ಗಾಂಧಿನಗರ: ದೇಶದ ಶೇ.80 ರಷ್ಟು ಪ್ರದೇಶಗಳಲ್ಲಿ ಬಿಜೆಪಿ ಹಾಗೂ ಎನ್ಡಿಎ ಸರ್ಕಾರಗಳು ಅಧಿಕಾರದಲ್ಲಿವೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ (Amit Shah) ಹೇಳಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರ ನಾಯಕತ್ವ ಮತ್ತು ಪಕ್ಷದ ತಳಮಟ್ಟದ ಕಾರ್ಯಕರ್ತರ ಶ್ರಮವೇ ಈ ರಾಜಕೀಯ ವಿಸ್ತರಣೆಗೆ ಕಾರಣ ಎಂದರು.
620 ಕೋಟಿ ರೂ. ಮೌಲ್ಯದ ವಿವಿಧ ಅಭಿವೃದ್ಧಿ ಕಾಮಗಾರಿಗಳಿಗೆ ಉದ್ಘಾಟನೆ ಹಾಗೂ ಶಂಕುಸ್ಥಾಪನೆ ನೆರವೇರಿಸಿದ ಬಳಿಕ ಗಾಂಧಿನಗರದಲ್ಲಿ ನಡೆದ ಸಾರ್ವಜನಿಕ ಸಭೆಯಲ್ಲಿ ಅವರು ಮಾತನಾಡಿದರು. “ಇಂದು ಬಿಜೆಪಿ ಮತ್ತು ಎನ್ಡಿಎ ಸರ್ಕಾರಗಳು ದೇಶದ ಶೇ.80 ಭಾಗವನ್ನು ಆಡಳಿತ ನಡೆಸುತ್ತಿವೆ. ಗಂಗಾ ಉತ್ತರಾಖಂಡದಲ್ಲಿ ಹುಟ್ಟಿ ಬಂಗಾಳದಲ್ಲಿ ಸಮುದ್ರ ಸೇರುವಂತೆ, ಉತ್ತರಾಖಂಡದಿಂದ ಉತ್ತರ ಪ್ರದೇಶ, ಬಿಹಾರ ಮತ್ತು ಬಂಗಾಳದವರೆಗೂ ಬಿಜೆಪಿ ಆಡಳಿತ ವಿಸ್ತರಿಸಿದೆ” ಎಂದು ಅಮಿತ್ ಶಾ ಹೇಳಿದರು.
ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ಎನ್ಡಿಎ ಸರ್ಕಾರ ಸತತ ಮೂರನೇ ಬಾರಿ ಕೇಂದ್ರದಲ್ಲಿ ಅಧಿಕಾರಕ್ಕೆ ಬಂದಿದೆ ಎಂದು ಅವರು ಹೇಳಿದರು.
ಬಿಜೆಪಿಯ ನಿರಂತರ ಚುನಾವಣಾ ಗೆಲುವಿನ ಹಿಂದೆ ಬೂತ್ ಮಟ್ಟದ ಕಾರ್ಯಕರ್ತರ ಶ್ರಮವೇ ಪ್ರಮುಖ ಕಾರಣ ಎಂದು ಶಾ ಪ್ರಶಂಸಿಸಿದರು. “ಪ್ರತಿ ಗೆಲುವಿನ ನಿಜವಾದ ಹಕ್ಕುದಾರರು ಬಿಜೆಪಿ ಕಾರ್ಯಕರ್ತರು” ಎಂದರು.
ಸ್ಥಳೀಯ ಸಮಸ್ಯೆಗಳಿಗೂ ಪಕ್ಷದ ಕಾರ್ಯಕರ್ತರು ಸ್ಪಂದಿಸುತ್ತಿರುವುದರಿಂದ ಬಿಜೆಪಿ ಜನರೊಂದಿಗೆ ನೇರ ಸಂಪರ್ಕ ಕಾಯ್ದುಕೊಂಡಿದೆ ಎಂದು ಅವರು ಹೇಳಿದರು.
ರಾಜ್ಯ ಮಟ್ಟದ ಪಕ್ಷದಿಂದ ರಾಷ್ಟ್ರಮಟ್ಟದ ರಾಜಕೀಯ ಶಕ್ತಿಯಾಗಿ ಬಿಜೆಪಿ ಬೆಳೆದಿದ್ದು, ಅಭಿವೃದ್ಧಿ ಮತ್ತು ಆಡಳಿತದ ಮೇಲಿನ ಜನರ ವಿಶ್ವಾಸವೇ ಪಕ್ಷದ ಯಶಸ್ಸಿಗೆ ಕಾರಣ ಎಂದು ಅಮಿತ್ ಶಾ ತಿಳಿಸಿದರು.
