ನವದೆಹಲಿ: ಭಾರತದ ಇಂಧನ ದತ್ತಾಂಶ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸಲು ಅಂಕಿಅಂಶ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ (MoSPI) ರಚಿಸಿದ್ದ ತಜ್ಞರ ಸಮಿತಿಯು ತನ್ನ ವರದಿ ಸಲ್ಲಿಸಿದ್ದು, ಇಂಧನ ಅಂಕಿಅಂಶಗಳ ಗುಣಮಟ್ಟ, ಏಕರೂಪತೆ ಮತ್ತು ವಿಶ್ವಾಸಾರ್ಹತೆಯನ್ನು ಹೆಚ್ಚಿಸಲು ಹಲವು ಪ್ರಮುಖ ಶಿಫಾರಸುಗಳನ್ನು ಮಾಡಿದೆ.
ಐಐಟಿ ದೆಹಲಿಯ ನಿರ್ದೇಶಕ ಡಾ. ರಂಗನ್ ಬ್ಯಾನರ್ಜಿ ನೇತೃತ್ವದ ಸಮಿತಿಯು ಅಂತರರಾಷ್ಟ್ರೀಯ ಮಾನದಂಡಗಳಿಗೆ ಅನುಗುಣವಾಗಿ ಇಂಧನ ದತ್ತಾಂಶ ಸಂಗ್ರಹಣೆ ಹಾಗೂ ವರ್ಗೀಕರಣ ವ್ಯವಸ್ಥೆಯನ್ನು ರೂಪಿಸುವಂತೆ ಸಲಹೆ ನೀಡಿದೆ. ಸಚಿವಾಲಯಗಳ ನಡುವೆ ಏಕರೂಪದ ಇಂಧನ ಪರಿವರ್ತನೆ ಮಾನದಂಡಗಳನ್ನು ಅಳವಡಿಸಿಕೊಳ್ಳುವಂತೆಯೂ ಶಿಫಾರಸು ಮಾಡಿದೆ.
ಕಲ್ಲಿದ್ದಲು ಬಳಕೆ, ಜೈವಿಕ ಇಂಧನ, ಕ್ಯಾಪ್ಟಿವ್ ಹಾಗೂ ಆಫ್-ಗ್ರಿಡ್ ವಿದ್ಯುತ್ ಉತ್ಪಾದನೆ ಮತ್ತು ವಿದ್ಯುತ್ ವಾಹನಗಳ ವಿದ್ಯುತ್ ಬಳಕೆಯಂತಹ ಕ್ಷೇತ್ರಗಳಲ್ಲಿ ಸಮಗ್ರ ದತ್ತಾಂಶ ಸಂಗ್ರಹಿಸಲು ಹೊಸ ವಿಧಾನಗಳನ್ನು ಅನುಸರಿಸುವಂತೆ ವರದಿ ಸೂಚಿಸಿದೆ. ವಾರ್ಷಿಕ ಕೈಗಾರಿಕಾ ಸಮೀಕ್ಷೆ (ASI) ದತ್ತಾಂಶವನ್ನು ಬಳಸಿ ಉದ್ಯಮವಾರು ವಿದ್ಯುತ್ ಬಳಕೆಯನ್ನು ಅಂದಾಜು ಮಾಡುವಂತೆಯೂ ಶಿಫಾರಸು ಮಾಡಲಾಗಿದೆ.
ದೇಶೀಯ ಮಾಹಿತಿಯ ಕೊರತೆಯಿಂದ ಭಾರತದ ಒಟ್ಟು ಇಂಧನ ಬಳಕೆಯ ಶೇ.31ರಿಂದ 34ರಷ್ಟು ಜೈವಿಕ ಇಂಧನ ಎಂದು ವಿಶ್ವಸಂಸ್ಥೆ ಅಂದಾಜಿಸಿರುವ ಹಿನ್ನೆಲೆಯಲ್ಲಿ, ಸ್ಥಳೀಯ ದತ್ತಾಂಶ ಆಧಾರಿತ ನಿಖರ ವಿಧಾನ ರೂಪಿಸುವ ಅಗತ್ಯವಿದೆ ಎಂದು ಸಮಿತಿ ತಿಳಿಸಿದೆ.
ಈ ಶಿಫಾರಸುಗಳು ಭಾರತದ ಇಂಧನ ಅಂಕಿಅಂಶಗಳನ್ನು ಹೆಚ್ಚು ವಿಶ್ವಾಸಾರ್ಹ, ಹೋಲಿಕೆ ಮಾಡಬಹುದಾದ ಮತ್ತು ನೀತಿ ರೂಪಣೆಗೆ ಪರಿಣಾಮಕಾರಿಯಾಗಿಸುವ ಉದ್ದೇಶ ಹೊಂದಿವೆ ಎಂದು MoSPI ತಿಳಿಸಿದೆ.
