ನವದೆಹಲಿ: ಆಪಲ್‌ನ ಮೊದಲ ಮಡಚಬಹುದಾದ (Foldable) ಐಫೋನ್‌ಗಾಗಿ ತಂತ್ರಜ್ಞಾನ ಪ್ರಿಯರು ಹಲವು ವರ್ಷಗಳಿಂದ ಕಾಯುತ್ತಿದ್ದು, ಇದೀಗ ಅದು ಶೀಘ್ರದಲ್ಲೇ ಅನಾವರಣಗೊಳ್ಳುವ ಸಾಧ್ಯತೆ ಇದೆ. ಕಂಪನಿಯು ಇನ್ನೂ ಅಧಿಕೃತ ಘೋಷಣೆ ಮಾಡದಿದ್ದರೂ, ಇತ್ತೀಚಿನ ಸೋರಿಕೆಗಳ ಪ್ರಕಾರ ‘ಐಫೋನ್ ಅಲ್ಟ್ರಾ’ ಅನ್ನು ಐಫೋನ್ 18 ಪ್ರೊ ಸರಣಿಯೊಂದಿಗೆ ಸೆಪ್ಟೆಂಬರ್ 9ರಂದು ಪರಿಚಯಿಸುವ ಸಾಧ್ಯತೆ ಇದೆ.
ವರದಿಗಳ ಪ್ರಕಾರ, ಐಫೋನ್ ಅಲ್ಟ್ರಾ 7.8 ಇಂಚಿನ ಒಳಭಾಗದ ಮಡಚಬಹುದಾದ OLED ಡಿಸ್‌ಪ್ಲೇ ಹಾಗೂ 5.5 ಇಂಚಿನ ಹೊರ ಡಿಸ್‌ಪ್ಲೇ ಹೊಂದಿರಲಿದೆ. ಹೊಸ A20 ಪ್ರೊ ಚಿಪ್‌ಸೆಟ್, 12GB LPDDR5X RAM ಮತ್ತು ಆಪಲ್ ಅಭಿವೃದ್ಧಿಪಡಿಸಿರುವ C2 ಮೋಡೆಮ್‌ ಇದರಲ್ಲಿ ಇರಬಹುದು ಎನ್ನಲಾಗಿದೆ.
ಬ್ಯಾಟರಿ ಸಾಮರ್ಥ್ಯ 5,400mAh ರಿಂದ 5,800mAh ನಡುವಿರಬಹುದು ಎಂದು ವದಂತಿಗಳಿವೆ. ಕ್ಯಾಮೆರಾ ವಿಭಾಗದಲ್ಲಿ ಎರಡು 48 ಮೆಗಾಪಿಕ್ಸೆಲ್ ಹಿಂಬದಿ ಕ್ಯಾಮೆರಾಗಳು ಹಾಗೂ ಒಳ ಮತ್ತು ಹೊರ ಡಿಸ್‌ಪ್ಲೇಗಳಿಗೆ ಪ್ರತ್ಯೇಕ ಸೆಲ್ಫಿ ಕ್ಯಾಮೆರಾಗಳನ್ನು ನೀಡುವ ಸಾಧ್ಯತೆ ಇದೆ.
ಸೋರಿಕೆಯಾದ ಮಾಹಿತಿಯ ಪ್ರಕಾರ, ಈ ಫೋನ್ ಸಾಮಾನ್ಯ ಫೋಲ್ಡಬಲ್ ವಿನ್ಯಾಸಕ್ಕಿಂತ ಅಗಲವಾಗಿದ್ದು, ತೆರೆದಾಗ ಐಪ್ಯಾಡ್ ಮಿನಿ ಮಾದರಿಯ ಅನುಭವ ನೀಡಬಹುದು. ಯುಎಸ್‌ಬಿ ಟೈಪ್-ಸಿ ಪೋರ್ಟ್, ಸ್ಟೀರಿಯೊ ಸ್ಪೀಕರ್ ಹಾಗೂ ವಿಶೇಷ ಕ್ಯಾಮೆರಾ ಕಂಟ್ರೋಲ್ ಬಟನ್‌ ಕೂಡ ಇರಬಹುದು ಎನ್ನಲಾಗಿದೆ.
ಬ್ಲೂಮ್‌ಬರ್ಗ್‌ನ ಮಾರ್ಕ್ ಗುರ್ಮನ್ ವರದಿ ಪ್ರಕಾರ, ಆಪಲ್‌ನ ವಾರ್ಷಿಕ ಹಾರ್ಡ್‌ವೇರ್ ಕಾರ್ಯಕ್ರಮವು ಸೆಪ್ಟೆಂಬರ್ 9, 2026ರಂದು ನಡೆಯುವ ಸಾಧ್ಯತೆ ಇದೆ. ಇದೇ ಕಾರ್ಯಕ್ರಮದಲ್ಲಿ ಐಫೋನ್ 18 ಪ್ರೊ, ಐಫೋನ್ 18 ಪ್ರೊ ಮ್ಯಾಕ್ಸ್ ಜೊತೆಗೆ ಐಫೋನ್ ಅಲ್ಟ್ರಾ ಅನಾವರಣಗೊಳ್ಳುವ ನಿರೀಕ್ಷೆಯಿದೆ.
ವದಂತಿಗಳ ಪ್ರಕಾರ, ಭಾರತದಲ್ಲಿ ಈ ಮಡಚಬಹುದಾದ ಐಫೋನ್‌ನ ಬೆಲೆ ₹1,99,990 ರಿಂದ ₹2,29,990ರ ನಡುವೆ ಇರಬಹುದು. ಆದರೆ, ಈ ಎಲ್ಲ ಮಾಹಿತಿಯನ್ನು ಆಪಲ್ ಇನ್ನೂ ಅಧಿಕೃತವಾಗಿ ದೃಢಪಡಿಸಿಲ್ಲ.
