುದು ಸುಲಭವಲ್ಲ, ಏಕೆಂದರೆ ಅವರು ಮೂರು ವಿಭಾಗಗಳಲ್ಲಿ ತಂಡಕ್ಕೆ ಬಲ ನೀಡುತ್ತಾರೆ. ಆದರೂ ತಂಡ ಉತ್ತಮವಾಗಿ ಆಡಲಿದೆ ಎಂಬ ನಂಬಿಕೆ ನಮ್ಮದಲ್ಲಿದೆ,” ಎಂದು ಅಮಿತಾ ಶರ್ಮಾ ತಿಳಿಸಿದ್ದಾರೆ.
🎥 The moment #TeamIndia's squad for the ICC Women's T20 World Cup 2026 was revealed 🙌
🗣️ BCCI Honorary Secretary Mr Devajit Saikia @lonsaikia announced India's 1️⃣5️⃣-member squad for the highly-awaited #T20WorldCup 🇮🇳#WomenInBlue pic.twitter.com/bf2cKyg2Yo
— BCCI Women (@BCCIWomen) May 2, 2026
ವಿಕೆಟ್ಕೀಪರ್ ಯಸ್ತಿಕಾ ಭಾಟಿಯಾ (Yastika Bhatia) ಅವರನ್ನು ತಂಡಕ್ಕೆ ಮರಳಿ ಸೇರಿಸಿರುವುದಕ್ಕೆ ಸಂಬಂಧಿಸಿದಂತೆ ಮಾತನಾಡಿದ ಅವರು, ಅನುಭವ ಮತ್ತು ವಿಕೆಟ್ಕೀಪಿಂಗ್ ಸಾಮರ್ಥ್ಯದ ಆಧಾರದಲ್ಲಿ ಪ್ರತಿಕಾ ರಾವಲ್ (Pratika Rawal) ಅವರಿಗಿಂತ ಯಸ್ತಿಕಾ ಅವರನ್ನು ಆಯ್ಕೆ ಮಾಡಲಾಗಿದೆ ಎಂದು ಹೇಳಿದ್ದಾರೆ.
ಇನ್ನೊಂದೆಡೆ, ಮಧ್ಯಮ ಕ್ರಮಾಂಕದಲ್ಲಿ ಭಾರತಿ ಫುಲ್ಮಾಲಿ (Bharati Fulmali) ಉತ್ತಮ ಪ್ರದರ್ಶನ ತೋರಿರುವ ಹಿನ್ನೆಲೆಯಲ್ಲಿ ಹರ್ಲೀನ್ ಡಿಯೋಲ್ (Harleen Deol) ಅವರಿಗಿಂತ ಅವರಿಗೆ ಅವಕಾಶ ನೀಡಲಾಗಿದೆ ಎಂದು ಸ್ಪಷ್ಟಪಡಿಸಿದರು. ಹರ್ಲೀನ್ ತಂಡದ ಭವಿಷ್ಯದ ಯೋಜನೆಗಳಲ್ಲಿ ಇದ್ದಾರೆ ಎಂದೂ ಅವರು ಹೇಳಿದರು.
ಭಾರತ ತಂಡದ ನಾಯಕಿ ಹರ್ಮನ್ಪ್ರೀತ್ ಕೌರ್ (Harmanpreet Kaur) ಕೂಡ ತಂಡದ ಮೇಲೆ ಭರವಸೆ ವ್ಯಕ್ತಪಡಿಸಿದ್ದು, ಈ ಬಾರಿ ಟ್ರೋಫಿ ಗೆಲ್ಲುವ ಸಾಮರ್ಥ್ಯ ನಮ್ಮ ತಂಡಕ್ಕಿದೆ ಎಂದಿದ್ದಾರೆ. “ಟಿ20 ಕ್ರಿಕೆಟ್ನಲ್ಲಿ ಆ ದಿನದ ಪ್ರದರ್ಶನವೇ ಮುಖ್ಯ. ನಾವು ಉತ್ತಮ ಸಿದ್ಧತೆಯೊಂದಿಗೆ ಟೂರ್ನಿಗೆ ಹೋಗುತ್ತಿದ್ದೇವೆ,” ಎಂದು ಹೇಳಿದರು.
ಕಳೆದ ವಿಶ್ವಕಪ್ನಲ್ಲಿ ನಾಕೌಟ್ ಹಂತ ತಲುಪಲು ವಿಫಲವಾದ ಹಿನ್ನೆಲೆ, ಈ ಬಾರಿ ತಂಡ ಮತ್ತೊಂದು ಹೆಜ್ಜೆ ಮುಂದೆ ಹೋಗಲು ಕಠಿಣ ಅಭ್ಯಾಸ ನಡೆಸುತ್ತಿದೆ. ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯಾ (Devajit Saikia) ತಿಳಿಸಿರುವಂತೆ, ತಂಡದ ತರಬೇತಿ ಶಿಬಿರ ಮೇ 10ರಿಂದ ಆರಂಭವಾಗಲಿದ್ದು, ಬಳಿಕ ತಂಡ ಇಂಗ್ಲೆಂಡ್ಗೆ ಪ್ರಯಾಣ ಬೆಳೆಸಲಿದೆ.
ಇಂಗ್ಲೆಂಡ್ನ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳಲು ಪೂರ್ವಭಾವಿಯಾಗಿ ಅಭ್ಯಾಸ ಪಂದ್ಯಗಳನ್ನು ಆಯೋಜಿಸಲಾಗಿದ್ದು, ವಿಶ್ವಕಪ್ಗೆ ಮುನ್ನ ತಂಡ ಸಂಪೂರ್ಣ ಸಿದ್ಧವಾಗುವಂತೆ ವೇಳಾಪಟ್ಟಿಯನ್ನು ರೂಪಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
