ವಾಷಿಂಗ್ಟನ್: ಇರಾನ್ ವಿರುದ್ಧದ ಸಂಘರ್ಷ ತೀವ್ರಗೊಳ್ಳುತ್ತಿರುವ ಬೆನ್ನಲ್ಲೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ‘ಮದರ್ ಆಫ್ ಆಲ್ ಬಾಂಬ್ಸ್’ (MOAB) ಎಂಬ ಬೃಹತ್ ಪರಮಾಣುಯೇತರ ಬಾಂಬ್ ಬಳಸುವ ಬಗ್ಗೆ ಚಿಂತನೆ ನಡೆಸುತ್ತಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಇರಾನ್‌ನ ಪ್ರಮುಖ ಮಿಲಿಟರಿ ನೆಲೆಗಳು ಹಾಗೂ ಇಂಧನ ಮೂಲಸೌಕರ್ಯಗಳನ್ನು ಗುರಿಯಾಗಿಸುವ ಸಾಧ್ಯತೆ ಚರ್ಚೆಯಲ್ಲಿದೆ. ಆದರೆ, ಈ ಬಾಂಬ್ ಬಳಕೆಗೆ ಅಂತಿಮ ನಿರ್ಧಾರ ಕೈಗೊಳ್ಳಲಾಗಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ನಟಾಂಜ್ ಅಣುಸೌಲಭ್ಯದ ಮೇಲೆ ಕಣ್ಣು?
ಇರಾನ್ ರಾಜಧಾನಿ ಟೆಹ್ರಾನ್‌ನಿಂದ ದಕ್ಷಿಣಕ್ಕೆ ಸುಮಾರು 225 ಕಿ.ಮೀ. ದೂರದಲ್ಲಿರುವ ನಟಾಂಜ್ ಯುರೇನಿಯಂ ಪುಷ್ಟೀಕರಣ ಘಟಕದ ಸಮೀಪದ ಪಿಕಾಕ್ಸ್ ಪರ್ವತದ ಕೆಳಗೆ ರಹಸ್ಯ ಭೂಗತ ಸುರಂಗಗಳು ಹಾಗೂ ಅಣುಸಂಬಂಧಿತ ಸೌಲಭ್ಯಗಳಿವೆ ಎಂದು ವರದಿಗಳು ಹೇಳಿವೆ. ಇರಾನ್ ತನ್ನ ಪರಮಾಣು ತಂತ್ರಜ್ಞಾನ, ಸೆಂಟ್ರಿಫ್ಯೂಜ್‌ಗಳು ಮತ್ತು ಇತರ ಪ್ರಮುಖ ಉಪಕರಣಗಳನ್ನು ರಕ್ಷಿಸಲು ಪರ್ವತದ ಆಳದಲ್ಲಿ ಭೂಗತ ವ್ಯವಸ್ಥೆಗಳನ್ನು ನಿರ್ಮಿಸಿದೆ ಎನ್ನಲಾಗಿದೆ.
ಈ ಹಿನ್ನೆಲೆಯಲ್ಲಿ, ಇರಾನ್‌ನ ಭೂಗತ ಸೌಲಭ್ಯಗಳನ್ನು ಗುರಿಯಾಗಿಸಲು ಅಮೆರಿಕ ಯಾವ ರೀತಿಯ ಬಾಂಬ್ ಬಳಸಬಹುದು ಎಂಬ ಚರ್ಚೆ ಆರಂಭವಾಗಿದೆ.
ಏನಿದು ‘ಮದರ್ ಆಫ್ ಆಲ್ ಬಾಂಬ್ಸ್’?
ಸುಮಾರು 9,800 ಕೆ.ಜಿ. ತೂಕದ MOAB ಅಮೆರಿಕದ ಅತ್ಯಂತ ಶಕ್ತಿಶಾಲಿ ಪರಮಾಣುಯೇತರ ಬಾಂಬ್‌ಗಳಲ್ಲಿ ಒಂದಾಗಿದೆ. ಇದು ನೆಲಕ್ಕೆ ಅಪ್ಪಳಿಸುವ ಮೊದಲು ಗಾಳಿಯಲ್ಲೇ ಸ್ಫೋಟಗೊಂಡು ಭಾರಿ ಆಘಾತ ತರಂಗವನ್ನು ಸೃಷ್ಟಿಸುತ್ತದೆ. 2017ರಲ್ಲಿ ಅಫ್ಘಾನಿಸ್ತಾನದಲ್ಲಿ ಇಸ್ಲಾಮಿಕ್ ಸ್ಟೇಟ್ (ಐಸಿಸ್) ಉಗ್ರರ ಸುರಂಗ ಜಾಲದ ವಿರುದ್ಧ ಅಮೆರಿಕ ಈ ಬಾಂಬ್ ಬಳಸಿತ್ತು.
ಆದರೆ, MOAB ಭೂಮಿಯ ಆಳಕ್ಕೆ ನುಗ್ಗಿ ಬಂಕರ್‌ಗಳನ್ನು ಧ್ವಂಸಗೊಳಿಸಲು ವಿನ್ಯಾಸಗೊಳಿಸಿದ ಬಾಂಬ್ ಅಲ್ಲ. ಹೀಗಾಗಿ ಪಿಕಾಕ್ಸ್ ಪರ್ವತದ ಆಳದಲ್ಲಿರುವ ಇರಾನ್‌ನ ಭೂಗತ ಅಣುಸೌಲಭ್ಯಗಳನ್ನು ಇದು ಸಂಪೂರ್ಣವಾಗಿ ನಾಶಪಡಿಸಬಲ್ಲದೇ ಎಂಬ ಪ್ರಶ್ನೆ ಎದುರಾಗಿದೆ.
ಅಮೆರಿಕದ ಬಳಿ ಬಂಕರ್ ಬಸ್ಟರ್ ಬಾಂಬ್ ಕೂಡ ಇದೆ
ಭೂಗತ ಬಂಕರ್‌ಗಳು ಹಾಗೂ ಬಲವರ್ಧಿತ ನೆಲೆಗಳನ್ನು ಗುರಿಯಾಗಿಸಲು ಅಮೆರಿಕದ ಬಳಿ GBU-57 MOP (ಮ್ಯಾಸಿವ್ ಆರ್ಡಿನೆನ್ಸ್ ಪೆನೆಟ್ರೇಟರ್) ಎಂಬ ಪ್ರತ್ಯೇಕ ಬಾಂಬ್ ಇದೆ. ಇದು ಭೂಮಿಯೊಳಗೆ ಮತ್ತು ಗಟ್ಟಿಯಾದ ರಕ್ಷಣಾತ್ಮಕ ರಚನೆಗಳೊಳಗೆ ನುಗ್ಗಿ ಸ್ಫೋಟಿಸುವಂತೆ ವಿನ್ಯಾಸಗೊಳಿಸಲಾಗಿದೆ. MOAB ಮತ್ತು GBU-57ರ ಕಾರ್ಯವೈಖರಿ ವಿಭಿನ್ನವಾಗಿದೆ.
ಪೆಂಟಗನ್‌ಗೆ ಗುರಿಗಳ ಪಟ್ಟಿ ಸಿದ್ಧಪಡಿಸಲು ಸೂಚನೆ?
ಸಿಎನ್‌ಎನ್ ವರದಿ ಪ್ರಕಾರ, ಇರಾನ್‌ನ ನಿರ್ಣಾಯಕ ಮಿಲಿಟರಿ ಹಾಗೂ ಇಂಧನ ನೆಲೆಗಳ ಪಟ್ಟಿಯನ್ನು ಸಿದ್ಧಪಡಿಸುವಂತೆ ಟ್ರಂಪ್ ಪೆಂಟಗನ್‌ಗೆ ಸೂಚನೆ ನೀಡಿದ್ದಾರೆ. ಇರಾನ್ ಮೇಲೆ ನಿರ್ಣಾಯಕ ದಾಳಿ ನಡೆಸಿ, ವಿಜಯ ಘೋಷಿಸಿ ಅಮೆರಿಕದ ಸೇನೆಯನ್ನು ಹಿಂತೆಗೆದುಕೊಳ್ಳುವ ಕಾರ್ಯತಂತ್ರದ ಬಗ್ಗೆ ವಾಷಿಂಗ್ಟನ್‌ನಲ್ಲಿ ಚರ್ಚೆ ನಡೆಯುತ್ತಿದೆ ಎನ್ನಲಾಗಿದೆ.
ಅಮೆರಿಕದ ಮಧ್ಯಂತರ ಚುನಾವಣೆಯೂ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ಮಹತ್ವ ಪಡೆದಿದೆ. ಇರಾನ್ ವಿರುದ್ಧ ಟ್ರಂಪ್ ಆಡಳಿತ ಯಾವ ರೀತಿಯ ಮಿಲಿಟರಿ ಕ್ರಮ ಕೈಗೊಳ್ಳಲಿದೆ ಮತ್ತು ಭೂಗತ ಅಣುಸೌಲಭ್ಯಗಳನ್ನು ಗುರಿಯಾಗಿಸಲು ಯಾವ ಶಸ್ತ್ರಾಸ್ತ್ರ ಬಳಸಲಿದೆ ಎಂಬುದು ಕುತೂಹಲ ಮೂಡಿಸಿದೆ.
