ನವದೆಹಲಿ: ಗ್ರಾಹಕರಿಗೆ ಬೆಲೆ ಹೋಲಿಕೆ ಸುಲಭವಾಗಿಸಲು ಹಾಗೂ ವ್ಯಾಪಾರದಲ್ಲಿ ಪಾರದರ್ಶಕತೆ ಹೆಚ್ಚಿಸಲು ಕೇಂದ್ರ ಸರ್ಕಾರ ಖಾದ್ಯ ತೈಲಗಳು ಮತ್ತು ಕೊಬ್ಬಿನ ಉತ್ಪನ್ನಗಳಿಗೆ ಪ್ರಮಾಣಿತ ಪ್ಯಾಕ್ ಗಾತ್ರಗಳನ್ನು ನಿಗದಿಪಡಿಸಿದೆ.
ಗ್ರಾಹಕ ವ್ಯವಹಾರಗಳ ಇಲಾಖೆ, ಖಾದ್ಯ ತೈಲ ವಲಯದ ಪ್ರಮುಖ ಕೈಗಾರಿಕಾ ಸಂಸ್ಥೆಗಳೊಂದಿಗೆ ಸಮಾಲೋಚನೆ ನಡೆಸಿದ ಬಳಿಕ ಈ ಹೊಸ ಮಾರ್ಗಸೂಚಿಗಳನ್ನು ಪ್ರಕಟಿಸಿದೆ. ವಿವಿಧ ಗಾತ್ರದ ಪ್ಯಾಕ್ಗಳಿಂದ ಗ್ರಾಹಕರು ಗೊಂದಲಕ್ಕೀಡಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಹೊಸ ನಿಯಮದ ಪ್ರಕಾರ, ತಾಳೆ, ಸೋಯಾಬೀನ್, ಸೂರ್ಯಕಾಂತಿ, ಸಾಸಿವೆ, ನೆಲಗಡಲೆ, ಎಳ್ಳು, ಅಕ್ಕಿ ಹೊಟ್ಟು, ಹತ್ತಿಬೀಜ ಹಾಗೂ ಜೋಳದ ಎಣ್ಣೆಗಳನ್ನು 200 ಮಿ.ಲೀ./ಗ್ರಾಂ, 500 ಮಿ.ಲೀ./ಗ್ರಾಂ, 1, 2, 3, 4, 5, 15 ಮತ್ತು 20 ಲೀಟರ್/ಕೆಜಿ ಗಾತ್ರದ ಪ್ಯಾಕ್ಗಳಲ್ಲಿ ಮಾತ್ರ ಮಾರಾಟ ಮಾಡಬೇಕು.
ಇದಲ್ಲದೆ, ಲೀಟರ್ ಅಥವಾ ಮಿಲಿಲೀಟರ್ನಲ್ಲಿ ಪ್ರಮಾಣ ನಮೂದಿಸಿರುವ ಪ್ಯಾಕ್ಗಳಲ್ಲಿ ಅದರ ಸಮಾನ ತೂಕವನ್ನೂ ಕಡ್ಡಾಯವಾಗಿ ಉಲ್ಲೇಖಿಸಬೇಕು. ಇದರಿಂದ ಗ್ರಾಹಕರು ವಿವಿಧ ಬ್ರ್ಯಾಂಡ್ಗಳ ಬೆಲೆ ಮತ್ತು ಪ್ರಮಾಣವನ್ನು ಸುಲಭವಾಗಿ ಹೋಲಿಕೆ ಮಾಡಬಹುದು.
200 ಮಿ.ಲೀ. ಅಥವಾ 200 ಗ್ರಾಂಗಿಂತ ಕಡಿಮೆ ಪ್ರಮಾಣದ ಪ್ಯಾಕ್ಗಳಿಗೆ ಈ ನಿಯಮದಿಂದ ವಿನಾಯಿತಿ ನೀಡಲಾಗಿದೆ. ದೇಶೀಯ ಹಾಗೂ ಆಮದು ಮಾಡಿಕೊಳ್ಳುವ ಖಾದ್ಯ ತೈಲಗಳಿಗೂ ಈ ನಿಯಮ ಅನ್ವಯವಾಗಲಿದೆ.
ಹೊಸ ನಿಯಮಗಳನ್ನು ಜಾರಿಗೆ ತರಲು ತಯಾರಕರು, ಪ್ಯಾಕರ್ಗಳು ಮತ್ತು ಆಮದುದಾರರಿಗೆ ಮೂರು ತಿಂಗಳ ಅವಧಿ ನೀಡಲಾಗಿದೆ. ಈ ಕ್ರಮದಿಂದ ಖಾದ್ಯ ತೈಲ ಮಾರುಕಟ್ಟೆಯಲ್ಲಿ ಪಾರದರ್ಶಕತೆ, ಏಕರೂಪತೆ ಹಾಗೂ ನ್ಯಾಯಸಮ್ಮತ ಸ್ಪರ್ಧೆ ಹೆಚ್ಚುವ ನಿರೀಕ್ಷೆಯಿದೆ.
