ನವದೆಹಲಿ: ಚಹಾದಲ್ಲಿ ಅಸೆಟಾಮಿಪ್ರಿಡ್ ಮತ್ತು ಇಮಿಡಾಕ್ಲೋಪ್ರಿಡ್ ಎಂಬ ಎರಡು ಕೀಟನಾಶಕಗಳ ಗರಿಷ್ಠ ಅವಶೇಷ ಮಿತಿಗಳನ್ನು (MRL) ನಿಗದಿಪಡಿಸಲು ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಪ್ರಸ್ತಾಪಿಸಿದೆ. ಈ ಕುರಿತು ಅಕ್ಟೋಬರ್ 16ರಂದು ಗೆಜೆಟ್‌ನಲ್ಲಿ ಪ್ರಕಟಿಸಲಾದ ಕರಡು ನಿಯಮಗಳ ಬಗ್ಗೆ ಪಾಲುದಾರರಿಂದ ಅಭಿಪ್ರಾಯಗಳನ್ನು ಆಹ್ವಾನಿಸಲಾಗಿದೆ.
‘ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ (ಮಾಲಿನ್ಯಕಾರಕಗಳು, ವಿಷಕಾರಿ ವಸ್ತುಗಳು ಮತ್ತು ಅವಶೇಷಗಳು) ತಿದ್ದುಪಡಿ ನಿಯಮಾವಳಿಗಳು, 2026’ರ ಕರಡು ಪ್ರಕಾರ, ಚಹಾದಲ್ಲಿ ಅಸೆಟಾಮಿಪ್ರಿಡ್‌ಗೆ ಪ್ರತಿ ಕಿಲೋಗ್ರಾಂಗೆ 20 ಮಿಲಿಗ್ರಾಂ (20 ಪಿಪಿಎಂ) ಹಾಗೂ ಇಮಿಡಾಕ್ಲೋಪ್ರಿಡ್‌ಗೆ 50 ಮಿಲಿಗ್ರಾಂ (50 ಪಿಪಿಎಂ) ಮಿತಿ ನಿಗದಿಪಡಿಸಲು ಉದ್ದೇಶಿಸಲಾಗಿದೆ.
ಪ್ರಸ್ತಾವಿತ ಅಸೆಟಾಮಿಪ್ರಿಡ್ ಮಿತಿಯು ಜಪಾನ್‌ನಲ್ಲಿ ಉಲ್ಲೇಖಿಸಿರುವ 30 ಪಿಪಿಎಂ ಮತ್ತು ಅಮೆರಿಕದ 50 ಪಿಪಿಎಂ ಮಿತಿಗಳಿಗಿಂತ ಕಡಿಮೆಯಿದೆ. ಇಮಿಡಾಕ್ಲೋಪ್ರಿಡ್ ಮಿತಿಯನ್ನು ಅಂತರರಾಷ್ಟ್ರೀಯ ಕೋಡೆಕ್ಸ್ ಮಾನದಂಡಗಳ ಆಧಾರದಲ್ಲಿ ರೂಪಿಸಲಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.
ವೈಜ್ಞಾನಿಕ ಮೌಲ್ಯಮಾಪನ, ಆಹಾರ ಸೇವನೆಯಿಂದ ಉಂಟಾಗಬಹುದಾದ ಪರಿಣಾಮಗಳು ಮತ್ತು ಅಂತರರಾಷ್ಟ್ರೀಯ ನಿಯಂತ್ರಕ ಪದ್ಧತಿಗಳನ್ನು ಆಧರಿಸಿ ಕೀಟನಾಶಕಗಳ ಅವಶೇಷ ಮಾನದಂಡಗಳನ್ನು ಪರಿಶೀಲಿಸುವ ಪ್ರಕ್ರಿಯೆಯ ಭಾಗವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ.
ಈ ಹಿಂದೆ ಹೆಚ್ಚಿನ ವಿಷತ್ವ ಹೊಂದಿರುವ 13 ಕೀಟನಾಶಕಗಳನ್ನು ಪಟ್ಟಿಯಿಂದ ತೆಗೆದುಹಾಕುವ ಕ್ರಮ ಕೈಗೊಳ್ಳಲಾಗಿತ್ತು. 2024ರಲ್ಲಿಯೂ ಆಹಾರ ಸುರಕ್ಷತಾ ನಿಯಮಗಳಿಗೆ ತಿದ್ದುಪಡಿ ತರಲಾಗಿತ್ತು.
ಗರಿಷ್ಠ ಅವಶೇಷ ಮಿತಿಗಳು ಆಹಾರದಲ್ಲಿನ ಕೀಟನಾಶಕಗಳ ಅನುಮತಿಸಲಾದ ಗರಿಷ್ಠ ಸಾಂದ್ರತೆಯನ್ನು ಸೂಚಿಸುತ್ತವೆ. ಗ್ರಾಹಕರ ಸುರಕ್ಷತೆ ಮತ್ತು ಚಹಾ ಕೃಷಿಯಲ್ಲಿ ಪರಿಣಾಮಕಾರಿ ಕೀಟ ನಿರ್ವಹಣೆಯ ನಡುವೆ ಸಮತೋಲನ ಸಾಧಿಸುವುದು ಪ್ರಸ್ತಾವನೆಯ ಉದ್ದೇಶವಾಗಿದೆ. ಕರಡು ನಿಯಮಗಳು ಅಂತಿಮ ಅಧಿಸೂಚನೆಗೆ ಒಳಪಟ್ಟಿವೆ.
